Related Articles
Nihin kahdohnak thawngpang theih cu a nuam taktak khi si. Chin ramchung kahdohnak vialte lakah ralhraang a thi mi an tam cem ttum a si lai ti usih law kan palh lai lo. Kalay peng kahdohnak zongah cu tthiamtthiam ralhraang minung 50 hrawng an kahthah hna.
Matupi-Mindat karlak kahdohnak zongah ralhraang lei in minung 40 in 50 kar an thi fawn. Cu caah nihin kahdohnak thawngpang theih cu a nuam hringhran i kan Pathian hi thangtthat lo awk a ttha lo. Hriam a tlai lo mi, ramkip i a um mi Chin miphun dih lak zong nih thlacam daithlang hlah usih, ttang ttualmal rih ko hna usih.
CDF-Matupi lei zong nih ralhraang mawtaw bomb in an puahhnawh hna i ralhraang minung 20 an thi i minung 15 hrawng nih hliamhma an pu tiah theih a si, a tawifiannak CDF-Matupi nih statement an chuah ning ahcun tihin a si “CDF-Matupi Nih Ralhrang minung 20 bomb in an thah hna, 10 hliam an tuar.” ti’n an rak langhter.
Hmanhsehlaw nihin kahdohnak ah kan pu a si mi le CDF-Mindat nih bochan ngaingai mi kum 73 a si cangmi nih Mindat-Matupi kar kahdohnak ah hriamngan nih a khen i vanchiat ah a nunnak a liam. Chin miphun nih upatnak kan pek pin ah tantaakmi an chungkhar Pathian nih hnem ko hna seh.
A Dang Relchih: Tutan kan rak langhtermi hi Ralbawi Solomon nih Vaurawng Zuunthil ah a rak chim cangmi kha a si. A tu ah a thar in kan rak nolh tthan zeicatiah naihrawng Laitlang thil a cangmi he aa pehtlai ngaingai caah a si. Laitlang ah SAC ralhraang tampi an rak lut thluahmah cang, Victoria Camp zong laak an timh tiah theih a si cucu Dr Lian Hmung Sakhong hmurka zong a si fawn. Pin ah Thantlang thawngpang nih Lai miphun a kan zawt dih. Cu tikah tutan Pu Solomon biachim mi nih hin Laimi thinlung tampi a dam ter lai i thazaang zong kan i laak cio ttheu lai tiah zumh a um. Pu Solomon le Dr Lian Hmung Sakhong nih cun an kan tei lai lo an ti. Ralbawi Solomon nih a pehtthan rihmi cu Vanlawng zong ra seh Tank zong ra seh an hmun ah an rawk lai ti kha a chim.
Ralbawi Solomon nih a chim mi cu “Nihin ni ah hin kan lungfaak kan ai puang a sinain hihi kan lungdong maw ti ahcun dong hlah kan nih Chin miphun ai timi paoh nih zeitik hmanh ah lungdongh a hmangmi miphun kan si loh. Kan pupa chan in hibantuk minung a thatmi ral hi nihin ni tiang kan doh pengmi a si ko, Japan siseh Mirang siseh Kawl siseh Laimi nih ral kan doh peng ko lungdongh timi a um bal lo. Cu caah cun an thil tuahmi hi zoh ko ulaw minung lungthin a ngei lomi hna minung tuahto mi a si. Kan dai kho maimai lai lo.” tiah a chim.
Biaknak lei ah bochanmi hna sin in tlawmpal an lungtlin lo nak le kan hmuhmi tiah a chim mi zong a um i, mah hihi ruahdamhnak cun tthenkhat kan Pastor le nih raldoh a hau lo thlacam a zaa ko tiah a ti mi deuh pawl chim hnawhnak a si lai dah, a ti mi cu “CDF kan mino hriam aa tlaihmi vialte nan dihlak nan theih dingah kan mifim kan pa le pastor hna zong hi hriam an tlai ve e ti hi rak kan theihpi ulaw ti hi ka duh. Training hi February thla 1 in nihin ni tiang cat lo tein kan peek peng hna. An um nak hmun cio ah training pe kho dingmi kan thlah hna i cutin cun nihin ni tiang training peek an si. Cu caah cun hi ral kan dohmi hi a dikmi ral kan doh.
A si nain nihin ni ah tlawmpal te a taangmi cu Khrihfabu hna kan pastor te hna, hihi kan i fiang rih rua lo tiah hi ka hin kan hmuhnak tete a um. Solomon hi minung a si. Minung hi first kan si. Solomon nih a zumhmi hi cu Khrihfa a si. A duhmi biaknak paoh a zumh khawh. Amahbelte keimah Solomon a dih ahcun ka biaknak hi a dih ve ko. A nunphung a dih ko cu caah cun nihin ah zeiruang ah dah miphun pi nih dothlennak kan tuah lio ah biaknak lei in a theithiam lo mi kan um rih hi a poi ka ti tuk. Miphun a thih ahcun a biaknak a thi ve. A zumhnak le a nunphung vialte a dih cu caah cun hi ral kan dohmi hi a dik ka ti nak cu a si.” ti’n a chim ning cu a si.
Cun Chin ram lawng si loh Chinland vialte chung i a um mi hmun paoh kan laak dih lai ti zong a chim rih, uar a um kho taktak “Chinland chung um mi Mindat, Kanpetlet, Matupi, Paletwa, Hakha, Thantlang, Falam, Tonzang, Tedim pin ah Kalay Valley Gangaw hi vialte CDF he hin kan i tong dih cang, kan i hmu dih cang. Nihin caan thil kan tonmi hi Kawl holh hi hlan ahcun Ralpi a si rih lo kaddohnak lawng a si rih. Kan Chinland vialte hi a tu tlawmpal ah nan theih dih lai kan laak dih lai.
A tu kan tonmi nak in a let in kan ton rih lai. Ton din zongin ready kan si zeitik hmanh ah hnu kan kir lai loh. Hmailei tu nawrh thluahmah ding a si cang. Nihin ni ah Chin mi tuanbia tubantukin Chin mi aa fuuntom mi kan um loh. Cu caah kan i tlaihmi, kan ngeihmi hriam in kan tthuat hna lai. An duh le vanlawng ra seh an duh le Tank zong ra seh an hmunhma ah an rawk lai zeicaah zumtu ttha kan si zeicaah Sehtan ral kan do. Zeitik hmanh ah Sehtan nih cun zumtu ttha cu a tei bal loh. Cu caah cun Chin mi kan si Khrihfa miphun kan si Sehtan nih an kan tei lai lo. Jesuh Khrih a nungmi Pathian a ngeimi miphun kan si. Khibantuk mi luklak nih an kan tei dingmi miphun kan si loh.” tiah duhfahnak taktak a chim.
Cattialtu hmurka: Kan Chin miphun nih kan i ngeihmi CNF si ah CDF hi thazaang pe ko hna usih. Chawva ngeihchiah in kan ti khawh lo hmanh ah nifatin kan thlacamnak ahcun telh peng hna usih. Talk Show an tuahnak ah a chim mi tampi chung in kan theih tawk le a tawifiannak in kan rak ttial chin mi a si. Tlamtlin lo nak tampi a um lai. Theihthiamnak he.
