Related Articles
Chinram, Mindat peng Rammi Uknak Phu, Fim Cawnnak Department hruainak in khuate 80 leng um ralzaam ngakchia 3343 ca ah ca chimnak an thawk cang.
Cu ngakchia hna ca chimh khawh nakding ah CDM a tuah mi saya/mah hna le taanghra a awng mi hna fonh in minung 433 cu Rammi Uknak Phu, Fim Cawnnak Department nih training a pek hna i ca an chimh hna tiah kan theih. “Ca cawn kan thawknak hi zarh thum hrawng a si cang. Saya/mah 400 leng kha an kan then i training an kan pek. Atu hin cun round 4 nak an dih a si. Mah khawh zong in training peknak a um rih lai. Training aa lim cang mi hi 100 leng an si cang” tiah Mindat Rammi Uknak phu in chimnak nawlngeitu Salai Zaw Mang nih a chim.
Ralzaam ngakchia hna caah cun ca an cawn khawh mi hi lungthin in taksa lei tiang a thanchotertu a si tiah a chim.
“Ka i a um mi ngakchia hna nih an thinlung in ralzaam kan si ti ruahnak philh in ca an cawng, lente an i celh, fimnak zong an hmu. Mah pawl hi annih ca ah a lam kip in a herh tuk mi a si. Ngandam, fimnak lei in kaar kan hlaanter hna, kan bawmhchanh hna, thazaang kan pek hna khi a si ko” tiah a chimchap.
Yaw peng i a phan mi ralzaam ngakchia hna ca zong ah Mindat Emergency Response Team nih thazaang bawmh in fimcawnnak lei zong an tawlrel lio a si tiah kan theih. “Yaw peng lei ralzaam ngakchia hna ca fim cawnnak lei timhlamhnak pakhat kan ngei. Yaw peng kan ti ko nain a taktak kan bawmh khawh mi cu Kyaukhtuh peng pakhat lawng a um rih.
A taang mi Yaw peng ah Htilin, Gangaw peng ralzaam ngakchia hna caah kan i phakzawk rih lo caah kan tuah kho rih lo. Atu ah cun Kyaukhuh lei lawng kan tuah khawh rih” tiah Mindat Emergency Response Team in nawlngeitu pakhat nih a chim. Credit: The Hakha Post
A Dang Relchih: NUG nih EAOs he fonh in raldohnak lei committee a ser NUG le tlangcung hriamtlai phu (EAOs) i bawmh in raldoh tinak caah committe pakhat an ser. Cu Committee cu Central Command and Coordination Committee an ti i, a tawinak in C3C tiin an auh tiah Myanmar Now nih nihin 28 October 2021 ah a tial.
NUG he ser mi committee ah tlangcung hriamtlai phu in zei pawl dah an i tel timi cu NUG humhimnak zung (ministry of defense) in chungtuan a si mi U Naing Htoo Aung nih a chim chih lo. NUG tang ummi PDF le tlangcun hraimtlai paoh hmun khat ah raldohti khawhnak ding ah ralkap lei uknak zong kalti kho ding in timh tuah a si. Ralkap hruainak lei committee zong a dotdot in kan ser cuahmah tiah U Naing Aung Htoo nih a chim.
“Committee ah NUG cozah i humhimnak lei in ralkap lei tuanvo ngeitu kan in tel bantuk in tlangcung hriamtlai phu in ralkap lei tuanvo ngeitu, hruaitu an i tel ve. Tangti le i bawmh in ralhrang kan doh ti lai,” tiah U Naing Htoo Aung nih a chim. NUG he Kawl ralkap ralhrang dohti ding ah tlangcung hriamtlai tamdeuh cu an i lai nain, aa tel rih lo mi cheukhat an um caah aa tel mi an min an langhter rih lo. A dang tlangcung mi hriamtlai pawl tel khawh nakding ah ceihmaihnak kan ngeih lio a si tiah NUG nih thawng a thanh.
“Kan i timhnak leng in NUG tang ah a ummi ralkap abik in PDF a let in kan karh. Cun NUG zong nih biatak te in hriamlei zalhpiak le bawmh khawh zong kan tawlrel cuahmah. Kan i ruah leng in rian kan tuan kho ko,” tiah U Naing Htoo Aung nih cun a chim. Crd: The Chinland Post
