Related Articles
Afghan lei nawlngeitu hna nih mino te a si mi pumpululh celhthiam cu Kabul airport i US ralkap vawlawng ai awk nak in a tla i a thi beh tiah fianternak an tuah cang.
Zaki Anwari, kum 19, hi Afghanistan ram caah Youth Team in pumhpululh a chuih mi a si. Zeitik caan ah dah a thih ti belte fiang in theih a si rih lo. Kan theih cio bantukin Taliban Tapung nih cun Afghan rampi cu an tlaih khawh cang. Cu lio ah Kabul airport ah cun ramdang lei vanlawng, an ram mi hna laak dingin a hawn zuangmi, hna cu heh tiah minung tam taktak nih cun kulh le zulh cio a si.
Hmanthlak le video kenkip zongah an tlik lio le vanlawng an dawi lio hna cu hmuh cio a si. US ralkap vanlawng zong zuan aa timh cuahmah lio ahcun tthenkhat hna nih vanlawng ah an i thlai le an i awk lio zong hmuh khawh a si. Cutluk cun rampi cu chuahtak an rak duh cio ti a lang. Tualchung media nih a langhter ning ahcun a tlawm bik minung 2 paoh vanlawng in a tla i a thi mi an um tiah a chim. US air force lei zong nih Qatar kan phaak tiangah vanlawng kee ah a awk mi an um rih tiah an langhter ve.
Afghanistan Physical Education le Sports lei in General Directorate a si mi nih facebook zongah Mr Anwari thlahnak ca zong a langhter ve. A langhter ning cu tihin a si ” Vanram ah i din hram seh, a chungkhar, a hawile le lentecelh pi a hawile hna ca zongah Pathian sinah thla ka cam” ti’n a langhter ning cu a si.
US ralkap 4,500 hrawng nih hin a tu hi chikhat caan cu Kabul(Afghan Khualipi) ah a um mi Karzai International Airport cu an tlaih rih. Taliban tapung hna nih khual tlawng in Afghan ah a ra mi documents a ngei lo mi paoh cu an kham dih hna i documents tlamtling a ngeimi zong an buai ngaingai tiah theih a si. Ref: BBC
A Dang Reltthan: Korawna rai chung ah ngaktah (a nu le pa ning si lo hmanh ah pakhat paoh nih thihtakmi) million 1.6 hrawng an van si ee tiah The Lancet timi min ngei Journal pakhat nih tuchun ah an van langhter. Mah cu USA, South-Africa, Brasil, Mexico, Peru, Russia, Argentina, Iran le Columbia i Korawna in a thimi cazin ning in an langhtermi a si.
Tu kum thawk in July tiang ah India hi million 4.7 hrawng an thih tiah Center for Global Development nih a ttial ve i cu hna an fale ngakttah zeizahdah um hnga ti tutan ah an telh lo nain million khat hrawng an si tiin an tuak. Cu van chap ah million 2.6 hrawng an si. Myanmar ah a thimi cazin a lang dih lo nain a nupa in a thimi hmanh hi kanmah Laimi lakah an um len i a nu maw, a pa maw nih a thihtakmi ngakchia an tam ngai ko lai ti cu a fiang ngai ko.
Tulio cu rai lawng si loin uknak caan chia chung a si caah hin rianttuan zong a har tuk lai. Zeiti i bawmh awk le i zohkhenh ding ti hmanh a ruat kho lomi kan tampi lio a si ko lai. A fawi lo. Myanmar ah minote pakhat cu thla khat chung ah a pi, a nu le pa nih Korawna in an thihtak, chungkhat sahlawh a ngei tukmi an si lo tikah zeitluk indah a va har hnga.
An biaknak phung ning in a nu le pa, a pi ruak ca ah thlacam le thlahnak tuah ding phaisa nei lo tiang in a um. Amah kong ka hei theih hmanh ah ka lungtur a fah lio ah bawhte le ngakchia tete nu le pa ttah awk hmanh a thei lomi hna kong ka ruah ahhin a fak hringhran ko. Pathian cu Cheuhra-cheukhat hi hmei-nu, ngakttah le mihar cawmnak ding ah a timi a si, i Pathian nih hin ngakttah le siifak hi a dawt tuk hna.
Nihin Khrifa tampi cu biakinn tthattha kan ti, biakinn music, information ca a herhmi thilri van tawng le hmun kaukau ah kan phaisa kan hman dih. Thawngttha zong zumlotu sinah kan phakter ding tluk in kan phanhter lo hlei ah Pastor te ai za in a cawm lo i miharsa le ngakttah zohnak ah kan hmanmi hi a um huaha ti lo. – Bialam phan ah cheuhra cheukhat kong ka van telh chih, tulio a ka ngerhtu si.
Uktu an i thleng lai. Nunnak a dih lai. Caan a dong te lai. Cu tikah nihin i kan rian nganbik hi zeidah a si? Kan innpa cu zeidah an si? Pathian nih zeidah a duhbikmi a si. Mirum pa kha Lazaruh rawl a pek lo ruang bak ah thi ko. Nuhmei le ngahttah a daw tukmi Pathian a zum i a biami hna kan nunnak ah khuaruah ding a um si cun ka siaherhnak hi a phu ko. Credit: Si Bawimang Lian
