Related Articles
Kum 1908, England ram ah a chuakmi phir taksa aa pehmi unau hna pahnih, Daisy Hilton le Violet Hilton kong hi na thei bal cang maw? An nih unau hna hi cu tuchan phir taksa aa pehmi bantukin zohchia le ttihnung an si lem loh. An el le an tawttawk dah ti lo cu a dang an taksa aa pehmi a um hraw lo kut le ke tibantuk zong a dang in an ngei ve ve.
An chuahka ah hin Doctor te nih surgery tuah an si ahcun a thi ding an si a ti caah an thih tiangin harsa ngai cun caan an hmannak zong a si. Tu chan ahcun sisehlaw fawi tein surgery zong an tuah khawh hna lai tiah zumh a si, zei paoh si ah tutan kan rak langhter duh bikmi cu zeitin dah an nun an rak hman ve, tlangval an ngeih ningcang buaithlak taktakmi siseh an caan hman a dongh lei zaangfah an si ning le ngaihchiat a si ning te hna kha a si lai.
A cunglei kan rak langhter bantukin England ram kum 1908 ah a chuakmi an si, an chuahka teah Doctor hna cu lungdong ngai in a chiah hna i sau an dam lai zong an rak zum hna lo. Hmanhsehlaw kum 60 chung bakte an dam hi a si. Kan chim cang bantukin an min hi Daisy Hilton le Violet ti’n min an sak hna, an hringtu a nu hi Kate Skinner si i hi phir a ngeih hna ah hin pasal mumal taktak zong a rak ngei lo. Hi tibantukin a vun hrin hna tikah UK ram pumpi cu lau lakin a tuah hna, an ttih hna i, khuachia phun zongah rak ruah an si.
Anmah hringtu an nu nge zong nih a rak ttih hna, kum tamtuk sualnak phunphun rak tuahmi a si caah Pathian nih hremnak pakhat ka cungah a tlun ter ko hih ti ruat in a donghnak ahcun a fale hmanh ah pom kho ti loin Mary Hilton(kum 55) timi nu sin ahcun a rak zuar phah hna i cuticun a rak zaam tak hna cu a si. Hringtu an nu nih a zaam tak hnu hna ah fa pahnih a ngei tthan pa le nu an si kum rau lo teah a fanu pakhat nih cun a thih taak tthan.
Hi phir taksa aa pehmi hna unau a cawmtu Mary Hilton cu ka nute ti’n Daisy le Violet nih cun an auh/kauh ning cu a si. A zohkhenhtu hna an nute nih hin zaangfah tuk ruangah phaisa tampi dih in a rak cawkmi hna si lem loin ka sifahnak chawngtu dingah ti’n a rak cawkmi hna kha a si. Cuticun kum 3 hrawng upa a vun si hnu cun puai kenkip ah hruai hna in thil phunphun a tuahter tawn hna, cucu mipi hna phaisa man laak in a rak zohter tawn hna. Tthenkhat le bang nih cun khoi an i peh taktak maw, hi ti zohnak ahcun aa pehmi an lo fawn loh ti’n an angki hruk lio mi hna heh tiah an hlim piak tawn hna, tthenkhat nih cun zoh lawng cu i kham lo in an taksa duhnak zawn paoh an tuaitam tawn hna.
Ngakchia le kum tling lo an si tikah a nichiar te cu ti caan an hman pengmi le milem bantukin a mikip sin ah phaisa hmuhnak ca menmen i hman an si peng cu an ning zong a zak ve i an lung zong a faak ngaingai tawn. Cu ahcun an unau pahnih i cachuahmi zongah zei poi lo takin an rak langhter ve mi kha a si. Anmah a cawtu/zohkhenhtu, kan nute tiah an auh/kauh tawnmi Mary zong cu vawlei sining a uar ngaimi le duh paoh i a tlongleng salam mi kha a rak si ve. Pa zong duh paoh in ihpi zei ah a rel lomi nu le zeitindah phaisa ka hmuh khawh lai ti lawng ruatmi, phir unau a cawkmi hna zong zeiah rel lem loin phaisa hmuhnak ca lawngah a rak i timhmi tu kha a si.
Mary zong nih hi ka nan umnak a ruang le nan nu kut in kan cawkmi hna hi zeidang si loin thil pakhat ruang ah a si cucu nan ka rumter lai. Nanmah pahnih hmangin nuam tak le rum takin ka um awk hrimhrim a si. Ka bia tangah nan um lai i ka chim mi paoh nan ngaih peng lai ti hi a si ti’n a ti hna. Nu an sinak cu duh paoh in hmanter a timh hna tikah a caan ahcun an el/al tawn, an al tikah Mary nih cun an angki cu hlim in taisawh he vual lakin a tuk tawn hna.
