Related Articles
SAC phu cung ah azizut (Action lak) ding in Burma Act timi Bill cu US House of Representatives ah an luhpi US House of Representatives ah SAC phu cung ah dantat ding in ” Burma Unified through Rigorous Mailitary Accountability Act of 2021″ cu October (5) ah khan an luhpi tiah thawng kan theih.
“Burma Unified through Rigorous Military Accountability Act of 2021” cu Chairman of the House Foreign Affairs Committee a si mi Gregory W. Meeks (D-NY), House Foreign Affairs Committee; Asia-Pacific Sub-Committee i chungtel a si mi Steve Chabot (R-OH) le Member of Parliament a si mi Benjamin L. Cardin (D-MD) hna nih an luhpi mi a si tiah kan theih.
“Kawlram Democracy kal nak dodal in ralkap nih phungnung loin uk nak an lak hi thla (8) a si cang. US le ramkip nih pressure (hnek nak) kan pek ko hna nain an duh lo pin ah, lai nawnnak le phungning loin mi tleihna te pawl hna cu an buar peng. Zapi tel in ton biaruahnak tuah ding , hramhram in tlerh khonnak ngol ding, an tleihmi hna chuah zalen ding timi cu SAC phu nih an duh lo.US nih cun Kawlram mipi humhimnak pek le thazang pek i, SAC phu nih uk nak an lak mi cu kan pawm mi a silo ti hi fiangfai tein thawngthanh ding tampi a herh” tiah Chairman of the House Foreign Affairs Committee a si mi Meeks nih cun a chim.
“Burma Unified through Rigorous Military Accountability Act of 2021” ah cun Uk nak lak le hramhram in thahnawn nak ah ai telmi vialte, Organization (Phu) hna kha hmui tinh i dantat ding, Kawlram in Lungmansung pawl US ah luhpi nak nawl phihkhar ding, US nih Kawlram caah remhchunnak ruah ti le khanti ding mi palai (1) chiah ding le civil society phu pawl kha bawmhnak pek ding, humanitarian assistance bawmnak pek ding le Rohingya miphun hna cung ah cihloh timhnak hna cu US House of Foreign Department nih cohlan i theihpi ding, UN in thawk i Kawlram cung ah Dantat nak tuah ding timi cu US nih a hal tiah theih a si. Khit Thit
A Dang Relchih: CDM a tuah lo mi cu Ralhrang kut tang ah rallokap duhning in rian a ttuan cuahmah mi an si ruang ah CDM tuah lo in CDF-Thantlang kan hmunhma chung a rak lut mi cu kan cawlcanghnak dawnkhantu an si sual lai ti kan phan ruang ah caan karlak tlaih chung an si. An cung ah fahnak pek lo ding in zohkhenh an si.
1. 2021 September 29 ah Hakha in a rak ra mi Van Bawi Lung cu khualtawng chek in chek a sinain CDM a tuah lo mi a si hngalh pin ah a phone chung ah lunghrinh mi zeimaw hmuh a si caah CDF-Thantlang ralkap nih kan tlaih. Hakha in a rak i thawh hrimhrim in hliamhma a tuar cia mi a si. CDF-Thantlang nih kan tlaihnak hmun in Sakhan tiang kan kal pi i Sakhan ah zankhat kan riahter. Ka taang a fak pah a ti caah sii-ai a umnak CDF-Thantlang Sakhan ah i tthial dingin kan kal pi. Cu kan kal pi lio ah ka tha a ba tuk kai din ta lai, a ti i tlawmpal ai dinh hnu ah a nunnak a liam.
Hi kong he pehtlai in CDF-Thantlang nih hlathlainak le zohfelnak kan tuah cuahmah lio a si. Kanmah zong kan lung a ttha hrimhrim lo. Hlathlainak a dih in CDF-Thantlang nih taantak mi chugnkar hna sinah CDF-Thantlang dun le dan, Khrifa phung le Lai phunglam ning tein lenkainak zong kan ngei te lai. Atulio ral boruak aa tetkhawt tuang ruang ah le hlathlainak kan tuah cuahmah lio a si caah lenkainak kan tuah khawh rih lo mi a si.
2. 2021 October 3 ah Thantlang Education Office ah cazipi a tuan i CDM in Non-CDM ah a kir tthan mi Pu Sang Kian cu CDF-Thantlang nih Tlangpi Khua ah zingka suimilam 9:00 ah kan tlaih. Pu Sang Kian cu Ralhrang kut tangah rian a tuan lawng si lo in CDM a tuah mi hna cung ah tlerhkhonhnak zong a rak tuah tu a si. Cun, August thla tiang ralhrang SAC thlahhlawh a la tu zong a si fawn.
