Related Articles
Ralhrang Nih Rialti Khua Pawng Thlanrawn Khua Zong An Khangh Hoi Cang, Thawng Kan Theih Tiangah Inn 3 An Khangh Cang, Inn Dang Zong Khangh An Timh.
Oct 14, tuzingah Rialti khua pawng (Rialti in Hakha lei ah a ummi) Thlanrawn khua cu ralhrang nih an khangh tiah thawng kan theih. Inn 3 cu vutcam ah an cang cang i inn dang zong khangh thluamah an timh tiah theih a si. Oct 13, nizan ah ralhrang nih Falam peng Rialti khua ah inn 8 an khangh i Oct 14, tuzing ah biakinn, kudawng le inn pakhat an khangh than.
Rialti khua cu meikangh lo mi inn 3 te lawng a tang cang. Khuami hna cu a him nak hmun ah an zaam. Ralhrang hna cu nizanah Falam in an chuak i Rialti khua ah an riak i tuzing ah Hakha lei ah an i thawh. Credit: The Chin Post.
A Dang Relchih: Nihin cu Miphun pi nih CNF/CNA caah rawlulh thlacamnak ngeih cio a si bantukin nihin in kahdoh an thok colh ve. Hi kahdohnak ah miphun pi thlacamnak cu kan biak Pathian nih a takin a kan leh. Nihin Hniarlawn kahdohnak ah ralhraang lei in minung 5 an thi tiah tu tiang thawng theih ning a si i, Chin ralkap lei cun aa hliam mi hmanh an um lo tiah theih a si.
The Hakha Times nih cun ti hin a langhter “Nihin Hniarlawn kahdohnak ah SAC ralkap 5 an thi. Nihin October 13 kahdohnak ah CNA+CDF nih SAC ralkap 5 an kahthah hna, tiah kan theih. “Hi kahnak ah a thi mi cu 5 an si. Hliamh mi cu an um len ko. Kanmah CNA le CDF lei in aa hliamkhuai mi kan um lo,” tiah CNF Chimnak Nawlngeitu Salai Htet Ni nih The Hakha Times ah a chim. Hi kahnak hi October 13, 10:30 AM hrawng ah a cang mi a si i Hniarlawn khuami minung 4 zong SAC ralkap nih an tlaih hna, tiah kan theih.” tin an langhter ning cu a si.
The Chin Journal zong nih tihin a langhter ve “Hniarlawnthar pawng Kahdohnak ah SAC Ralhrang 5 Thi. Nihin zinglei sml. 10:00 AM hrawng in aa thawkmi Hniarlawnthar pawng kahdohnak ah SAC ralhrang lei in minung 5 an thi, tiah CNF chimnak nawlngei Salai Htet Ni nih a chim.
“Hniarlawnthar pawng ah zinglei sml. 10:00 hrawng in i kahnak a um i, SAC ralhrang lei in minung 5 an thi. Kanmah CNA/CDF lei in mithi/thliampu kan um lo. Hmaitonh in kan i kap ti awk ngaingai a ttha lo. Anmah lei nih cun kahthlorh in an kah,” tiah Khonumthung ah a chim.
Hniarlawnthar ah kum 13 pa ngakchia pakhat telh in minung 4 zong SAC ralharng nih an tlaih hna. “Khua ah um ngam a si ti lo caah hmundang ah kan i tthial chung pah dih ko,” tiah Hniarlawnthar pastor pakhat nih The Chin Journal ah a chim.” ti’n an langhter ve.
