Related Articles
Phungluutlo thingphur motor Kawlin PDF nih mei in khangh October 25 lio, Kawlin Peng ah phungluutlo in thing a phurtu ke 12 ngei motor pakhat cu Kawlin PDF nih mei in an khangh, motor khaaltu cu an thlah cang, tiah theih a si.
“Kawlin Peng ah thinghau, fir le pawngkam rawhralnak a tuahtu cu fak piin dan kan i tat hna lai. Tutan motor kan khangh mi hi zohchun ding ah kan tuah mi a si,” tiah Kawlin PDF nih an thanh. Credit: The Hakha Times
A Dang Relchih: Myaung Ah Nu Ralkap Phu An Dirh: Ralhrangbu doh dingin Myaung (မြောင်) peng chungah nu ralkap phu Myaung Women Warriors -MWW dirh a si cang tiah Oct 26, tuni ah an thanh.
Nu hi dothlennak ah an biapi tuk ve, pa nak in thazaang nem deuh an si nain anmah loin dohlennak hlawhtlin a har. Nawlngeihnak an lakka tein nunnak pek in a ralhrang uknak a doha cu nu an si. Tutan dothlennak zongah nunnak a pe hmasa bikmi cu nu an si. Cucaah atu atu bantukin nu ralkap kan dirhnak a si tiah an thanh.
MWW hruaitu pakhat nih “Kanmah cu hramhram in nawlngeihnak latu ralhrangbu a cohlang lomi kan si. Pa hna bantukin khongton uknak dohnak ah thazaang dihlak chuah in kan i tel lai” tiah a chim.
Dawei (ထားဝယ်) Pyusawhtee Phu Nih Mizapi Cu An Hro Hna: Thanintarri(တနသင်္ာရီ) ramthen, Dawei ah Pyusawhtee phu nih rahrang lungtlinpi nak lam zawhnak ah nan kan zulh lo ahcun kan in thah hna lai tiah mizapi hna cu an kan hro tiah khuami hna nih an chim.
Dawei ah October 26 ni tuah mi ralhrang lungtlinpi nak puai ah nan rat lo ahcun nan chungkhar in kan nin thah hna lai tiah Pyusawhtee hruaitu Aung Sing nih veng chung mi cu an hro hna tiah theih a si.
Mah leng ah Yee Pyo( ရေဖြူ) peng chung i ralhrang he ca naihniammi khua ah a um mi hna cu Dawei khuapi ah tuahding mi ralhrang lungtlinpi nak ah nan ra lai tiah ralhrangbu hna le khuabawi hna nih an hro hna tiah Than Lwin Khet News nih a tial.
Nawlngeihnak Lak Hnu Ni (267) Chungah Thah A Tongmi 1199 An Si Cang: AAPP nih October 25 tiang a thanh ningah Myanmar ram chungah ralhrang nih nawlngeihnak an lak hnu ni ( 267 ) chungah ralhrang nih an thah rammi ( 1199 ) an si cang. Tlaih a tongmi 9193 an si i atu tiang ah thong chung um rih mi 7042 tiang an si cang. Cun tlaih dingah an thanhmi( 1954 ) an si cang. Ralhrangbu hna thahnak in Yangon khuapi ah a thi mi an tambik tiah Than Lwin Times nih a laughter.
Thaton ah ralhrang sin thawngpetu dalan Thar Phoe cu beer a din lio ah thah a tong: Mon ramkulh, Thaton peng chung um ralhrang phu sin thawngpetu dalan Thar Phoe cu meithal kah a ton caah a thi tiah khuami nih an chim.
Nizaan October 25 ni zaanlei suimilam 4:00 luan hrawngah Thaton mipi vengtu le Thaton khuachung ah a cawlcangmi mipi ralkap hna fonh in Thaton peng ta-ya sehzung pawng Htoo beer dawr ah a thumi dalan Thar Phoe cu beer a din lio ah meithal in kah a tong i a hmun ah cun a thi colh, a pawngah a thumi a hawile minung 3 zong hliam an tuar tiah theih a si.
