Related Articles
Tutan Laitlang thawngpang cu Chin miphun thin a tur khun i lungsi a vaang, hi tluk tam in SAC ralhraang Laitlang lei an rak kai hi cu thil dang zeihmanh a um lo, kan Chin ralkap umnak Victoria Camp laak timh hi a si bik ko. Cucu Dr Lian Hmung Sakhong hmurka zong a si. A nung Pathian kan ngeih caah Chin miphun dih lak, kan i biatak a herh cang.
Thawngpang kan theih ning ahcun Falam hual chung hrawng cu an phaan cang tiah theih a si. Taingen ah a riakmi SAC ralhraang le nihin ah Kalay lei in an rak chapmi mawtaw 30 hrawng fonh in Falam lei an rak kai thluahmah cang ti a si. Falam peng, Vaar phak lai Lumbang khua hmanh an phaan cang. Lampi ah heh tiah bomb kahthlorh in an kah i Zawlnu khua ah lo a riakmi pa pakhat zong a kee ah an hliamh.
Chin miphun kan pa pakhat a si mi Dr Lian Hmung Sakhong zong nih a chim khah “CNA sakhaan Camp Victoria lak ding motor 52 le ralkap thazaang 700 in Chinram ah an rak kai cuahmah,” tiah a chim. Vawlei cung ram kip nih hman lo dingah khammi siivai bomb(chemical Bomb) pawl zong SAC ralhraang nih an hman te ttheu lai tiah zumh an si. Tuthla ni 15 hrawng hin Chin ramchung um hriamtlai paohpaoh doh an timh cang hna.
Minung sinak cun thin a phaang i lungre a thei ko. Hriamttha le a ngeimi kan si lo caah thin i domh lo awk a ttha hrimhrim loh. Zeidah kan ton te lai ti chim cia awk a ttha hrimhrim lo i mining lei ruahnak ahcun zeitikdah kan duh lo mi thawngpang kan theih te lai timi lawng kan hngak cio ttheu lai. Hmanhsehlaw Lai miphun cu a nung Pathian a biami miphun kan si. Zeithil hmanh a tuah kho tu Pathian kan ngei. A um cangmi zong a hlo kho tu, a um lo mi zong a um ter kho tu Pathian kan ngei. Nii kaa hmanh a dir ter kho tu Pathian.
Cu caah hriam a tlaimi nih ral an tu lai i, a taangmi nih thla kan cam cio lai. Kan thlacamnak aw zong Pathian nih a kan leh hrimhrim lai i teinak zong kan hmu hrimhrim lai. Minung kan si caah kan thin a phaan cio mi zong kan mawh lo. Hmanhsehlaw minung ruahnak a dih hnu pheen i aa phuang lengmangtu Pathian kha kan auh zungzal awk a si i tutan dothlennak ah hin kan daithlan hrimhrim ding a si loh. Chawva in a ti kho mi nih pekchanhnak ah ui/khiar hna hlah usih. Nunnak tiang a thaapmi ngaknu/tlangval hna hmanh dawh an um rih cuh.
Kan mah le kan sikhawh ning cio in kan rak ttan ve cio kha a herh taktakmi a si. Tutan Laitlang lei a rak zuangmi SAC ralhraang hna zong hi kan ttan rual a si ahcun a rauh hlan ah an ciam ko lai. Zeizong vialte a tuah kho tu Pathian kan ngeih hi kan philh ding a si hrimhrim loh. Abraham Pathian, Isak Pathian, Jacob Pathian kan ngeih caah Victoria Camp hi a hmun zungzal lai. Kaa Lawm.
