Related Articles
SAC motor sawmli (40) reng lo PDF pawl nih an kham hna i an kah hna caah SAC lei tam ngai an thi i Phekhung PDF pasal 4 nih ram caah nunnak an pek.
Shian- Kayah ramri, Moepe le Lwinkaw karlak i a um mi Kungta khua kam ah SAC Tatma (66) i motor (40) reng lo cu Phekhung, Lwinkaw, Demawsuh PDF hna le Kayinni phu fonhmi hna nih tuni September 29th ah an kham hna i an kah hna caah SAC leiin tam ngai an thi i PDF leiin a thi mi zong an um ve tiah thawng kan theih.
Kungta khua kahdohnak ah Phekung PDF thazaang 300 in an kah hna i minung pali (4) nih ram caah an nunnak an pek tiah Phekhung PDF nih cathanh an chuah. Hi kahdohnak hi a faak ngaingai i SAC phu lei a thi mi an tam i, SAC pawl cu Kungta khua ah an taang cun Moebe- Lwinkaw motor lam i a um mi Kungta khua le Waryikawku khua kar lak ah tu tiangin kahdohnak a um tiah thawng kan theih.
Tuni suimilam 3:45 PM ah Phekhung Myo i um hmun a khuar mi No.(7) Operations Command Headquarters in ruahdamh in hriamngan an kah i, Phekhung PDF lei nih an lehrulh ve hna i, Phekhung PDF lei kahmi hriamngan 2 cu SAC Bar ah a tla i a puak tiah Phelhung PDF sinin thawng kan theih.
SAC phu pawl nih tu tiangin hriamngan in an kah mi kuan cu khua chung ah a tlak caah inn le lo a rawk len tiah Phekhung PDF nih tuni ah cathanh an chuah.
A Dang Reltthan: Boxing thonghthiam rihzaan(weight) hmun riat(8) ah Champion kho um chun Manny Pacquiao nih cun nihin September 29 ah Boxing in aa dinhnak cu vawlei pi theih in mipi theihternak a tuah i, mipi caah forhfialnak, sawmnak le biacahnak zong a ngei chih.
Manny Pacquiao nih cun “Biachahnak a hnung bik a vun phanh taktak hi cu ka caah a har ngaingai ko. Nihin September 29 thokin Boxing cu ka dinhtaak cang tiah mipi nan sin ah chim ka duh. Vawlei cung kil li i um mipi nan dihlak thazaang a ka petu nan cungah lawmhnak tampi ka ngei. Tutan hi biachahnak tuah dingin ka dam chung vialte lakah caan hars bik ka tonmi a si lai dah.
Asinain, biachahnak ka tuah mi cungah ka diriam ko. Nan i timhtuahmi, nan lungthlitum cu a tak cang dingin i zuam ttualmal ko uh, teimak chuah camcin ko uh. Cu pin lei ah zeibantuk dah ka cungah a phaan/tlung timi kha zohchih zungzal uh. Good Bye Boxing” tiah mithli he mipi sin ah a chim hi a si.
Manny Pacquiao hi 1978, December 17 ah Philippine ram Kibawe khuate ah a chuakmi a si. Unau chuahpi minung 4 a ngeih hna i upa bik changtu a si. Taang 6 a kai/cawn lio ah a pa nih nupi dang a ngeih taak hna i a zaam taak hna. Pa an ngeih lo tikah tleirawl Manny zong sianginn kai duh tukah Chanreu zuar in phaisa a rak hawl tawn.
Pacquiao hi a ngakchiat lio in Boxing rak uar ngaingai le a zuam taktakmi a rak si. A hawile he zong aa thong lengmang i teitu in Peso 100(Philippines tangka) a ngah i a sungmi pawl nih Peso 50 an hmuh ve tawn. An hawile pawl lakah Pacquiao hi a thiam khun bik i an i thongh fatin te teitu dirhmun a co zungzal. Hawile rual he nuam takin an i thongh fatin teitu Pacquiao nih cun phaisa a hmuhmi cu ichiah in a nu a pek tawn, a tthen cu a hawile caah a hman tawn.
Pa an ngeih lo tikah rianttuan a hau i Kum 15 a tlin ah rianttuan dingin sianginn a dinh taak. Inn saknak ah rian a ttuan i a taksa a rak i khon lengmang. Innsak i rian a ttuan chung zongah a zuam ngaimi boxing cu a thinlung muru ah a caam zungzal boxing thiam si dingin a thli tein a rak i zuam zungzal. Cuticun innsak i phaisa tlawmpal aa khon hnu cun Boxing cawng dingin Philippines khuapi Manila ah a kal. Manila a kal tan ah hin kum 16 te lawng a si.
Kum 16 ngakchia Pacquiao cu Manila a phanh tikah a hlan nak in a harsa deuh chinhcin i rawl pangai ei kho loin zingka an kio tawnmi changreu a ei ttheu tawn. Theihhngalh hohmanh a ngeih lo ruangah rian hawlpiaktu zong a ngei kho lo. Cuticun a um mi rian paohpaoh a ttuan ni nikhat ah dollar fangkhat hrawng i khon in lampawng hrawnghraang ah a riak tawn.
Pacquiao nih a hmuhmi phaisa tlawmte cu aa khon lengmang i a zuam taktakmi boxing cu a cawng pah lengmang ve. 1995 kum January thla ah phaisa thaap in thonghnak ah a voikhatnak ah aa tel vei i round 4 nakah teinak a hmuh. Cuticun a boxing lamthluan cu ceuhram aa thok.
1998 kum ah a hmasa biknak Flyweight champion a ngah. Cuticun boxing thongh cu a peh lengmang i 2001 kum ah lineal flyweight champion a si kho. 2008 kum ahcun rihzaan(weight) hmun 8 ah a champion kho dih. Vawleicung Boxing tuanbia ah rihzaan hmun 8 i Champion kho um chun cu Manny Pacquiao lawng hi a si.
Pacwuiao nih cun ring(thonghnak) chungah minung 73 he aa thawng cang i puai 62, sunghmi puai 8 le i tluk in puai 2 a ngei. Teinak puai 62 a ngeihmi chungah puai 39 cu round dih hlan i teinak a hmuhmi pawl an si. A puai hnuhnungbik cu 2021, August 21 ah a si i Welterweight champion lio Yordenis a tei kho lo. Cu hlan deuh ahcun kum 42 a tling cang nain puai 3 peh in teinak a rak co khawh tthiamtthiam.
Manny Pacquiao nih cun 2022 Philippine rampi thimnak ah Philipines president sinak aa cuh ding kong cu September 19 ni ah mipi sin ah chimphuannak a rak ngei cang Mahcu ruangah Boxing in aa dinhfel phahnak zong a si kho tiah ruahdamh a si.
