Related Articles
Pakistan ram Lahor District Baduki khua pakhat ahcun Jubidai te nufa zong khua an sa ve. Fanu pahnih ngei in upa deuh hi a min ah Nisa ti’n a si i ngakchia deuh hi Alia ti’n auh/kawh a si ve. A pasal nih hin kiktlaih zawtnak ruangah a rak thih taak hna i a fanu le ti cun khua an sa tti hna. A pasal nih a thih taak hnu hna ah hin an nufa rual cun a pa le inn ah an kir tthan i caan sau nawn a pa le inn an um hnu ah Jubidai hringtu a pa nih cun pasal dang ngei tthan dingin a forh/fial. Hmahsehlaw a fale zong ngakchia deuh an si rih caah a pa bia cu pom aa harh ngaingai, pasal dang ngeihnak cha cun ti’n a fale rual he hmei cu aa thim deuh.
Lahore ah cun inn hlang in rian a um mi paohpaoh heh tiah a ttuan tawn hmahsehlaw an fale zong an van upat deuh ve tikah phaisa lei ah harsatnak a um chin lengmang cang. A pa le inn tthiamtthiam ahcun an kir tthan i a pa nih pasal dang ngeih dingin a fialmi zong cu al/el ti lem lo in Akram he cun i ngei tthan. Akram(a pasal) zong nih a tir ahcun a fanu le pahnih zong a mah chungchuak fale bantuk bakin a dawt i a zohkhenh hna. Caan a hung liam thluahmah ve cang tikah Jubidai le Akram zong nih fapa te an hung ngei ve. Cu tikah a pasal Akram zong cu aa lawm tuk ve i a hlan i a nupi fale a zohning hna le a tu a um tuning cu aa dang deuh ti’n a fale zong nih an theihpiak ngaingai.
Akram hi Bag siamnak pakhat company ah rian ttuanmi si i rian in a rak ttin caan zongah hin a fapa rumro cu a lungah um cang i Jubidai fale hna cu zeihmanh ah a ruat ti lem hna lo. A nupi zong nih a pasal um tuning a zoh tikah a khuaruahhar ngaingai cang hmanhsehlaw tuahkhawhmi zeihmanh a ngei hlei fawn loh. Jubidai fanu upa deuh hi kum 12 mi si i an khua ah sianginn kainak pangai a um lo caah tuition(cusin) an kal ter tawn i a kainak cachimtu nu nih hin pasal a ngeih ve caah an dinhter tthan, a dang ah kainak ding lam an kawl cuahmah lio ah Akram nih cun a u fapa M.A cawngmi a rak phaan lai caah a nupi sin ahcun Nisa cu tuition kai dingin a chimchawnh.
A nupi zong nih cun a ttha ko ti’n a rak pom ve ko i, lam le hla don le thlah a har lai caah tuition a kainak ding ahcun va um lawlaw sehlaw a ttha hnga maw taih Akram nih cun a chim tthan. Akram nih cun Nisa cu a u fapa sin i tuition kai ding cun Nisa cu a va hruai i Nisa zong nih cun nu le pa bia cu al lem loin le Akram u fapa Samir zong nih ttha taktakin tuition pek ding cun bia rak kamh ve hna. Cuticun Akram nih Nisa cu a kir taak tthan i ngakchia dang hna he Nisa cu room khat ah tthu in Samir nih cun ca a chimh tawn hna. Class an dih i ngakchia dang hna inn an lawi cu Nisa nih a hmuh tik hna ah inn lei cu a ngai ngai tawn ngakchia si tikah Samir zong nih cun a theihthiam tuk i phone in a nu le pa cu a chawnh ter tawn hna.
A nu le pa a chawnh tawn hna ah hin Nisa nih a chim bikmi cu inn lawi a duhnak kong le Samir sin um har a ti nak kong lawng te hi a si tawn i hmahsehlaw a nu Jubidai nih cun a si khawh tawk in a rak hnemh i a forhfial tawn, na theihhngalh lo mi tete zong na Saya Samir kha rak zungzal zeihmanh rak ttih hlah tiah a ti tawn. Zaankhat cu Nisa nih a theihthiam lo mi hal dingin zaan suimilam 11 hrawngah Samir cu a va fuh i cokha an pahnih cun rawl hna an ei pah. Samir hi Nisa nakin kum 15 upa a si i cuti Nisa nih theihthiam lo mi hal dingin a va fuh cu Samir nih cun Nisa lakah lungput ttha lo a rak ngei diam.
