Related Articles
Myanmar ralkap bawi Min Aung Hlaing nih August 1 ah rampi nawlngeihnak an laakmi thla 6 tlin caan lawmh in mipi sinah biachimnak a ngei. Cu ahcun Min Aung HLaing nih Buddhist biaknak an kilven camcin lai timi kongkau, 2023 August thla hnu lawngah chimfiannak an ngeih tthan khawh dingmi kong le Rampi a vengtu cozah thar an dirhmi kongkau pawng cu a chim.
Cu kongkau he pehtlai in NUG cozah in ramdang palai Dr.Sasa cu biahal a si i a nih nih cun ralkap nih biaknak hi hriamnam ah hman hram an i tim i mipi an kan hlen thluahmah cang lai. Democracy uknak um lo dingin kan i zuam cuahmah ko timi an langhter tiah a ti.
Dr.Sasa nih cun “Zeibantuk min an i bunh a si zongah, anmah minung hi biapi cem mi cu an si ko. Ralkap nih Democracy phung ningin itthithruainak cu hriamnam hmangin an hrawh dih. Ralkap uknak tangah Myanmar ram hi a chia deuhdeuh i October thla dih cun Myanmar mipi 55million chungin 6.4million cu ei le din awk ngei loin harsatnak a phaan lai. Hibantuk dirhmun ah ralkap cozah nih Covid-19 tei kho loin an buai cang.
“Hitluk in Myanmar ram le mipi an thahnawn hnu hna ah, an diriam kho rih lo. Zeidah an duh rihmi a si? Curuangah min thar rampi a kilvengtu cozah tiah an i pek mi cu Myanmar ram kan chia thluahmah ko lai. Democracy uknak um lo dingin an kan tuaitam thluahmah cang lai, mipi harsatnak an kan pek thluahmah lai i, rampi tiang nih harsatnak kan tuar thluahmah lai ti khi an duhnak a si ko.
“Ralkap nih cozah an dirhchuah kho lo i min thar an i pek sawsawh khi a si. Fimcawnnak zung le ngandamnak lei zung pawl khi zoh ko ulaw zeihmanh an tuah khawh lo zia a lang chin lengmang. Mipi chiatchuah le rampi chiatchuah lo bak a dang tuah khawh mi an ngei lo. Ramtthen le ramkulh zongah cozah an dirh kho lo. Mipi kan uk kho lo ti’n nawlngeihnak cu fehter chin lengmang ko hna seh. Cu lawng cu an tuah khawh chun a si.
“Min hmasa an pekmi hmangin vawleicung pawlkomhnak an pehtlaih khawh ti lo tikah min thar an i pe nain, vawleicung hi anmah bantuk thluak nih hlen khawhmi a si lo. Zeibantuk min in an kal a si zongah an theih dih cang hna, mi that an si i zeibantuk i pawlkomhnak hmanhah an i tel kho lo. Cozah dirh kho dirhmun zong an si lo. Min thlen sawsawh in vawleicung ah hmunram laak lengmang an i timh a si ahcun an mualpho chinchin lai.
“Tu ah Min Aung Hlaing nih Buddhist biaknak an kilven chinchin lai timi a chim i mah cucu biaknak hmangin mipi buai thluahmah hnaseh tiah biaknak cu hriamnam ah hman hram an thok. Hibantuk cu tuanbia zongah a rak um cangmi a si i ralkap hmanrua pakhat a si. Cucu mizei biaknak i um Myanmar rampi ho paoh kan dihlakin kan i ralrin a herh i ralkap thangkamhmi chungah lut lo dingin i fimhrin cio hna usih. Biaknak ah buai ding kan si lo, zeibantuk biaknak zong remnak duh dihmi kan si” tiah a chim.
