Related Articles
Naihrawng KIA le ralkap ikahdohnak a linsa ngaingai. Kachin ramkulh hmun tthenkhat ah mipi ralzaam zong an um len. Mah cucu ralkap nih KIA zungpi umnak Laiza khuapi an kahmi le Waing Maw khuapi an kahmi ruangah an zaam nak hi a si bik.
Hibantuk dirhmun ah Sagaing ramri, Shan ramri le Mon ramkulh i um KIA pawl nih biatak tein an umnak hmun lila ah ralkap cu an doh hna. Shan ramkulh Kutkai khuapi in meng 7 hrawng hlat tlukah mawtawlam i a kal tawnmi ralkap mawtaw cu KIA nih August 4 chung suimilam 1pm hrawngah bomb in an puahhnawh i a hmunah ralkap 7 an thi hliamhma a tuarmi minung 12 an um tiah an tarlangh.
KIA thawngthanhnak nih cun “Hoe Naung khua pin Ngiopin peng pawngah Ralkap mawtaw a kal mi cu KIA ralkap bu 29nak nih bomb voi 5 an puahhnawh i mithi le hliamhma a tuar mi an tam. A hnuah damlo mawtaw a rak phan i damlo le mithi ruak cu an phurh” tiah a chim.
Ralkap mawtaw bomb puahtu pawl cu Shan ramkulh le Kachin ramri i um KIA ralkap bu 29nak an si. Kutkai lam pi cu KIA, TNLA le MNDAA pawl nih ralkap dohnak hmunpi ah an hman i kahdohnak zong a tam. Kachin ralkap KIA pawl nih Kachin ramkulh chung lawngah um an si lo i, Shan ramkulh, Sagaing ramtthen le Mon ramkulh lei zongah hmun khuarmi an ngei.
