Related Articles
PDF pawl riahcaw a bawmh hna ruang ah Social Affairs Minister nupi kan tlaih, tiah SAC nih chim August 27, Yangon Ramthen Social Affairs Minister U Naing Linn nupi Daw Khin Sandar Win cu PDF pawl riahcaw asiloah tirawl pekchanhnak he pehtlai in kan tlaih mi a si, tiah SAC nih an thanh.
Daw Khin Sandar Win hi a pasal U Naing Lin Insein Thonginn ah SAC nih an hren kar August 25 ah an tlaih hi a si i an tlaihnak hmun zong Insein thonginn pawng ah a si. SAC nih an thanh ning ah, “NUG he pehtlaihnak a ngei i CDM a tuah mi hna tangka in siseh, PDF pawl riahcaw, tangka le hriamnaam cawknak tibantuk a bawmtu hna kan tlaih hna i Daw Khin Sandar Win zong Insein thonginn pawng Hlaingmyit lam cung ah kan tlaih,” tiah an thanh.
Nizaan naite ah SAC phu nih NLD party chungtel minung 30 hrawng an tlaih hna hnu August 25 ah Daw Khin Sandar Win zong an tlaih ve hi a si, tiah BBC nih a langhter. Credit: The Hakha Times
A Dang Reltthan: August 27, Myanmar caan zaan suimilam 7 PM ah One Championship Battle Ground III in Salai Tial Thang le Korea mitthuathiam Song Min Jong cu an i tong cang lai, an i thongh lai caan a naih thluahmah cang bantukin an pahnih cu biahalnak an ngeih veve hna. An biahalmi hna cu a tanglei bantukin a si.
Salai Tial Thang nih cun “Song Min Jong he i tong dingin bia a fel hlanah MMA dirhmun in minung 16 he aa tthua cangmi pakhat le One Championship ah mithar pakhat he i tthua dingin chawnh biak ka si cang nain, cucu a cang kho lo. Kei ka hrang ahcun mizeihmanh an si ah aa dang hlei nak a um lo. Zeicatiah mizei paoh he i tawng dingin timhtuahnak ka ngei peng. Keimah he aa tong dingmi he hmuhtonmi zong tam deuh a ngei ko a si nain ka dirhmun kaa theihfian tuk ve, ruahchannak in ka khat ko” tiah a chim.
Song Min Jong nih a chim ve mi cu “Mi zeihmanh he kan i ton tikah cucu a biapi dihmi a si. Amahbelte tutan hi cu a hlei in a biapi khun. Zeicatiah ka kum zong upa lei a panh thluahmah i tutan ah ka sungh a si ahcun puai 2 a peh in ka sungh a va si hnga cu caah dinh duhnak lungput tiang ka ngei kho. Cu ruangah tutan puai cu tei ding bakin ka cawlcaang ko lai. Tial Thang cu a ttha ko tiah ka hmuh nain a herhmi tam ngai te a bau rih.
“Mah cucu hmainor in mi thongh hi a ti kho ngai naih rem taktak in thongh ningcang tibantuk hi a thei tuk rih loh. Tlaih lei siseh paih lei zong in siseh ka dirhmun hi a ttha deuh in ka thei i cuticun thonghpi dingah timhtuahnak ka ngei. A thok ahcun Tial Thang tha ba dingin ka chuih, ka thongh hmasa lai i cu hnuah tengh le reh chih in teinak cu ka co hrimhrim lai” tiah a chim ve.
Song Min Jong (kum 29, pe 5 le letmah 8) cu MMA ah mi 19 he aa thawng cang i puai 11 cu teinak a hmu in puai 8 a rak sung. One Championship bak ah hin cun minung 3 lawng he aa thong rih i puai 2 teinak le puai 1 sungin cazin ah chiah a si. Aa thongh hnuhnung bik cu 2020, November 13 ah a si i a rak sung. Cu hnu ah tutan hi a puai hmasabik ding cu a si.
Salai Tial Thang (kum 28, pe 5 le letmah 8) cu MMA ah mi 9 he a rak i thawng cang i One Championship ah minung 3 he lawng aa thawng rih i teinak a hmu dih. Cambodia thonghthiam Rin Saroth cu kum 2019 kum ah khan a rak tei i S.Korea thonghthiam Woon Gyenom Kum cu 2019 kum, December thla ah khan a rak tei tthan, a hnungbik cu Indonesia thongthiam Paul Lumini a si i 2021 February 5 round dih tiang kal loin round 2 nak ah KO in a rak tei.
One Championship Featherweight rihnak dirhmun ah aa tthua ding an si i a teitu caah puai ttha taktak timhtuah ding an si pinah Champion tiang tlai kho dingin an dirhmun a ttha chin lengmang lai. Tutan ah One Championship puai 6 a um lai i Salai Tial Thang le Song Min Jong cu puai 2 nak ah aa thua ding an si. Facebook ah Live zongin zohkhawh a si te lai. Myanmar um mi caah cun Skynet ah zoh khawh a si lai.
