Related Articles
Thantlang khua ah inn an khangh than Nihin November ni 24 zaan lei suimilam 3:30n hrawng ah Thantlang khua inn an khangh than tiah kan theih.
Inn a khangh nak hmun hi Thantlang thlang lei deuh ah si dawh asi, alanghlat in a si caah kan fiang kho ve lo, inn zei zah dah akang ti mi kong zong fiangin kan thei kho rih lo, mei cu akang cuah mah ko, Hi inn khang tu hi ralhrang nih an tuah mi si, khua chung ah ralhrang dah ti lo mizei hmanh an um ti lo tiah alangtlang in mit hmutu pakhat nih The Chin Post ah achim.
Ralhrang nih uk nak an lak hnu Thantlang khua ah inn an khangh hi avoi 7 nak asi cang, inn 200 renglo aciam cang. Credit: The Chin Post
A Dang Relchih: Mandalay ah ralhrang phu nih an hriam hmuhsak in lam ah cycle he a chawk mi mipi hna cu tlerhkhonh in phaisa an hal hna, hmunhma kip ah dantatnak an tuah hna tiah theih a si. Ralhrang kuttang um thuamsawh hruk in hriamtlai mi hna, motor pi-ke le si-pin riantuan tu hna i fon in, mipi cycle cu an chuh hna, dantatnak an tuah hna cheukhat checkhlat an tong tiah, cheukhat pumpak checkhlat a tong mi hna nih an chim.
” Riantuan in ku-li lek mi an umkal nak cu a hlei in checknak an tuah, mask a bunh mi cu an tlaih hna i mask bunh lo in a kalmi zong tlaih an tong thiam. Cycle cung minung 2 a phirhmi cu tlaih an si. Dat-sii man a kai tuk caah minung 2 phirh in riantuan kan kal, kan cycle cu an kan chuh, phaisa kan i ken ah cun hlam colh a ngah na in phaisa kenlo ah cun kan cycle cu an kan chuh” tiah Mandalay khuachung ummi pakhat nih a chim.
Phaisa pe kho lo mi cycle hna cu Mandala- Tirih-zaangleknak hmun chung ah an fim i phaisa in tlanhthan a si lai tah motor pi-ke he a pehtlaimi hna sin in theih a si. Cun checkhlat a tongmi mipi hna cu ralhrang nih an hriam hmuhsak in an tlerhkhonh hna. A tu ah ralhrang phu hna nih mizapi lam ah an hriam hmuhsak in tlerhkhonh nak le checkhlatnak an tuah hna,an cycle zong chuh an ton caah cheukhat ku-li lek in paw a cawmmi hna cu riantuan kal i thawh ah thin phang ngai a si tiah khuami hna nih an chim.
