Related Articles
Taanghra kai lio mi siangngakchia minung 3 an tlaih hna i an hrem hna. Pyi Myo ah kum 17 a si mi taanghra kai lio mi cu ralkap lei nih August 3 zaanlai ah an tlaih hna tiah khua mi nih an chim.
Pyi Myo ah sianginn kai lio mi Mg Thu Way Win le Chain Myah, Mg That Myat hna cu an mah um nak inn lei sang panh in an kal lio ah ralkap pawl nih zaan suimilam 11 hrawngah an tlaih hna tiah theih a si. Mileng cazin check bantukin dalan pawl i thawng pek ning in an rak kawl hna i an tlaih mi pawl cu an lu kuai lak in an velh hna tiah sang mi nih an chim.
Pyi Myo sianginn i a kai lio mi sianginn hmanh ah zoh thla ngai mi siangngakchia hruaitu an si i ralkap pawl nih hin tlaih ding cazin ah an chuah cang mi hna an si. An mah pa 3 zong hi an i thuh i an rak chuah lei ah an tlaih mi hna si. Chain Myah te inn minung cazin an check hna zaan ah kan hmuh hna tiah an au i ralkap pawl an auh hna zong hi an theih. Mah khan Chain Myah zong cu bia an hal len i That Myat te inn zongah an va kal i an tlaih ve hna tiah an chim.
February thla 1 ralkap nih uk nak an lak hnu in Pyi Myo siahngak chia hruai tu minung 6 an tleih cg hna tiah thawng theih asi. Source: Mizzama
A Dang Relchih: Jesuh hi Comminist dirhtu a rak si! Norway cozah le parliament thimnak cu ni hra lawng a van i duh. Myanmar uknak buainak ruang ah cu hlan nakin tu kum hi debate pawl ka zuldawi kho hna lo, nain a biapibik i an buaipimi cu khuati thlennak (climate change), khuasaktintuk (mirum le siifak i dan tukning), nauhrawh kong le vawleipi he i pehtlaih ning (ralzam, khuati, ral le chawleh) hna hi an si ti cu nitin thawngca biatlaang rel in a vun i thei ngai. Hi thimnak he pehtlai in biakhiahnak ka tuah kho rih lo. Ka buaipimi hi a biapi in an buaipi ciomi kong hi an si ve caah ka ruahmi cu a um.
Norway milu zat hi ka phak hnu 2012 lawng in million panga tling, cun atu hi mil 6 kan tling deng cang, Kawrona chung ah nau thar tamtuk (record) an chuak fawn. Mah ah cun pawlitikkal parti pakua (rampi huap parti) le State huap parti pasarih an um. Parti nei lo, pakluai (independent) zong an um. Norway cu Democracy phung a hmangmi ram a si le parti cu ram milu rup lo in a tam caah ralpi 2.nk a dih hnu in parti pakhat i cozah a tlai khomi hi Labour Parti lawng an si, cu lo paoh cu parti pathum in pali an i fonh i cozah an tlaih. Tu kum zong hi parti pathum leng i fonh hauh rih dawh in an ruah. [Norway kong tlawmpal theihter sawh.]
2007 in dirhmi Red Party timi a um i an hrampi cu Communist a si. Kum hra hnu ah Parliament ah minung pakhat te a lut kho le a luh ni hnihnak ah Norway tuanbia i a voikhatnak Red (communist) biatung nunter a rak si. 2010 lio tein mah parti hi ka lung a rak um ngai caah ka zulhdawi pah tawn hna. Tu kum hi a tlawmbik minung pahnih-thum cu parliament ah an lut kho lai tiah an ruah i Norway media nganmi cheukhat zong ah an vun larning an langhter ngaimi an si.
Communi/(st/sm) kan ti tik paoh ahhin Tuluk, North Korea le Cuba tibantuk an cuang. Kan innka Vietnam hmanh khi ralkap uknak ruang ah an kong kan thei tuk lo. Cun Kawlram zong ah Aung San te pawl kha Communist an rak si hmasa. A hnu socialist (communist he ai dang tuk lo) ah a vun i thleng. Hi kan theihmi Communism ruang ah communist hi kan rak huat asiloah kan uar cio hna lo. Communist ruahnak (ideology) hi tuak lo in a thazaang tthawngmi a siloah parti/phu khat uknak nih a kalpimi lawng kan hmuhmi a si. Mah hna pawl hi siangpahrang asiloah ralkap uknak bantuk an si, parti pakhat lawng uknak.