Anmah pahnih ruang ahcun kal a duhnak ram Germany le Australia tibantuk hna ahcun duh paoh in a tlongleng tawn i aa timh/ruah ning bantuk te cun mirum ah aa chuah ti khawh a si. Zei tluk in phaisa ngeih le rum zongah a cintawk theih a si loh an ti tawnmi hi a rak dik tuk Mary zong cu ti a si ko buah lung diriamnak ngei loin phir hna cu US lei kal dingin thinlung a ngei. Kum 8 hrawng a vun si cun US, Francisco ah a chawhvah pi lengmang cang hna. Cu ti nuam taktak le duh paoh in an mah pahnih hmangin caan a hman lio ah Mary Hilton nih cun a thih taak hna. Cu ti Mary, a duh ning paoh in a hremtu, nih a thih taak hna tikah phir hna hi teh sal an taannak in an luat hnga maw? An luat lo zeicatiah Mary fanu Adit nih cun a vun chaan tthan. Cu ti Mary nih a thih taak hna le cangka cun a fanu Adit le a pasal(Australia mi) nih cun an chawn tthan.
Adit te nupa cu strict ngai an si caah phir unau hna cu an zaam sual ti phaang in an zohkhenh ning hna a ttha ngaingai i zaan zongah an nupa ihnak room an ih ter tawn hna. Inn ka khar zong an hawn khawh lo ding tiangin an hrenhkhanh tawn hna. Tleirawl deuh an van si hnu, Adit te nupa sin i an um hi Mary sin an um nak a let in a har deuh tiah an chim. Thong thlak bantuk he aa khat tiah an chim.
Adit te nupa nih cun anmah pahnih sirleihnak caah ti’n music tthenkhat tete an cawnter hna, an thiam khawh lo le bia an el/al caan hna ah thah tiang tim in hrocer le vuak an tong tawn lengmang. Kum 1920 hrawnghraang le bang ahcun tleirawl nungak thinlung a vun keng, an mui zong aa dawh ngaingai, Daisy le Violet cu duh zong an hun nung taktak. Thil thiam mi le a ngeih tam tikah mipi nih zoh an duh ngaingai hna i phaisa an hmuhnak zong a hung ttha chin lengmang. Hlasak, laam le ri-awn tibantuk an thiam caah hmun dangdangah kal in mipi sin ah phaisa cu an kawl tawn. Hi lio caan i mi lar taktak a si mi Bob Hope le Chalie Chaplin le he zong rian an rak ttuan tti hna. Kha li le bang ahcun zarkhat ah hin dollar 5000 paoh cu an hmuh tawn, kha lio caan tuak ahcun a rak tam taktak khi a si. Hmanhsehlaw cu vialte phaisa an hmuhmi hna cu an sin ah a phaan bal lo, anmah zohkhenhtu Adit te nupa nih cun phaisa an hmuhmi dihlak cu an laak dih tawn.
Cu ti harsa taktak le duh paoh in kal/umm ter a si lio caan ah voikhat cu kha lio caan i milar taktak a si mi le nihin ni tiang ceih le phai a si pengmi Harry Houdini nih cun hi hna pahnih unau kong cu a rak theih ve. Bawmh khawh an si hnga ti’n caan ttha a ngeih le cangka an sining konglam cu a hal colh hna. Cu ti Daisy le Violet nih phaisa kan hmuhmi piakhat zong an sin a phanh ve lo tibantuk le zeitluk in dah phaisa an hmuh le zeitluk in dah an lar timi zong an rak i theih lo ning cu chim in Houdini nih cun zeitindah hi sal taannak in an chuahkhawh lai timi lam cu a rak chim hna. Cu ti Houdini bawmhnak cun Daisy le Violet kum 21 an si lio, kum 1929 khan hi sal an taannak cun zalen an hung si kho.
Hi ti hremnak in an luat hnu cun an duh ning in an caan te hna an hung hmang kho ve cang, duhdawtnak leng zong ah siseh, hmanhsehlaw thil a buaithlak ngaingaimi cu taksa peh an si caah an duhmi pa paoh an duh ve/pi hna a hau, pakhat deuh nih a duh lomi pa a ngeih caan ah an buai ngaingai tawn. Zeitluk hmanhin an fihmi le an huatmi pa a si zongah a unau pakhat nih a duh ahcun hei kal taak chung ning ti awk a tthat ve lo tikah a kiangkap ahcun um pi peng a hau tawn. Cu hnu ahcun Violet deuh nih cun a pasal caah Mouris Lambert cu New York ah a neih i, pasal a ngei kan ti ko nain a unau nu Daisy nih cun khua zei hmun paoh ah a telpi peng a hau fawn. An i ngeih ni cu chim lo an i ngeih zaan, Honey Moon an hman tiang zongah a telpi peng hna.