Samir nih cun Nisa kut cu tlai in pom a vun timh ruangmang le cangka cun Nisa cu a dir colh i amah room ahcun a kir tthan colh, a thazing an van thawh le cangka Nisa nih cun a nu le pa cu a chawnh hna i rak don dingin a chim colh hna. A nu nih cun a pa chimh tthan dingin a rak leh. Caan cu a hung liam ve thluahmah, ni dang kel bangin ngakchia rual he cun Samir inn tangah ca an cawng tthan hna, an dih i ngakchia dang an ttin dih hnuah Samir nih cun Nisa kut cu a tlaih tthan i a sam hna a tuaitam piak leen, cu le cangka cun Nisa cu ttihphaan nak in a khat colh i amah room teah cun a tli colh tthan. A tuah kel bantuk te cun a nu le pa cu phone a chawnh colh tawn hna hmanhsehlaw Samir zong a pawng teah um peng a si ve caah thil sining taktak cu chim awk aa ttha hlei tawn lo.
Akram cu rian in a rak ttin le cangka Jubidai nih cun Nisa va tthihruai dingin a a hal colh i Akram zong nih a theihthiam i a thaizing office ttin pah in va don dingah aa tim. Thaizing cu a hung phaan i Akram zong cu aa timh ning te cun Office ttin in Nisa va don cu aa tim hmanhsehlaw ruah lo piin an company lei rian a tam caah tuan tein ttin awk a ttha lo tiah cunglei in thawng a um, cuticun inn lei Jubidai zong lungrethei in a um i a fanu don caan a cut cang tikah a pasal cu heh tiah phone cun a chawnh len nain a pasal le company cu Bag a siam mi an si caah thawng a thangmi ri nih phone a rin(ring) zong a theihter kho ti lo. Cu lio ahcun Samir te lei zong an pahnih te lawng cuticun an rak um i cucu Samir nih caan a rem a rak kawl cuahmah, a herh lo ah na thiam lo mi um ti’n a pawngah a va naih deuh tawn.
Hmanhsehlaw Nisa nih cun Samir hmuisam cu a zoh in a zoh ngam lo, lukhun in tanglei rumro kha a zoh cang. A kut cun a tlaih tthan i Nisa cu thinphaang in amah room te ahcun a tli tthan colh, hmahsehlaw tutan cu Samir nih a room tiang a kalhnawh i ihkhun ahcun a nam colh, cuticun Nisa nih a nun chung a philh khawh ti lo dingmi lungfahnak cu Samir nih a tuah. Akram nih cun Nisa cu a hruai khawh lo caah a kiptuh ahcun hruai dingin Samir te um nak cu a va phaan kho, Akram nih cun Nisa cu a sik i cacawn hi na huam/zuam lo taktak a si ko hih nangmah caah thil ttha kan tuaktaan i cachimtu unau zong ttha taktak na ngeih ko bu ah a tu le tu rak ka hruai ko uh ti’n na kan chawnh leen t’n a sikcaak pah leen, Samir zong nih tihin cun a hmailei nun a ttha kho lai loh ti’n Akram he tlawmpal bia an i ruah hnu ah Nisa le Akram cu an inn lei ah an ttin tthan.
Cu ti tlawmpal cun inn cu an hung phaan i Nisa nih cun a nu Jubidai a rak tthut lio cu a kuh colh i ngaihchia ngai cun heh tiah maak thei loin a ttap thluahmah. A nu cu a ngaihtthat ve lo caah hmun dangah a hruai colh i thil sining a vialte a hal i Jubidai zong nih cun thil sining vialte cu Akram sin ah a chim colh ve. Cu le cangka Akram nih cun a unaupa Samir cu a chawnh colh i thil sining cu a hal hmanhsehlaw Samir nih cun zeihmanh thil ttha ka ti lo, chungkhar khat kan si hna i khabantuk thil kha ka tuah ngam ko hnga maw tiah Akram cu a rak leh. Akram nih cun a nupi cu Samir nih zeihmanh a tuah lo Nisa hi lawi a duh tuk caah chuanlam a siam sawhsawh mi a si ko lai ti’n a nupi cu a chimh. Akram nih cun Nisa zong heh tiah a sikcaak leen i lih le hrokhrawl cu nan nu sin ahcun na rak chimh na unau bantuk a si mi Samir nih cun zeicadah khabantuk lungput cu a ngeih hnga a ti’n faak taktak Nisa cu teng lakin a bengh colh, hringtu a nu thinlung a faak ngaingai.
