Related Articles
Chin National Front, Headquarter lei in cathanh: Ralhrang bu nih thahrum in Burma ram uknak an lak hnu an tuahsernak vialte nih kan Chinland le Chin miphun cu lakhruak dirhmun ah a kan phanhpi. Miphun humhimnak caah tiin miphun dawtu nusal pasal ttha hna nih Chinland hmun kip ah hriamtlaih in raldoh hram thok a si cang. Miphun chanhchuahnak caah thisen sung zong a luan cang bantukin a tang rihmi rianhma pehzulh ding ah Chin miphun ttuanvo kan ngei.
Chin miphun nih miphun covo tlamtling in kan hmuhnak ding rian hi miphun dang nih ttuanvo an kan lakpiak lai lo caah kanmah tein a hramthok in a dongh tiang ttuanvo kan lak a hau. Cu ttuanvo cu kan dihlak in kan ikhinh a herh. Ahohmanh bau lo tein kan ttan tti dih lawnglawng ah kan thazaang kan fun khawh lai i kan tthawng kho lai. Kan itel dih khawhnak ding caah kan dihlak nih mah pumpak le chungkhar ttuanvo a si timi lungput he ttan kan lak cio ding hi a biapi hringhran ko.
2021 March in Emergency National Security Fund (ENSF) kan thok i Chin miphun caah tuanbia thar kan ttial. Sihmanhsehlaw cu rian cu a dih rih lo caah chuaklak in pehzulh ding ttuanvo kan ngei. Cu rian pehzulhnak ding caah ram kip um Chin miphun dihlak, rian a ttuanmi paoh nih thla khat ah US $100 nak tlawm loin miphun humhimnak thawhvo (National Security Fund) caah thazang chuah cio ding ah kan in sawm hna. Rian a ttuan lomi zong nih a si khawh chung in thazang chuah cio ding a si lai. 2021 October ah thok ding le thla ruk hnu 2022 April ah zohtthannak tuah ding in timhtuahnnak ngeih a si caah Chin miphun tuanbia ah a biapi tukmi miphun humhimnak rian ah na tel ve ding ah kan in sawm.
Hi rianttuannak cu CNF Regional Committee hna nih mahle ram le sining zohchih in ttuanvo lak ding a si lai caah miphun dawtu dihlak mahle ram Regional Committee le Local Committee ttuanvo ngeitu hna he hmun khat ah kutsih in rianttuan tti cio ding ah upatnak he kan in sawm hna. Miphun Rian Ah.
A Dang Reltthan: Ralkap lei nih Thantlang khua thil a cangmi kongah chimfiannak an ngei ve. Chin ramkulh Thantlang khuapi chung ikahdohnak pical kongkau ah ralhraang lei in chimfiannak an ngei ve, mipi um nak khua chungah CDF nih mipi hi hriamnam bantukin an hman hna i an kan doh caah tubantuk chiatnak a can hi a si.
Ralkap aiawh in spokeperson Zaw Min Tun nih “Thantlang ah ralkap nih inn an khangh i Pastor Cung Biak Hum an kahthah tiah thawngpang an thehdarhmi cu kan rak hmuh ve ko. Thil dik/hmaan cu chim ka duh ve. September 18, zaanlei suimilam 4 hrawngah ralkap pawl duty an ngeih bantukin Thantlang khua chungah an vaak i vengnak an phak le cangka CDF minung 100 hrawng nih an rak kah hna. Mah cu ruangah khua chung ahcun khat le khat kahdohnak a chuak. Kahdohnak ruangah inn 20 a kaang, phungki inn zong a kaang chih. Inn kanghnak lei panh in veng 2 nak i um Pastor Cung Biak Hum cu zaanlei suimilam 6 hrawngah a pok, Veng 2 nak a phaak hlanah a thi. Zaanlei suimilam 4 hrawngin kahdohnak kan thok i zaan suimilam 8:20 tiang kan doh hna.
Ka chim duhmi cu CDF pawl nih khua chung i um mipi hi humhimnak ah hmang in ralkap hi an doh hna. Pastor a thihnak kongkau ah Chin Christian pawlkomhnak le Kachin Baptist pawlkomhnak in ca an chuahmi zong kan rak hmuh. Mah thil a canmi kongah hin ralkap nan kan puh, biaknak inn hna zong a chiatchuahtu ah nan kan chiah. Pastor a thihnak kong ahcun khat le khat kahdohnak lio i a cangmi a si. NUG le CRPH hi Myanmar ram buaitertu dankalh pawlkomh an si i Myanmar ram buai chinchin dingin September 7 ah mipi an forh hna khah.
Cu hnuah Chin ramkulh chung zongah buainak a tam i, Lungler ralkap sakhaan zong minung 400 hrawng nih an rak doh cang. Biaknak lei pawlkomh phu i cachuahmi kan zoh tikah thil ttha lo ngaingai a si i buainak pical chuahter kho tu an si. Zeicatiah, Myanmar ah zeibantuk biaknak hmanh kham a si lo timi hi phunghram ah a um mi a si. Kan ram chungah biaknak phunphun a um i, an cachuahmi zoh tikah biaknak in khat le khat buaiter an kan timh tiah ka ruah. Curuangah an cachuahmi hi a herh lo tukmi a si tiah ka ruah.
Kan lubik Min Aung Hlaing zong rampi a tthithruai hlan in biaknak lei in hruaitu dihlak tonnak le chawnhbiaknak a ngeih hna i, bawmhnak tibantuk pek in caan a rak hmang hmasa. Min Aung Hlaing nih caan a laak hnuah biaknak le miphun thleidannak a ngei lo i biaknak ca zongah sikhawh chungin bawmhnak a pe camcin mi a si. Christmas fatin ralbawi Min Aung Hlaing hi Yangon Bothathong i Biakinn ah a kal pengmi pa zong a si. Mah cucu ralbawi Min Aung Hlaing i chim tawnmi nolh tthan ka duh.
Myanmar ram ah Christian hi 100 chungin 3.2 million lawng hi a um mmi an si. Ram chung i biaknak mipum tambik hi buddhist, Christian, Muslim, Hindu le biaknak dang pawl cu kum fatin in rampi tthanchonak caah kar hlaang tti zungzalmi kan rak si hna. Phung le daan nih a sian bangin Myanmar ram ah Biaknak thleidannak a um lo i, zeibantuk hmanh nih biaknak hmangin mipi buaiter lo dingah kan nawl hna tiah Min Aung Hlaing nih a rak chim bal cang.
NUG le CRPH dirpitu pawl nih tlangcungmi lakah buainak um dingin biaknak ah buainak um dingin thawngpang an chuah lengmang rih ko lai. Cubantuk caan lio ah mipi kan kan lungfim a herh tuk tiah kan cah hna. Christian pawlkomh i cachuahmi zoh tikah Christian dehcawh ding tibantuk a phaangmi an lo nain, cachuah bangin zeihmanh phaan ding a um tiah ka chim duhmi a si” tiah a chim.