Zaan caan i nuva sinak an tuah lio caan ah Daisy nih hin ca hna a rak rel khanh tawn hna a si loah Apple hna a rak ei salam ttheu tawn. Kum 1932 ah khan Movie pakhat ah an i tel tthan i cu hnu le bang cun a hlan i an rak lar ning a let khan an hung lar chinchin. Phaisa zong a let in an hmu i cu hnu cun an konglam cachuahmi(autography) The Lives and The Loves Of The Hilton Sisters cu an rak chuah colh ve. A hlan i thongtla bantuk le hremhmun ah khua a sa mi bantuk le duh paoh in kal/um ter a si mi cu unau lar taktak le mirum taktak ah an hun cang.
Hmanhsehlaw Hlasak le lam le thil dangdang in phaisa an hmuh tawnnak cu nikhat hnu nikhat a hun tla thluahmah cang, thil zohnuam le thil thar dangdang tampi a hun chuak thluahmah ve cang tikah tlaakchiat lei an hung panh. Hi nu ah mipi thinlung laa dingin Violet tthiamtthiam nih Dallas Stadiuam ah Gay(nudawk padawk) actor cu pasal caah a neih tthan. Tthitumhnak a ra mi zong cu man laak in sawm an rak si. Cu zong cu a hnuah mipi thinlung sersiam nak ca meimei i tuahmi a si tiah thawngpang a hun leng tthan i mipi huatnak le remlonak tampi an tong ngaingai tthan. Cu hnu cun a unau nu pasal neihnak le a kalnak kip ah a zul lengmang mi Daisy nih cun pasal caah Body Sewer timi pa cu a neih ve.
Sinain a pasal cu a hnuah gay a si ti a hun theih tikah ni 10 chung lawng hmunkhat ah an um manh. Cu ticun an larnak cu a hun tla thluahmah i a hohmanh nih ngaihsakmi an si lem ti lo, khuaruahhar an si nak hna zong a hnu ahcun zeiah rel an si lem ti lo. Mi zeihmanh nih thil mak le khuaruahhar ah an ruat lem ti lo i pangai ah an ruah cang hna. A hmasa an nun ning he tachunh le bang ahcun an tlachia ngai tiah chim khawh a si. Cu hnu cun dawr hna ah hlawhfa rian an ttuan cang um nak hmun hmanh an ngeih ti lo caah Khrihfabu pakhat nih biakinn pakhat ah um nak nawl an peek hna. Cu ti dawr i rian an ttuan lio ahcun kum 1968 January 4 a vun si ah an unau pahnih cun dawr an rak phaan ti lo. A hmasa ahcun an i manh lo i a si lai ti’n biapi ah an ruat lem hna lo hmanhselaw ni tam ngai cu ruang ngei loin an hun langh lo tikah dawr ngei tu lei nih chawnh len zongah chawnh khawh an si ti lo tikah cu ka hmun hruaitu hna nih an ttha hnga maw ttha lo tiah veh tim in inn chung an van luh cu Daisy le Violet cu thisen he an rak hmuh hna.
Sii lei thiam sang nih hlathlainak an tuah hnu ah Daisy hi thi hmasa in nithum hnu hrawngah Violet zong a thi ve tiah theih a si. An thihnak a ruang hi tlangrai sawhsawh ah zumh a si, an thih ah hin kum 60 an si. An ruak zoh tikah Daisy thih hnu ah hin Violet nih bawmhchaantu kawl in heh tiah a rak cawlcang ko nain a taksa a rak derthawm tuk ve caah le a unau nu thi mi cu hmuh a si peng caah Phone hmun a phanh lai teah a thih hi a si lai tiah zumh a si. Hi hna pahnih Daisy le Violet tuanbia nunning le caan hman ning, zaangfah an rak sining le ngaihchia a rak sining. Dirhmun saang taktak in niam taktak ah an ttum ning te hna. Taksa aa pehmi hna lakah khuaruahhar bik zong an si lem lo nain nihin ni tiangah an unau konglam The Conjoint Hilton Sisters hi mipi ceihmai a tong pengmi an si rih.
Note: Hi Hilton unau hna pahnih phir kong hi ttawn chawmmi le ruahnak sawhsawh i ttialmi a si loh. Vawlei cung pumpi a theih/hngalhmi zong a si i si khawh tawk tein lehmi a si ti kha rak theih piak hram uh ti ka duh. Na caan pekin na kan rel piakmi cungah lawmhnak tampi a um. Share zong in rak kan bawm veh.
