Related Articles
Nihin ah a cang mi Tamu khua kahdohnak ah ralhrang lei in minung 17 hrawng an thi Sagaing ramthen Tamu khua nihin zinglei ah kahdohnak a chuak, ralhrang phu lei in minung 17 hrawng an thi, PDF lei in minung pakhat a nunnak a liam, minung pahnih nih hliam an tuar tiah PDF-Tamu in rianngei pakhat nih a chim.
Tamu khualeng ah ummi University of Technology hmun chungah umhmun khuarmi ralhrang phu hna cu Tamu PDF phu nih nihin August 23, zinglei suimilam 5:30 hrawng ah an kah hna caah kaphnih kar kahdohnak a chuak. “Nihin zinglei suimilam 9:00 hrawng tiang an i kap, ralhrang phu lei in a thi mi an um cu a fiang, Tamu sizung ah ralhrang phu hna sivang in an um” tiah Tamu-PDF in rianngei pakhat nih a chim.
August 22 ni zong ah Tamu khua, Myomah no.12 sang Nanphalung(နန္းဖာလုံ) အထက (ခြဲ) sianginn ah umhmun khuarmi ralhrang phu hna cu mipi vengtu phu Tamu-PDF hna nih bomb in an doh hna caah ralhrang phu lei in minung 2 an thi, hliamtuar mi zong an um.
Sagaing ramthen,Tamu khua cu ralhrang phu nih hriamhmang in doh mi hna chung in a hramthok an si. April thla chung ah a cang mi kahdohnak chungah khuami mino hna nih hramhram nawlngeihnak la tu ralhrang phu hna cu kham in kahdohnak ah ralhrang phu lei in minung 18 an rak thi. Credit: The Chin Post
A Dang Reltthan: Afghan lei nawlngeitu hna nih mino te a si mi pumpululh celhthiam cu Kabul airport i US ralkap vawlawng ai awk nak in a tla i a thi beh tiah fianternak an tuah cang.
Zaki Anwari, kum 19, hi Afghanistan ram caah Youth Team in pumhpululh a chuih mi a si. Zeitik caan ah dah a thih ti belte fiang in theih a si rih lo. Kan theih cio bantukin Taliban Tapung nih cun Afghan rampi cu an tlaih khawh cang. Cu lio ah Kabul airport ah cun ramdang lei vanlawng, an ram mi hna laak dingin a hawn zuangmi, hna cu heh tiah minung tam taktak nih cun kulh le zulh cio a si.
Hmanthlak le video kenkip zongah an tlik lio le vanlawng an dawi lio hna cu hmuh cio a si. US ralkap vanlawng zong zuan aa timh cuahmah lio ahcun tthenkhat hna nih vanlawng ah an i thlai le an i awk lio zong hmuh khawh a si. Cutluk cun rampi cu chuahtak an rak duh cio ti a lang. Tualchung media nih a langhter ning ahcun a tlawm bik minung 2 paoh vanlawng in a tla i a thi mi an um tiah a chim. US air force lei zong nih Qatar kan phaak tiangah vanlawng kee ah a awk mi an um rih tiah an langhter ve.
Afghanistan Physical Education le Sports lei in General Directorate a si mi nih facebook zongah Mr Anwari thlahnak ca zong a langhter ve. A langhter ning cu tihin a si ” Vanram ah i din hram seh, a chungkhar, a hawile le lentecelh pi a hawile hna ca zongah Pathian sinah thla ka cam” ti’n a langhter ning cu a si.
US ralkap 4,500 hrawng nih hin a tu hi chikhat caan cu Kabul(Afghan Khualipi) ah a um mi Karzai International Airport cu an tlaih rih. Taliban tapung hna nih khual tlawng in Afghan ah a ra mi documents a ngei lo mi paoh cu an kham dih hna i documents tlamtling a ngeimi zong an buai ngaingai tiah theih a si. Ref: BBC
