Related Articles
Kawl ralhraang nih nawlngeihnak an laak mi doh in mino a tthihruaitu Salai Ngun San Aung cu ram le miphun caah ti’n CDF ralkap dirhmun ah a hung dir.
Tam kan chim ti lai lo, a mah facebook Timeline bakah hi ti bak in Laimi Warning a kan pek a ti mi cu ” Warning! CDF ralkap hi nan fale kan si pek nan naule kan si pek nan hawile kan si pek na DL kan si pek ah khoika na um? Khoika in na rat? Khoika na kal lai ti kan hal lengmang hlah uh.
Voi tamtuk ka chim cang! Nan hngalh a herhmi cu kan in chimh ko hna lai. Kan umnak kan kalnak kan ratnak nan hngalh cu zeiah nan i tuah lai? Nan him maw nan dam maw ti a za ko. Cun mi cheukhat…Nan duh tik paoh nan i manh tik paoh, nan zurit lung hna in messenger hna in mi call nan hmang.
Nan kan siaherh nan kan ruah ruangah si kan ilawm ko…Asinain a caan ah kha kha kan caah harnak a si kho. Ralrin zia thiam hna usih!” tiah a mah facebook cahmai bak ahcun a rak langhter ko.
A dang Reltthan: PDF pawl riahcaw a bawmh hna ruang ah Social Affairs Minister nupi kan tlaih, tiah SAC nih chim August 27, Yangon Ramthen Social Affairs Minister U Naing Linn nupi Daw Khin Sandar Win cu PDF pawl riahcaw asiloah tirawl pekchanhnak he pehtlai in kan tlaih mi a si, tiah SAC nih an thanh.
Daw Khin Sandar Win hi a pasal U Naing Lin Insein Thonginn ah SAC nih an hren kar August 25 ah an tlaih hi a si i an tlaihnak hmun zong Insein thonginn pawng ah a si. SAC nih an thanh ning ah, “NUG he pehtlaihnak a ngei i CDM a tuah mi hna tangka in siseh, PDF pawl riahcaw, tangka le hriamnaam cawknak tibantuk a bawmtu hna kan tlaih hna i Daw Khin Sandar Win zong Insein thonginn pawng Hlaingmyit lam cung ah kan tlaih,” tiah an thanh.
Nizaan naite ah SAC phu nih NLD party chungtel minung 30 hrawng an tlaih hna hnu August 25 ah Daw Khin Sandar Win zong an tlaih ve hi a si, tiah BBC nih a langhter. Credit: The Hakha Times
