Related Articles
Ralkap lei an hraan tuk ruangah Kalay le Kankaw lam kal a ngah ti lo tiah PDF-Kalay nih thawng an thanh. Tuni September 3 zing lei ah ralkap hriamnam ttha bak mi pawl he Kalay Myo Nay ah hriam nam tlai pawl cu a ruang um lo in an kah hna hlei ah inn pawl zong an hrawh piak hna.
Cun ralkap lei nih Ye Shin khua lei ah zinglei suimilam 9 hrawngah PDF-Kalay pawl an kah hna i zaan lei suimilam 7 le cheu tiang kahdohnak a chuak ralkap lei an hriamnam hi a ttha bak mi pawl an si i a ruang um lo in an kah thluahmah hna khua mi pawl an inn zong an khangh thluahmah. Zaaanlei suimilam 7 tluk hrawngah khan Ye Shin te mi khua i khua mi pawl inn cu an khangh tiah PDF-Kalay Facebook cahmai ah kan hmuh khawh.
Zaan lei suimilam 7 tiang kahdohnak a chuak mi ah ralkap lei zong a thi mi an um lai tiah ruah a si nain fianh a si rih lo ralkap pawl nih hriamnam an hman mi ruangah PDF Kalay minung 2 hliam hma an tuar tiah theih a si. Tu lio kahdohnak a chuak mi ruangah Kalay le Kan Kaw kar motor lam vialte kan phih dih kal ngah ti lo, a kal mi an um i pakhat khat an can sual ahcun PDF-Kalay nih ttuanvo an la lai lo tiah thawngthanhnak an tuah cang.
A Dang Reltthan: USA um Chinpa pakhat wanted a si hoi! Ramthumnak ah Chinmi singkhat tluk kan phan cang,fimthiamnak sang ngeimi zong tampi kan um lio ah a rak sualmi zong an um ve.Mah hi vawlei nih a chuahpi a rak si ko rua. Nain kannih Chin/Laimi chungin mah bantuk kan um cu sia arem lo ngaingai. Nizan tihni ah USA ram Collin County Sheriff Office thanhmi ah ngakchia kum 13 meithal kaptu an si tiah lunghrin mi kanmah Chinmi pa pahnih an tlaih hna thawng theih cu kan lau,kan ngaihchia cio.
Tutan ka tarmi hi cu,Chin khualipi bantuk ah ruahmi Indiana polis khua nawlngeitu nih hmuhnak pohah tlaih ding(wanted) an thanhmi ah kanmah Chinmi pa pakhat aa tel rihmi ruah tikah lung a nuam kho hrim lo.Fale sualmi ngeih tikah nulepa rumro kha mawhpuh thlu awk an tthat ve lonak a um. A ruang cu cawnpiak chimhrin peng ko nain aa remh kho loin sual lam a zulmi an rak um tawn ve caah si.
Abik in: Ramthumnak kan um tikah apakhatnak ah fale kha felfai tein zohkhenh kha nulepa rian cu si. Mizeimaw cu Tangka lawng ruat in fale khur-awmh lo kan um len tikha kan Pastors te hna hmurka in a chuak pah tawn ko. Nuva in company ah rian kan tuan,kan nunsia a rem,Innlo ttha le motor tha kan cawk pinah Chinram chungkhat kan hei bawmhchanh khawh ko hna,bank ah tangka tampi kan ikhon/chiah ko lai,nain na fa suallam a zulh I wanted a si cangah cun mah na ngeihchiah thilri chawva nih khan an hnem kho ti lo.
Pabik riantuan sile nu nih fale zohkhenh ding,Nubik riantuan le pabik nih fale zohkhenh bak ding si. Nu le va in Fale zohkhenh loin rian ah kaltak an si,fale cu sml 9/10 chung an duh poh in khua an sa,zeitin fale an cawlcangh kan thei ti lo.Misual le mifel an komh zong kan thei ti lo caah fale caah cun suallam kaupi aa hung cang.
Cucaah ramthumnak ummi nih theih dingmi cu,fale an cutzat/lungfim cikcek hlan cu,nuva in riantuan tak hna ding a silo, pakhat poh nihcun khur-awmh hrimhrim ding an si,Sianginn an kainak zongah va kalin an saya/mah te kha na fa konglam na va hal pah hau/Nitling in sianginn a kai tawn maw/siangin kai loin a rol ziar maw ti bantuk tiang khan na fa kainak sianginn ah na va hlat pah ding si. Credit: Chinland 7 Post