Dalan Thar Phoe cu bawmchantu(ပရဟိတ) lemcang in rithai sii phunphun a phortu a si, a luancia March thla ah khan mibawmchantu (ပရဟိတ) motor in rithai sii cu Pha-aan(ဘားအံ) lei a phorh lio ah ralhrang nih checkhlat in hmuh a si ko na in, zeihmanh hmalak nak tuahpiak lo in an rak kalter tiah khuami nih an chim.
Khuami pakhat nih “Thar Phoe cu bawmchantu (ပရဟိတ) bantukin a um, zaan ah palik sakhan ah a kal i thawng a pek hna, lamzawhnak kan tuah lio zongah hman a kan thlak i palik sin ah thawng a pek” tiah a chim.
Dalan Thar Phoe cu ralhrang nih nawlngeihnak an lak chungah midang bawmchantu (ပရဟိတ) bantukin lemcang a cang i rithai sii a zuar, ralhrang sinah i fonh in mipi humhimnak hnorsuan in a tuahmi thil vialte ruangah a tubantuk in kan thah hi a si tiah Thaton-PDF chungtel pakhat nih a chim tiah Than Lwin Khat nih a tial.
Dothlennak ah dalan hna hi dawnkhamtu ngan bik pakhat an si ve caah fiangtein theihmi hna cu an fimhlawm thluamah cang hna. Dawtnak le zaangfahnak langhter awk a tha ti lo. Dalan a si ko tiah theihfianmi hna cu kan hmuh hna nak poah ah kan fimhlawm ko hna lai tiah dothlennak tuahtu mipi ralkap hna nih an chim.
Monyua Duh-ye-oh(ဒုရဲအုပ်) Win Kyaw Myo le palik pakhat cu SIA nih an thah hna: Sagaing ramthen, Monyua ah KTV in a rak lawmi duh-ye-oah (ဒုရဲအုပ်) Win Kyaw Myo le palik pakaht cu nihin zinglei ah SIA nih an kah hna i a hmun ah an thi. An meithalle kuan an lak khawh hnuah an kaltak hna. An ruak cu nihin zinglei suimilam 6:00 ah ralhrang nih an char tiah Regional News Agency nih a langhter.
SIA hruaitu Khun Sa nih “Nihin zinglei suimilam 4:00 luan hrawngah, KTV in an rak lawi lio cu lampi in kan bawh hna kan kap hna, anmah zong nih an kan kah ve. Duh-ye-oah (ဒုရဲအုပ်) tel in palik pahnih cu cuka hmun cun an thi colh. An i kenmi meithal le kuan zong kan lak khawh, kanmah lei pakhat hmanh hliam kan tuar lo” tiah Regional News Agency ah a chim.
A thimi palik pahnih ruak cu nihin zinglei suimilam 6:00 hrawngah ralhrang nih an lak hna i checkhlatnak an tuah hna tiah Khit Thit Media nih a tial.
US President nih Myanmar ngakchia nu sin ah cakuat a leh: American ram California ramkulh ah a ummi Myanmar rammi siangngakchia pakhat nih Myanmar ramkhel kong he pehtlai in a tialmi cakuat cu October 26 ah president Joe Biden nih calehnak a tuah.
White House Seal (တံဆိပ်)a telmi cakuat cu president Joe Biden nih a hmanthlak he cakuat lehnak ah a kuat tiah ngakchia nu i a nu nih amah social media ah a langhter.
Ngakchia lawng a si rih mi nu pakhat Doreas nih ralhrang nih Myanmar ram mipi hna cungah hramhram an thil tuahmi vialte cu vedio le hmanthlak in ka hmuh hnuah ka lung a tha lo tuk tiah a chim.
Doreas a nu nih cun “A khuaruah mi cu a ka chimh i president Joe Biden sinah ca kuat ka duh, a address ka kawl piak a ti caah Google ah ka kawl i ka piak, ca a tial i a ka relter, ka zohpiak tikah a khuaruah mi cu a thuk ngaingai, tha ten van tial than tiah ka ti, a thaizing ah white house ah ka kuat cang ka nu tiah a ka chimh” tiin amah social media ah a langhter.