Ni le caan an hung liam lengmang ve i, a nu nih cun Nisa taksa ah hin lunghrinhnak tete cu a vun ngei. A nu nih cun Nisa cu Sikhaan ah hruai colh in Doctor te nih fa a pawi tiah a nu cu an rak chimh. A nu thinlung a fahtuk caah kum 12 lawng a si rihmi a fanu cu a kuh i heh tiah a ttahhnawh thluahmah i Samir lak ahcun a thar in thinhunnak a ngei tthan. Jubidai nih cun Akram zong cu a chimh colh le cangka Akram zong a thinhung ngaingai nain Samir nih hibantuk thil hi a tuah lai tiah a zum kho hlei rih lo. Akram cu thinhung tuk kaw, kan chungkhar i hibantuk thil a can le mi nih nihsawh thlanglamh ding kan si lai cu ka ruat kho lo cu caah Nisa cu kan chungkhar hin a chuah hau ko a ti, a nupi nih cun heh tiah a nawl len nain Akram nih cun na fanu a si i kei cu a pa ei sawhsawh men ka si Nisa hi dam seh ti na duh ahcun hi ka hin chuak ko seh tiah a leh.
A nu zong a thinhun tuk caah a pasal Akram cu ka fanu kong ah hin ka sikhawh tawk in kaa zuam lai zeidah a can te lai tihi rak zoh teh ti’n an nufa cun Samir te inn lei an panh colh nain Samir nu le pa nih cun an fapa nih hibantuk thil a tuah lai hi a ruat in an ruah khawh lo pin ah a tuah lai hi an zum kho hlei lo i, minchiat le thangchiatnak puh sawhsawh men ah nan ra tiah an rak leh sawh ko hna. A thaizing ahcun Jubidai nih cun Samir cu chawn in ton nak hmun ah an i tong i Jubidai nih cun a fanu cu nupi caah tthi dingin a nawl len hmanhsehlaw Samir nih cun a rak duh loh, mualphohter maw nan ka timh, zeibantuk pa ah dah nan ka ruah na fanu hi nupi ah kaa siam kho lo ti’n a rak leh cu hringtu a nu a thinlinh a zual chinchin i thinhun lung cun Samir cu nangmah dah ti lo cu hibantuk thil hi a can khawh nak ding lam a um lo tiah a ti pah in an biachimnak tete cu Phone ah record a thli tein a rak tuah, Samir cu a thinhun tuk ve cang tikah, aw si e, na fanu hi keimah tlaihhremmi a si pa ka si i nupi caah cun ka duhmi nu paoh ka tthit hna lai zeihmanh nan nufa hin nan i thlaknak ding sullam a um lo tiah sual ngai in a rak leh, cu a bialehnak nih cun hringtu a nu thinlung a khenh tuk caah a pawngkam thirfung cun Samir hngawng ah a sawh i Samir cu tlawmpal ah a thi colh ve.
Thawngpang a leen le cangka palek nih cun Jubidai cu an rak tlaih colh, Akram nih cun a nupi an tlaih ti thawng a theih le cangka palek sakhaan ahcun a zuang colh i a nupi ziah hibantuk thil ttihnung taktak cu na tuah ko ee tiah bia a hal i Jubidai nih cun zeihmanh chim lem loin phone record a tuahmi cu a phonh colh. Akram zong cu a thinhun a zual ngaingai i hibantuk thil cu a tir te khan ka chim law keimah nih ka lim hnga lo maw tiah a ti i Jubidai nih cun kan chim le hme na zumh lo kha tiah a ti. Palek pawl zong hi kongah Jubidai cu an zaangfaak ngaingai, Jubidai cu thlai in thah ding a si ko nain palek hna nih duhlonak an langhter caah kum 5 chung lawng thong thlak dingin biachahnak cu an tuah piak tthan.
