Related Articles
THANTLANG KHUA CIAM KO HMANHSE BAWIPA AHCUN KA LAWM THIAMTHIAM KO LAI BAWIPA nih a kan pek i BAWIPA nih a lak țhan. BAWIPA nih let tampi Thluachuah he a kan pek țhan lai.
Biakinn kan sung, Biakinn ngeitu BAWIPA kan sung lo. Inn kan sung, inn hmun cu kan sung lo. Kan chawva ngeih chiah kan sung, kanmah kan nun kan sung lo. BAWIPA ahcun ka lawm thiamthiam ko lai. Abiapi cemmi pathum, BAWIPA, kan nunnak le kan inn hmun kan ngei ko rih. Hi pathum hmang hin, Thantlang khua cu dawh deuh le rem deuh le lam zong kau deuhin sak le remh a si țhan te lai.
Kan ngaihchiatnak cu ngan ko hmanhse, BAWIPA nih a kan timhpiakmi a ngan deuh. BAWIPA cu ka lawmh thiamthiam ko lai. BAWIPA nih Thantlang khuami vialte le Miphun dawtu vialte hna intuarthiamnak le lungțhawnnak in pe ko hna seh. Thantlang khua nih aman nan peekmi vialte hi, kan Ram le kan Miphun caah Thluachuahnak ah, BAWIPA nih a canter lai i, vantawng in, an sualnak ruangah khulrang in an rawk ko lai. Cucu khuadang tampi himnak a si ko lai.
Thantlang khuami vialte le Miphun dawtu vialte hna, ” kan inn cu zat a kang cang e, Thantlang khua a ciam dih cang e,” tiin thinhung ngaihchia in um hram hlah u. Satan hi caanțha pe hlah usih. Kan Ram kan Miphun caah aman kan pek ti tuin i uang deuh hna usih. BAWIPA cu ka zumh! Hi bantuk ruang ahhin dah kaw, PATHIAN bawmhnak Khuaruahhar cu kan hmuh tuannak a si lai cu! Faro le a ralkapbu hna rili sen ah an thih dihnak hnga, Faro lung a țhawntertu kha BAWIPA a si. BAWIPA nih a onh hna lo ahcun, thil țhalo hi an tuah kho lai lo.
Kan Ram le kan Miphun kan luat khawhnak hnga, Thantlang khua nih aman nan pekmi hi a Ropui tuk! Tuh caan te i nan tuhmi hi, BAWIPA nih Thluachuah an pek hrimhrim hna lai i, khuadang tampi luatnak ah a cang fawn lai. Thantlang khua nih kan Ram le Miphun caah aman tamcem nan pekmi hi ka uang tuk ko. Ahohmanh mawh chiat ding an um lo. Thantlang khua remh țhannak caah a sing 5 ka thawh. BAWIPA ahcun ka lawm thiamthiam ko lai, BAWIPA cu ka lawmh thiamthiam ko lai. Nan unau. Tluang Lian ( Martar). Ttialtu: Tluang Lian (Martar)
A Dang Relchih: Chinram, Mindat peng Rammi Uknak Phu, Fim Cawnnak Department hruainak in khuate 80 leng um ralzaam ngakchia 3343 ca ah ca chimnak an thawk cang.
Cu ngakchia hna ca chimh khawh nakding ah CDM a tuah mi saya/mah hna le taanghra a awng mi hna fonh in minung 433 cu Rammi Uknak Phu, Fim Cawnnak Department nih training a pek hna i ca an chimh hna tiah kan theih. “Ca cawn kan thawknak hi zarh thum hrawng a si cang. Saya/mah 400 leng kha an kan then i training an kan pek. Atu hin cun round 4 nak an dih a si. Mah khawh zong in training peknak a um rih lai. Training aa lim cang mi hi 100 leng an si cang” tiah Mindat Rammi Uknak phu in chimnak nawlngeitu Salai Zaw Mang nih a chim.
Ralzaam ngakchia hna caah cun ca an cawn khawh mi hi lungthin in taksa lei tiang a thanchotertu a si tiah a chim.
“Ka i a um mi ngakchia hna nih an thinlung in ralzaam kan si ti ruahnak philh in ca an cawng, lente an i celh, fimnak zong an hmu. Mah pawl hi annih ca ah a lam kip in a herh tuk mi a si. Ngandam, fimnak lei in kaar kan hlaanter hna, kan bawmhchanh hna, thazaang kan pek hna khi a si ko” tiah a chimchap.
Yaw peng i a phan mi ralzaam ngakchia hna ca zong ah Mindat Emergency Response Team nih thazaang bawmh in fimcawnnak lei zong an tawlrel lio a si tiah kan theih. “Yaw peng lei ralzaam ngakchia hna ca fim cawnnak lei timhlamhnak pakhat kan ngei. Yaw peng kan ti ko nain a taktak kan bawmh khawh mi cu Kyaukhtuh peng pakhat lawng a um rih.
A taang mi Yaw peng ah Htilin, Gangaw peng ralzaam ngakchia hna caah kan i phakzawk rih lo caah kan tuah kho rih lo. Atu ah cun Kyaukhuh lei lawng kan tuah khawh rih” tiah Mindat Emergency Response Team in nawlngeitu pakhat nih a chim. Credit: The Hakha Post