Cu ngakchia nu Doreas nih cun Myanmar ram chungah ummi ralzaam hna le amah a pi le chungkhat hna caah a lung that lo nak kong, ngakchia zong ramlak ah humhim nak tha a umlo nak hmun ah an umnak kong, ei thaw zong ei kholo in an umnak le zaangfaktuk an sinak kong hna cu a President sinah cakuat a tial.
President Biden nih cun “Nangmah na ruahmi le tuarnak hna cu na ka theihter caah ka lawm tuk. Vice president le keimah cu siangngakchia hna sinin atubantuk ruahnak chuahpi mi hi theih a duh mi kan si. Kum no te na si na in, nangmah sinah hmailei a thleng kho i tuanbia a tial khomi sinak a um” tiah cakuah lehnak a tuah. Doreas nih hin October 20 ah cakuat cu a tial i October 26 ah President sin in lehnak a hmuh hi a si.
Ramchung ah electric tlanglawng le khuapi chungah electric motor a um dih lai tiah ralhrangbu hruaitu nih a chim: Myanmar ram chungah electric tlanglawng lam tuah in electric tlanglawng le khuachung zongah electric motor hman an si lai tiah ralhrangbuhruaitu Min Awng Hlaing nih a chim. Hi bia hi October 25, Naypyidaw ah tuahmi ralhrangbu hruaitu hna meeting ah a chimmi a si.
Hramhram in nawlngeihnak latu ralhrang hruaitu nih “Public Transportation cu kamah nih thazaang kan pek a herh, cu Public Transportation hmun ah electric kan hman khawh a si ahcun thathnemnak tampi a um lai. Curuang ah electricity thazaang tampi chuah khawh nak dingah kan i zuamnak hi a si. Ramchung hmun kip ah electric tlanglawng kal khawh nak kan tuah lai. Khuapi chungah hmanmi motor hna cu electric motor an si lai. Cu thil a can khawhnak dingah caan lak a hau, tuaktannak zeimawzat a tlamtlin ah cun fakthanhnak kan tuah lai. Kum zeimawzat hnuah cun electric motor hman caan ah thlen a si lai. Pumpak zong nih hman an si te lai, cu ti kan tuah lo a si ahcun hnuah kan tang lai, petrol kan chambau te lai” tiah a chim.
Cu lengah fertilizer sehzung sak ding le, bi-lat-may (ဘိလပ်မြေ) le thir tlamtling ten chuahkhawh nak dingah a kuttang vuanci hna cu a fial hna DVB nih a langhter. Hakha in a kirmi ralhrang hna nih lampi an firmi thilri hna cu motor khat tein an phorh i Kalaymyo lei ah an kal
Chin ramkulh, Hakha in Falam lei ah nizaan October 25, zaanlei ah a phanmi ralhrang hna cu lam pawng khua hna ah an taang pah i an hmuhmi thilri paoh an fir i motor cu khat tein Kalaymyo leiah an kir cang tiah theih a si.
Kalay ah a kir thanmi ralhrang motor hi 56 an si i, nihin October 26 zinglei ah Falam in an chuak cang. Cu ralhrang hna nih cun Hakha-Falam kar khua i minung umnak inn hna cu bauh in thilri an fir, TV, thutdan, facang tun hna le inn chung hmanmi thilri tampi hna cu an i kal pi tiah Falam khua in mit hmutu hna nih an chim.
CNLD upa pakhat nih “Khua cheukhat cu a ruang um l in mei an khangh piak hna, biaknak he a pehtlai mi inn, khuachung thilri vialte an hrawh dih, man ngei deuhmi thilri vialte cu an fir dih, sualnak ngeilo mipi hna cu an thah hna, hi hña pawl hi mifir, damiah menmen an si lo, phundang in chim ahcun ta-pung (terrorist) an si. Cu nih cun cozah pakhat in dir an duh, Min Awng Hlaing le a minung hna cu ningzah an hngal lo” tiah nih a chim. Ref: Mizzima