Cu tikah Democracy uk phung tang i communist parti nih a kalpi ning hi ka lung a rak luh khunnak a si. A fawinak in Communism cu; khuaruahning, zatlaang, politik le khuasaktintuk ruahning (ideology) phunkhat a si le Karl Marx le Friedrich Engels nih an chuahpimi theory a si. Mibu zatlang khuasaknak (society) ah, mirum, a laiva ti le siifak i um awk a si lo, cun cu zatlaang nih cun thil an i hrawm dih, bawiphun uknak le sal bantuk in rianttuannak vialte chung in luat dih ding ti a si. Mirum timi vawlei ngeimi, pupa ro ngeimi pawl nih an huat tuk hna communist cu. I tluknak, zapi huap covo i hrawm ti hna a si i rianttuan ning cio in zuun a si, ti te hna a si. Mah hi Karl Marx chuahpimi theory/ideology an ti nain amah hlan kum thong hnih deng ah a rak um cang.
Jesuh Communist a si timi hi nai hrawng Bible ka rel pah tikah ka vun ruat ngaingai. Tlawmpal internet ah ka van hlathlai i Jesuh Communist a si, an tinak tete pro-communist an si lai dah, tlawmpal ka van hmuh ve. USA i minthang “the United States Pledge of Allegiance” timi ttialtu Baptist minister Francis Bellamy cu Jesuh hi Socialist a si a rak ti caah an thah. Atu zong mah ti ca ka vun ttial tikah hin ruah lopi in na tlu kho men, nai ngal kho men.
Bible i Thawngttha pali i tlangcung cawnpiaknak ah a lang khun i Lamkaltu kan rel ahcun Khrihfa hmasa hna nunning ah tampi a lang. Bible nih a ttuan lomi cu ei lo in um ko seh a timi te hna, Pathian hmai ah mirum le siifak kan um lo i kan i tluk dih ning te hna, Khrifa hmasa an ngeihchiah an i hrawm dih ning te hna, Jesuh nih mirum tlangval pa a ngeihchiah a zuarter dih i siifak pek a fialning te hna le Vancung pennak kong ah mirum hna kong a chimmi pawl hi Communist ruahnak nih hrampi an rak si tiah ka ruah len. Siifak hna hawikom a sining vialte ruah tikah Jesuh hi Communist a si ko tiah ruah lo awk a ttha lo.
Norway i Red parti nih biatak tein an aupimi cu Norway ah mirum le siifak kan i thlau tuk cang, Upper-class, Middle le Lower-class ti um lo in zapi nih i hrawm khawhmi tamdeuh neih ding, mah ti a si ahcun atu kan buaipi tukmi khuati thlennak (climate change) hi kan rengh khawh lai (mirum pawl nih duh paoh in zinan le sehzung an cawlter kho lai lo). Nauhrawh kong, nau hi zarh 22 a si tiang hrawh khawh ding a onhmi dah ti lo an program/ kalpimi ka lungtling ngai. Ralzam zong an duh, assylum zong a onh, Norway ah ralzam siseh a hung pemmi hna thlanglamh lo le thleidan lo ding a aupimi a si.
Zeidang um len. Biakam thar i Thawngttha pali le Lamkaltu 4 le 5 ah lang khun, vun rel tthan ve te law, Communism an kalpimi he ai lo ngai na ti ko lai. Vancung pennak kong a chimmi pawl zoh tikah a lo khun. Asinain Communist cu Democracy ning in party tampi cozah i cuhnak si loin party pakhat lawng in uknak cu duhsah duhsah in ralkap thazang (dictatorship) in uknak ah a tla lengmang. Cucu Pathian pakhat lawnglawng a ummi a si ko. Credit: Si Bawimang Lian
