Related Articles
Myanmar ralkap nih rampi nawlngeihnak an laakmi dohkalh ruangah director lar ngai a si mi Ko Pauk cu pohmah 305 hmangin sualphawt le tlaih dingah an rak kawl lengmang mi a rak si.
Cubantuk a si tikah Ko Pauk nih a inn pi chuahtak in a zaam ve, tu ahcun tlangcung hriamtlai mi um nak hmun pakhat ah raldoh cawngmi PDF pawl caah rawl a chuan piak tawn hna. Cu ahcun Ko Pauk nih “kei cu thildang ah tthathnemnak ka ngei lo, ka tuahkhawh tawk rawlchuan in ttan ka rak la ve” tiah a tarlangh cang. Ko Pauk cu ralkap nih rampi nawlngeihnak an laak hlanah Myanmar ram chung i Director lar ngaingai mi pakhat a si i, movie tthenkhat zongah director a ttuan nak chungin a lar/poh mi zong tam lak te an um cang.
Ralkap nih rampi nawlngeihnak an laak cu ralkap uknak dokalh in lamzawh duhlonak ah a rak i tel ve lengmang ve i, tlaih dingin nawl an chuah ruangah tu ahcun a himnak hmun ah a um kho cang. A zaam hnu ah Ko Pauk nih a chim mi cu “kei cu zinglei ah mo-hin-kha le buh tel lo cun um thiam lo mi ka si i, dinh caan tete zongah lem(paci) suai a huam ngai mi ka si. Lunglen caan ah ttingttang tum pahin hlasak zong a huam tak mi ka si i Tiktok ah capo seih in midang a nuamhter tu zong ka si fawn.
A tu ah khabantuk pawl ka tuah kho ti lo nain ka diriam tthiamtthiam ko. Tu dirhmun i ka diriam khawh lomi cu mah le miphunpi, minung a si ko mi hriamnam bochan in an thah lengmangmi hna hi a si. Upa ngakchia, phungki tiang an zuah hna lo, mizei an si ah an thah thluahmah ko mi hna hi a rapthlak taktak ka ti. Mipi nih zei sualnak dah kan tuah?
Hriamnam ngeitu nih hriamnam bochan in nawlngeihnak an laak i cucu mipi nih duh loin kan dokalh ve. Cu hna cu sual a si kho maw? Teinak kan hmuh hrimhrim dingin doh kan herh, ralkap uknak kan hi kan doh hrimhrim a herh, Kan neh tei hrimhrim hna lai tiah zum cio ko usih” tiah a chim.
