Related Articles
CDF-Mindat Chungin Pasalttha Pakhat Nih A Thih Hlan Teah Bia A Roh Taakmi Hna. Kei cu Federal Democracy hmuh khawhnak ding caah Military Council pawl ka doh hna nak ah ka thih sual a si zong le mah bia hi Mindat-Township i khuabawi le ka rian ttuanpi mipi ralkap hna theih dingin bia a roh ta mi hna a si.
1. Nan ka vui tik Ni ah khin zeibantuk sa hmanh ei lo ding le nunnak a ngei mi paohpaoh nan that hna lai lo. Mipi a hrem i a thattu Military council ralkap pawl ti dah lo cu nunnak a ngeimi paohpaoh nan that hna lai lo.
2. Nan ka vui ni caan ah meithal voikhat hmanh nan hmet puak lai lo. Meithal kuan dihlak hi kan ral a si mi ralhraang sin ah phaan dih seh, nan i kahnak meithal kuan hi mipi humhimnak le Military Council pawl kahnak caah nan hman lai.
3. Nan ka vui tikah a hohmanh nan ttap lai lo, Thihnak hmunhma ah a thi mi ka si ruangah a hohmanh nan ttap lai lo. Thlahnak hla zong nan sa lai lo i hmai lei caan ah zeitin dah khua kan ruah lai le hma kan laak lai timi lawng nan i tim lai.
4. Hi ka thihnak ah hin a hohmanh mawchiat ding an um lo. Hi Revolution hi keimah duhnak in doh ka si ruangah hohmanh mawhchiat ding an si lai lo. Cu ruangah chungkhar a tuarmi pawl mawchiat ding timi a um awk a si lo.
5. A dongh tiangin kahdohnak hi kal chinchin seh ti ka duh i ruahnak tenau/bi ngei lo in le ruahchannak ngei bu tein Federal Democracy tu dirh a si khawhnak ding caah. Salai Khu Pa Ling, Khuachung Battalion, CDF-Mindat. Laaknak: Zihmuhtlang Auaw
A Dang Reltthan: Salai Ngun San Aung, Tutan dothlennak ah Laimi nih kan zohthla bikmi Salai Ngun San Aung nih atu lio ngol thei loin Pu Zobawi a thangchiat lengmangmi hmuh tikah lung a tha lo, kan ral taktak kan philh sual maw ti awk in a um.
Pu Zobawi zong hi amah ti khawh tawk tein kum 20 leng ralkap cozah a rak doh ve i Chinram NLD hruaitu tiang a phanmi a si. Ralkap nih tutan tlaih in caan sau ngai hrem hmasami zong ah ai tel ve. Atu belte a kum upa ve cang caah dai tein a um khi a si.
Amah tein a um ko mi minung pakhat kha CDF hruaitu pakhat nih khiti a thangchiat lengmang tikah a ngaihchiami an tampi kho. CDF ralkap lila ah siseh, CDF caah biatak tein fund a kawltu lak zong ah Pu Zobawi a tefa an tampi timi philh lo a tha. Zobawi khi CDF nan ral a si bak lo, amah doh caan a si bak lo tiah ka ruah. Nan ral aho dah asi timi philh hram hlah u.
Pu Zobawi hi kum no tein businessman a cang, atu inn asakmi khi amah innhmun a si. Hakha innman a fah biknak hmun ah keimah ka chuah hlan ah inn a rak ngei cang. A tthing tuk cang caah atu a thar in a sak than khi a si. Hluttaw rian a tuan pah in tlorthing, grape dum, mansang thing cinnak dum tibantuk ekah tam taktak a tuah chih. Bungzung pawng ah kung 10,000 leng a cin.
Kungkhat ah tingkhat man a si i kum 4 hnu zuar ahcun ting 10,000 leng ka ngah lai tiah media interview ah a rak chim bal. Zephai zong ah tlorthing tam taktak a cin rih. Culawng hlah, US le Norway ah a fale an um. Hakha ah inn sak cu Laimi tampi nih tuah khawh ciomi khi a si ko. Zobawi a sakmi inn khi sui-inn asi hraw lo.
Salai Ngun San Aung, ram caah nai pumpekmi cung ah kan in upat. Kan ral taktak na doh caah kan i lawm. Nain, kan miphun caah tihnung a si lem lomi minung pakhat kha 2015 in tutiang ngol thei loin na dohmi cu kan ngol piak ko cang tiah kan nawl. Credit: Salai Lungthlitum
