Related Articles
Tial Thang Zathang nih Laipaih a ka zuamcawhtu an um ahcun timhcia ka si tiah a chim 2021 August 21 ah USA ram i tuah ding mi Vaurawng CDF Laipaih ah One Championship MMA Vuak zuamnak ah aa tel mi Tial Thang Zathang nih, “A ka zuamcawh tuding an um a si cun cohlan ding in ready ka si ko,” tiah a chim.
Tial Thang Zathang nih, “Ram le miphun khuatlang ca ah an ti tik ah kaa pai ve lai ka ti ko hih. Hi paih bual ah zuamcawhtu ka ngeih a si cun a ka zuamcawhtu he kaa pai ko lai. Zuamcawhtu ka ngeih lo zong ah Palaivuang paih (Middle Weight, Papi paih (Heavy Weight) le Pate paih (Light Weight) ah kaa pai thiamthiam ko lai. Zatlang paih zong ah kaa pai thiamthiam ko lai,” tiah The Hakha Post ah a chim.
Tial Thang Zathang hi vawleipi theih in One Championship MMA Vuak Zuamnak ah voi thum tiang teinak a hmu cang mi a si. August thla chung ah voi khat aa phomh than lai tiah theih a si. Cun, “A ka zuamcawhtu an um a si cun Dollar tam deuh a hau lai. Kei cu kaa ready ko,” tiah a chimchap.
A Dang Reltthan: Chin National Front/Army (CNF/A) le a ṭengnge Chinland Defense Force (CDF) nih July 19 in 31 kar ah Kawl Ralkap 26 leng an thah hna.
CNA (CNF) le CDF-Matupi i bawm in July 30 ah Matupi-Mindat lam mengtung 73 ah Kawl Ralkap an kah hna i Kawl Ralkap bawi Buhmuci Zaw Zaw Soe telh in a minung 10 an thah hna. “Kanmah CDF-Matupi lei in minung 3; Salai Kung Thang, Salai Ha Tun le Salai Thang Chin Sang nih ram le miphun caah an nunnak an pek,” tiah CDF nih a thanh.
“Ralhrang Kawl Ralkap nih ramri lonh in an kan luhhnawh paoh ahcun fak taktak in kan kah peng hna lai,” ati. July 27 ah Kanpetlet khua um Kawl Ralkap pawl cu Makuiimnu sakhan lei ah an ra. Mindat le Kanpetlet kar um Khanan khuate ah CDF Mindat le Kanpetlet nih an kah hna i 10 an thah hna. CDF lei hliam tongmi an um lo.
July 29 ah Mindat-Matupi lam mengtung 74 ah CNF, CDF-Mindat le CDF-Matupi nih Kawl Ralkap an kah hna. Zaan 7pm in 12am fai tiang an i kap. Kawl Ralkap 4 an thah hna i tampi an hliamh hna. CDF lei in minung 3 nih ram le miphun caah an nunnak an pek, pakhat hliam tong. July 24 ah Mindat ah CDF-Mindat le Kawl Ralkap an i kap. Kawl Ralkap 2 an thah hna i tampi an hliam hna.
Mah ni cu Kawl Ralkap hnulei ah an kir. CDF-Mindat nih an dawi hna i Shwetu khuate tiang an va dawi hna. July 25 ah Kawl Ralkap bawmtu ceilak an hung phan i a kir cangmi pawl he cun Mindat ah an rak kai ṭhan. A va dawitu CDF-Mindat he Dingdi khuate pawngah an i tong hna i an i kap. Kawl Ralkap tampi hliam an tong. CDF-Mindat ralkap 4 nih ram le miphun caah an nunnak an pek.
July 24 ah Matupi in a hung ṭummi Kawl Ralkap le CNF + CDF-Mindat + Matupi an i kap hna. Kawl Ralkap tampi hliam an tong. CDF-Mindat in U Chain Thang, CDF-Matupi in Zaw Myint Phe, Tun Shwe le CNF in Runno Phun Thang Hnin nih ram le miphun caah an nunnak an pek.
July 19 thok in Kawl Ralkap le CDF-Mindat kar kah ngol lungtlinnak a rawk i Kawl Ralkap pawl cu CDF-Mindat hmunhma lei ah an lut thluahmah. Mah ruangah voi tam taktak an i kap. Kawl Ralkap pawl cu Shwe Aung Tha khuate in an ra i Matupi lei ah an kai thluahmah. Mah pinah Kawlrawn lei in bawmtu ralkap tampi an ra.
July 21 zingka ah Shwetu khuate ah Kawl Ralkap le CDF-Mindat an i kap. Kawl Ralkap tampi hliam an tong i hnu lei an kir. Chun hnu ah Pingtui khuate ah an hung chuak i CDF-Mindat nih an kah hna i an zaam ṭhan. Zaan ahcun Yanchaung khuate ah an lut i phungki sianginn ah an riak.
July 22 zingka ah Yanchaung khuate ah an i kap. Kawl Ralkap lei in a thimi le hliam tongmi an um len. CDF-Mindat in Salai Hung Om nih ram le miphun caah a nunnak pek. Mah lio cun CDF-Mindat ralkap phu dang nih Makuiimnu khuapi palik le ralkap sakhan an kah i an lak. Sakhan i Buci pakhat cu CDM a lut.
July 23 ah Makuiimnu khuapi ralkap sakhan bawi pakhat le a kuttang ralkap 4 cu CDF-Mindat nih sakhan in an chuahter hna. Makuiimnu khuapi um ralkap le palik sakhan cu a pahnih ningin CDF-Mindat nih an lak i hriamnam zong ceilak an lak. Ref: The Chin Express
