Related Articles
Paletwa luhchuahnak lam an phih ruang ah mizaw zual zohkhenhnak a harsa Chin ramkulh, Paletwa peng ah hmunhma la mi ralhrang nih Paletwa khualuhnak pehtlaih lam hna cu caan sau pi phih a si caah Palatwah peng ah rianrang in zohkhenh a hau mi mizaw hna cu har nak an tong tiah khua mi hna nih an chim.
Siibawi hna nih rianrang in zohkhenh a hau mi mizaw hna caah Paletwa peng Siizung pi in siibawi minthut he 289 Battalion ah khualtlawnnak nawl voi tamtuk kan hal ko hna nain a kan pe duh lo tiah khualtlawnnak nawl a hal tu pakhat nih a chim.
Chuahluhnak nawl hal an har tuk. A cunglei sin chim hmasa ahau tiin thaizing ra than uh an ti. A thaizing va kal than zong ah a ngah lo. Siibawi nih an kan chimhnak ah Yangon, Maydalay hna ah va zohkhenh ding tampi an um. Kal nih a ngah lo i siivang in kan um tiah a chim.
Chin ramkulh, Paletwa peng ah minung 116895 an um i, Chin ramkulh chungah hmun a ngan bik le minung tam bik um nak hmun pakhat a si.Paletwa peng ah ralzaam hi hmunthum ah an um i ralzaam minung 9000 leng an um.
Ihkhun 50 tlum Paletwa peng Siizung pi ah Peng siibawi pakhat,Assistant siibawi lawng an um i,mei zong um lo, Ultrasound zong um lo,X-ray seh zong a thar kan herh tiah Khumi Media nih a tial. Credit: The Chin Post
A Dang Reltthan: Ralhrangbu nih nawlngeihnak a lak hnu April in June (second quarter) chungah ramchung mipi 1.2 million nih riantuan ding an ngei ti lo tiah UNOPS zohfelnak nih a chim.
Riantuantu um lo ruangah harsatnak a tong bik mi riantuannak hna cu Inn sak nak, hnipuan thitnak le tourism lei rian hna an si tiah Livehoods and Food Security Fund (LIFT) report nih a langhter. Kawlram ah rian ngeih lo ruangah harsatnak cu a si khawh chungin tawlrel a si lio ah ralhrangbu nih uknak a lak ruangah le covid third wave ruangah rian ngei lo harsatnak tampi a karh ter.
Covid ruangah rianhniam a tuanmi cheu 4 cheu 1 (73%) cu an tangka luh a tlak lengah 43% nih an rian an sung.2021 second quarter chungah riantuantu 1.2 million nih an rian an sungh cang tiah LIFT nih a langhter. Atu Kawlram ramkhel le chawlehnam lei harsatnak ruangah a luancia mi kum nakin mipi nih harsatnak an ton rih lai.
A bik in riantuantu phu cungah namnehnak nih sungh nak tam deuh a chuahpi te lai tiah LIFT director Katy Webley nih a chim. Riantuannak tampi cu voikhat pi in sungh a si ruangah le mipi nih tangka hmuhnak caah fak piin an i zuam lio a si caah mahni hin riantuantu hna nih an ton cuahmah mi rian ngeitu hna nih a hleikhun in miak timhnak le hramhram in riantuan ter nak hna a karh ter khawh mi a si.
Thiamnak a hniam mi Kawlram riantuantu 6 lak ah 1 cu hramhram in riantuan ter an si. Zei a si poh ah Kawlram riantuantu hna cu naih tein zoh i, riantuantu hna covo kilven dingin biachahnak fiangfai tein kan tuah a herh. LIFT bawmhchanhtu hna zong nih Kawlram mi sifak hna rian an tuan khawhnak ding le paw an i cawm khawhnak ding caah kan bawmh rih lai tiah report nih a langhter.
