Pu Htet Ni(CNF): NUG Nih Thanhmi D-Day Hi CNF I Kan Dirhmun A Si Ve Ko

NUG nih Sept 7 ah D-Day a thanhmi he pehtlai in mipi vengtu ralkapbu (PDF) hna nih cun lunglawm taktak in an cohlan. Asinain US le UK cozah nih cun kan cohlang lo timi bia cu an chim lo nain kahdohnak in buainak tuahremh ding cu kan cohlang lo tiah an chim. A sullam cu NUG nih D-Day a thanhmi hi kan cohlang lo, ti khi a si ko.

D-Day kongah tlangcung hriamtlaibu tam deuh an dai rih. KIA ralbawi Gun Maw nih cun D-Day thanh a si lecangka in a social media ah Joshua 3:5 “Cun Joshua nih mi zapi hna cu Bawipa nih thaizing ah nan lakah khuaruahhar a tuah lai caah i thianh tuah u, tiah a ti hna” timi Baibal caang a tar colh. Hinih hin KIA nih D-Day an cohlan ko ti a langhter ngai ko. KNU Dooplaya District chairman tu nih cun NUG nih D-Day a thanhmi hi let than zokzok seh tiah cathanh a chuah ve.

Asi ahcun NUG he riantuanti dingin hnatlaknak min a thumi CNF/A nih teh D-Day hi zeitindah a ruah? The Chin Post nih CNF Spokesperson Pu Htet Ni cu NUG nih D-Day a thanhmi kongah CNF dirhmun zeitindah a si tiah kan hal i a tanglei bantukin a kan leh.

“NUG nih thanh mi D-Day hi CNF i kan dirhmun a si ve ko. D-Day nak hmanh in Myanmar ram pumpi Mipi dothlen nak ni, asiloah mipi dothlen nak thazang thar kan lak thannak ni ti nih khin a huap deuh hnga. Cun D-Day hi nikhat ca lawng a si lo. Ralhrang nawlngeihnak dih ter i mipi nawlngeinak kan hmuh hlan tiang a si lai. Kan duhmi kan kut chung a phanh hlan tiang D-Day hi pehzulh peng a hau ko. D-Day thawk in kan mipi he a ka kip in kan ti khawhtawk cawlcangh cio ding hi CNF/A kan biakhiahnak a si ko”.

A sullam cu NUG nih D-Day a thanhmi cu CNF/A nih a cohlan i a hlan nakin kahdohnak an tuah cang lai tinak a si. Bawipa nih CNF/A le CDF violate kilveng hna sehlaw teinak kan hmuh tiang hruai ko hna seh. Credit: The Chin Post

A Dang Relchih: Pi Vanlalduati Thattu Tiah Zumhmi Cu Tlaih A Si Cang. September 6, 2021 zaan ah Pi Vanlalduati thattu a si lai tiah zumhmi, Lalchawimawia kum 24, Piangtthiauva Tahan F Group, Myanmar khuami, tu ah cun Mizoram Tthangte khua i um mi a si i nihin ah Lunglei Palek nih Lunglei Luangmual ah an tlaih timi kong cu Mizoram Media pawl nih an tarlangh.

Pi Vanlalduati(kum 52) cu a dawr ah naam te he thah a si. CCTV i a langh ning ahcun a sawhtu hi mi tawi/niam lei khi a si i Scooty he a ra mi a si. Special Investigation Team chim ning ahcun Pi Duati thattu hi phuang rih hlah hmanh sihlaw Evidence an ngei ttha ngaingai ti a si.

Lalchawimawia nih hin a naamte cu a mah scooty seat tangah a chiah nain a rak hlonh manh cang tiah palek chim ning cu a si. Lunglei Police press conference cu tuzaan suimilam 8:30 ah Zonet JB1 channel ah le Zonet Lunglei Youtube Channel ah zoh khawh a si lai. MSR

About admin

Check Also

Mizoram Ah Kawlram Minung A Thattu Pa Pakhat An Tlaihkhawh Cang

Mizoram Ah Myanmar Mi Pakhat A Thattu An Tlaih Khawh: India, Mizoram ramkulh Aizawl ah …

Leave a Reply

Your email address will not be published. Required fields are marked *