Related Articles
Chin Ramkulh Kanpetlet Ah Ralhraang Nih Thahmi Ruak 3 An Char. Chin ramkulh Kanpetlet khuapi in meng 3 tluk hla vanlawng dinhnak hmun tuah/siam dingin vawlei an cawhnak hmun ah ralkap nih thahmi ralzaam ruak 3 an char.
Ruak 3 an charmi hi CDF le ralhraang kahdohnak ruangah Chin ramkulh le Makui karlak Saw ramri A Ngia Katin khua ah ralzaam in um mi an si. Ralzaam lakin 9 cu Kanpetlet peng Panlawng khua i an thilri tthenkhat la dingin an kal cu lamlai ah ralhraang pawl he an i tong i ralkap nih mi 3 an kahthah hnuah kum 13 tleirawl telh in midang zong an tlaih chih hna.
Mah hi thawngpang kongah CDF-Kanpetlet hruaitu nih cun “Ralhraang thahmi pawl hi pa 3 an si. Pakhat cu Kyaw Taw khuami a si i a dang pahnih cu Palawng khuami an si. Pahnih cu mino an si i pakhat cu kum 60 tluk putar a si. An bike hmanmi cu ralhraang pawl nih tiva an hlonh i an khangh dih” tiah a chim.
September 25 le 26 ah Kanpetlet CDF le ralhraang cu linsa ngai in an rak i do i kahdohnak ah ralhraang lei in a thi mi 11 le hliamhma tuar tam taktak an rak um. Kanpetlet CDF lei in minung 2 hliamtuar an um nain cu tluk faak a si lo tiah CDF-Kanpetlet hruaitu nih cun media ah a chimnak a ngei.
