Related Articles
Nihin October 2 zingah Vaurawn Zuunthil-Vaan ralvennak show ah CNA ralbawi Solomon biachim cu uar a um kho taktak i thinlung zong a laa ngaingai. Show a chim nak video a ngaimi nih cun kan theih dih lai. A chim tampi a um cu a chim chungin a tawifiannak in kan theihtawk kan rak langhter lai.
Ralbawi Solomon nih a chim mi cu “Nihin ni ah hin kan lungfaak kan ai puang a sinain hihi kan lungdong maw ti ahcun dong hlah kan nih Chin miphun ai timi paoh nih zeitik hmanh ah lungdongh a hmangmi miphun kan si loh. Kan pupa chan in hibantuk minung a thatmi ral hi nihin ni tiang kan doh pengmi a si ko, Japan siseh Mirang siseh Kawl siseh Laimi nih ral kan doh peng ko lungdongh timi a um bal lo. Cu caah cun an thil tuahmi hi zoh ko ulaw minung lungthin a ngei lomi hna minung tuahto mi a si. Kan dai kho maimai lai lo.” tiah a chim.
Biaknak lei ah bochanmi hna sin in tlawmpal an lungtlin lo nak le kan hmuhmi tiah a chim mi zong a um i, mah hihi ruahdamhnak cun tthenkhat kan Pastor le nih raldoh a hau lo thlacam a zaa ko tiah a ti mi deuh pawl chim hnawhnak a si lai dah, a ti mi cu “CDF kan mino hriam aa tlaihmi vialte nan dihlak nan theih dingah kan mifim kan pa le pastor hna zong hi hriam an tlai ve e ti hi rak kan theihpi ulaw ti hi ka duh. Training hi February thla 1 in nihin ni tiang cat lo tein kan peek peng hna. An um nak hmun cio ah training pe kho dingmi kan thlah hna i cutin cun nihin ni tiang training peek an si. Cu caah cun hi ral kan dohmi hi a dikmi ral kan doh.
A si nain nihin ni ah tlawmpal te a taangmi cu Khrihfabu hna kan pastor te hna, hihi kan i fiang rih rua lo tiah hi ka hin kan hmuhnak tete a um. Solomon hi minung a si. Minung hi first kan si. Solomon nih a zumhmi hi cu Khrihfa a si. A duhmi biaknak paoh a zumh khawh. Amahbelte keimah Solomon a dih ahcun ka biaknak hi a dih ve ko. A nunphung a dih ko cu caah cun nihin ah zeiruang ah dah miphun pi nih dothlennak kan tuah lio ah biaknak lei in a theithiam lo mi kan um rih hi a poi ka ti tuk. Miphun a thih ahcun a biaknak a thi ve. A zumhnak le a nunphung vialte a dih cu caah cun hi ral kan dohmi hi a dik ka ti nak cu a si.” ti’n a chim ning cu a si.
Cun Chin ram lawng si loh Chinland vialte chung i a um mi hmun paoh kan laak dih lai ti zong a chim rih, uar a um kho taktak “Chinland chung um mi Mindat, Kanpetlet, Matupi, Paletwa, Hakha, Thantlang, Falam, Tonzang, Tedim pin ah Kalay Valley Gangaw hi vialte CDF he hin kan i tong dih cang, kan i hmu dih cang. Nihin caan thil kan tonmi hi Kawl holh hi hlan ahcun Ralpi a si rih lo kaddohnak lawng a si rih. Kan Chinland vialte hi a tu tlawmpal ah nan theih dih lai kan laak dih lai.
A tu kan tonmi nak in a let in kan ton rih lai. Ton din zongin ready kan si zeitik hmanh ah hnu kan kir lai loh. Hmailei tu nawrh thluahmah ding a si cang. Nihin ni ah Chin mi tuanbia tubantukin Chin mi aa fuuntom mi kan um loh. Cu caah kan i tlaihmi, kan ngeihmi hriam in kan tthuat hna lai. An duh le vanlawng ra seh an duh le Tank zong ra seh an hmunhma ah an rawk lai zeicaah zumtu ttha kan si zeicaah Sehtan ral kan do. Zeitik hmanh ah Sehtan nih cun zumtu ttha cu a tei bal loh. Cu caah cun Chin mi kan si Khrihfa miphun kan si Sehtan nih an kan tei lai lo. Jesuh Khrih a nungmi Pathian a ngeimi miphun kan si. Khibantuk mi luklak nih an kan tei dingmi miphun kan si loh.” tiah duhfahnak taktak a chim.
Cattialtu hmurka: Kan Chin miphun nih kan i ngeihmi CNF si ah CDF hi thazaang pe ko hna usih. Chawva ngeihchiah in kan ti khawh lo hmanh ah nifatin kan thlacamnak ahcun telh peng hna usih. Talk Show an tuahnak ah a chim mi tampi chung in kan theih tawk le a tawifiannak in kan rak ttial chin mi a si. Tlamtlin lo nak tampi a um lai. Theihthiamnak he.
A Dang Reltthan: Nizaan October 1 ah Chinland Defence Force, Kalay-Kabaw-Gangaw lei ah ralkap 3 nih CDM an tuah.Anmah 3 hna lakah ralkap 1 nih hriamnam tling he CDM tuah in kan sinah an rak lut.
Hriamnam tling he kan sinah a rak lutmi cu laksawng peknak zong kan tuah cang pinah anmah 3 hna zong himnak hmun, zalonnak hmun ah kan thlah cang hna. Nawlngeihnak latu Min Aung Hlaing cu kaltak in mipi dawtnak tangnem tangah dor a duhmi ralkap hna cu kan rak in don hna i, himnak hmunah kan in chiah hna lai.
Hriamnam tling he a rak lutmi cu laksawng peknak zong kan tuah tiah Chinland Defence Force, Kalay-Kabaw-Gangaw nih cathanh an chuah. Credit: The Chin Post