Pu Sang Kian a tupa si mi Pu Mang Za Thawng, sianginn cachim(CDM tuahmi) cu a pu Pu Sang Kian sin thil a rak chanh nak lampi ah CDF-Thantlang ralkap pakhat nih a kut a thlak sual caah ai hliam tiah kan theih i kan lunga tha hrimhrim lo. Hi kong he pehtlai in CDF-Thantlang nih CDF-Thantlang dun le dan zulhphung ning tein hlathlainak tuah ding in ttuanvo lak cuahmah a si.
Ralhrin peknak: CDF-Thantlang nih hlathlainak le biakhiahnak a tuah hlan ah a thlithup thawngpang, hmanthlak tibantuk a leng ah a chuahter tu le a phozar tu cu CDF-Thantlang nih dantatnak pek nan si lai, tiah kan in theihter hna. Chinland Defence Force-Thantlang
A Dang Reltthan: Upatmi CDF-Thantlang hruaitu hna, Pu Sang Kian(Tlangpi, anupi Zephai) hi Thantlang peng fimcawnnak zung cazi lutlai a si i chungkhar harsat ruang ah CDM a tuah kho lo, a fanu 2 lawng CDM an tuah khawh. CDM a tuah lomi CDF nih an tlaih cio hna caah Pu Sang Kian zong CDF minung 6 hrawng nih a zamnak Tlangpi ah an rak lak ve. A fale nih a thil zong tha tein an timh piak i an kalter ve ko. Amah zong nih phunzai lo tein a zulh ve ko hna.
Khua lonh ah CDF ralkap nih an pakhat he an chiah tak chung hna i anmah cu khuachung ah wine an ding ta. An rit hnu ah an hruaitu pakhat nih Pu Sang Kian cu ‘CDM na tuah duh lo’ tiin a velh, cuti a velh lio ah cun thil chanh ding a ra thanmi Mang Thawng(Farrawn khuami, Pu Sang Kian a fanu vapa) nih a hmuh hna i a thlauh. Nain, Mang Thawng(amah zong hi CDM a tuahmi a si) zong cu a velh ve. Meithal he a si hlei ah a meithal in a hmuaih chih hna caah an let ngam lo, a duh chung in a velh hna i Pu Sang Kian cu a hnarthi a chuak, Mang Thawng cu fak tuk in a velh caah a hmai zong a kuai dih i tuhi a tho kho lo, drip an thlaih lio a si.
Pu Sang Kian cu a thi he CDF ralkap nih cun an kalpi i atu hi CDF sin ah a um ko. A velhtu CDF ralkap hi tanghra a rak kai lio ah Mang Thawng lila nih ca a rak chimhmi a si. A pa cu pastor a si. Security vennak caah a khua le a min cu langhter awk a tha lai lo. Pu Sang Kian CDM a tuah lomi cu a hman, CDM a tuah lo caah an kalpi i phunzai lo tein a zulh ko hna. Nain, dalan bantuk cu a si hrimhrim lo. A fale nih zeitluk in dah CDF thazaang an pek timi cu nanmah CDF-Thantlang nih fiang tein nan thei dihmi a si ko.
Pu Sang Kian hi keimah ka pa a farnu i a va a si, ka ttang a si. CDM a tuah lomi cung ah kanmah zong nih kan mawhchiat ngai ko. Nain, tlaih in thisen chuah tiang velh a ton hlei ah kan unau Thawng Bawi tiang tho kho lo tiang in a velhmi cung ah a chungkhat kan ngaih a chia ngai ko. Mah tiangtiang hi cu miphun ralkap pakhat nih a tuah awk a si lo tiah kan ruah.
A si khawh ahcun CDF-Thantlang hruaitu le CNF upa hna nih thil sining kan zohfel piak u law a velhtu kan ralkap hi a herh nan ti ning in dan kan tat piak hram ko u tiah zaangfah kan in nawl ko hna. Nanmah hlei in bochan awk dang kan ngei hna lo. Wine a rimi ralkap pakhat tuahsernak ruang ah miphun ralkap CDF kan in zumh hna nak a zor bak lo, miphun le ram caah nunnak thap in rian nan tuanmi cung ah upatnak sang bik kan in pek zungzal ko hna. Ttialtu: Salai Lungthli Tum
