Related Articles
Mizoram ah a dormi Chin mi pakhat hri awh nak in a nunnak a liam Chin ramkulh, Tonzaang peng in Camphai khua ah aa dormi hna riahbuk pakhat ah a ummi U Khin Zam Kim(kum-36) cu amah le mah hri awhnak in a nunnak a la tiah theih a si.
U Khin Zam Kim cu Tonzaang peng Ruamzan khuami a si i Camphai ah aa dornak thlakhat hrawng a si cang, chungkhar a then mi a si caah lungrawhnak a ngei tiah theih a si. Nunnak a liammi U Khin Zam Kim cu fanu 3 a ngei mi a si, a ruak cu October 4, ah Camphai khua ah Zomi Welfare Committee, Champhai nih ruak vui nak an tuah tiah theih a si. Credit: The Chin Post
A Dang Reltthan: Upatmi CDF-Thantlang hruaitu hna, Pu Sang Kian(Tlangpi, anupi Zephai) hi Thantlang peng fimcawnnak zung cazi lutlai a si i chungkhar harsat ruang ah CDM a tuah kho lo, a fanu 2 lawng CDM an tuah khawh. CDM a tuah lomi CDF nih an tlaih cio hna caah Pu Sang Kian zong CDF minung 6 hrawng nih a zamnak Tlangpi ah an rak lak ve. A fale nih a thil zong tha tein an timh piak i an kalter ve ko. Amah zong nih phunzai lo tein a zulh ve ko hna.
Khua lonh ah CDF ralkap nih an pakhat he an chiah tak chung hna i anmah cu khuachung ah wine an ding ta. An rit hnu ah an hruaitu pakhat nih Pu Sang Kian cu ‘CDM na tuah duh lo’ tiin a velh, cuti a velh lio ah cun thil chanh ding a ra thanmi Mang Thawng(Farrawn khuami, Pu Sang Kian a fanu vapa) nih a hmuh hna i a thlauh. Nain, Mang Thawng(amah zong hi CDM a tuahmi a si) zong cu a velh ve. Meithal he a si hlei ah a meithal in a hmuaih chih hna caah an let ngam lo, a duh chung in a velh hna i Pu Sang Kian cu a hnarthi a chuak, Mang Thawng cu fak tuk in a velh caah a hmai zong a kuai dih i tuhi a tho kho lo, drip an thlaih lio a si.
Pu Sang Kian cu a thi he CDF ralkap nih cun an kalpi i atu hi CDF sin ah a um ko. A velhtu CDF ralkap hi tanghra a rak kai lio ah Mang Thawng lila nih ca a rak chimhmi a si. A pa cu pastor a si. Security vennak caah a khua le a min cu langhter awk a tha lai lo. Pu Sang Kian CDM a tuah lomi cu a hman, CDM a tuah lo caah an kalpi i phunzai lo tein a zulh ko hna. Nain, dalan bantuk cu a si hrimhrim lo. A fale nih zeitluk in dah CDF thazaang an pek timi cu nanmah CDF-Thantlang nih fiang tein nan thei dihmi a si ko.
Pu Sang Kian hi keimah ka pa a farnu i a va a si, ka ttang a si. CDM a tuah lomi cung ah kanmah zong nih kan mawhchiat ngai ko. Nain, tlaih in thisen chuah tiang velh a ton hlei ah kan unau Thawng Bawi tiang tho kho lo tiang in a velhmi cung ah a chungkhat kan ngaih a chia ngai ko. Mah tiangtiang hi cu miphun ralkap pakhat nih a tuah awk a si lo tiah kan ruah.
A si khawh ahcun CDF-Thantlang hruaitu le CNF upa hna nih thil sining kan zohfel piak u law a velhtu kan ralkap hi a herh nan ti ning in dan kan tat piak hram ko u tiah zaangfah kan in nawl ko hna. Nanmah hlei in bochan awk dang kan ngei hna lo. Wine a rimi ralkap pakhat tuahsernak ruang ah miphun ralkap CDF kan in zumh hna nak a zor bak lo, miphun le ram caah nunnak thap in rian nan tuanmi cung ah upatnak sang bik kan in pek zungzal ko hna. Ttialtu: Salai Lungthli Tum
