Related Articles
Aung La Nsang hi cu chim hau loin Kawlram miphun nih cun kan theih dih ngawt ko lai. A nih hi Kawlram, Kachin chuak a si i USA ah nupi le fale he khua a sa cuahmah mi a si. One Championship ah Middleweight le Light heavyweight divisions in aa thawngmi a si.
Cun ONE Middleweight World Champion le ONE Light Heavyweight World Champion taisawmh a rak keng/la bal cangmi pa tthawng a rak si. Tutan Min Aung Hlaing le a ralhraang hna nih Kawlram nawlngeihnak an laak mi ah Social media platform in heh tiah duhlonak a rak langhter i a rak aukhuang ve mi a si. Nizaan Aung San Suh Kyi le Win Myint thong thlak dingmi kongah a lungfahnak zong a rak langhter.
Aung La Instagram ah cun kan Pi Aung San Suh Kyi hmanthlak cu aa tar i a tanglei caption ah “nihin cu ka lungfaak tuk hringhran ee, Kum 76 a si cang ee” ( I am very sad today, She’s 76 yrs old). Hi kong he pehtlai in Kawlram miphun cu kan lung a faak i kan ngaih a chia cio, Aung La Nsang zong a celh ve hrim loh ti a lang.
Dothlennak Muru Kong Relchih: Kan Dothlennak Muru Tutan dothlennak hi NLD le Ralkap karlak idohnak sawsawh a si lo. Asen le ahring i dohnak lawng zong a si ti lo. Kawl ralkap le tlangcung mi hriamtlai hna idohnak tiang lawng zong a si ti lo. Mi zeihmanh nih nanmah sahrang hna uknak tangah um kan duh hrimhrim ti lo. Nan hrihhram vialte kan in bongh dih hna lai. Kan tei hlan lo kan ngol ti lai lo” ti khi tutan dothlennak i a muru taktak cu a si.
2008 phunghrampi cu nan himnak caah nanmah duhning tein kum 14 renglo nan i suai, rampi hluttaw, ramkulh le ramthen hluttaw ah 25% thudan nan i laak cia lawng a si lo, Vice President thutdan nan i laak chap, Defense, Home Affair le Border Affair vuanci thutdan zong nan i laak rih. National Defense and Security Council [ NDSC ] ah thutdan tam deuh nan i laak cia fawn, mah zong cu nan i za hlei lo, nan haap a kau tuk kuakchuak.
Kawlram sipuazi a muru a simi, sui le ngun lungvar vialte ralkap nih nan tlaih dih, nan fir i nan i rumnak dih. Rammi thi nan kan dawh, kan ram vawlei tang thil chuak man ngei vialte nanmah ralhrang le nan tefa hna nih nan tlaih dih, nan ei dih. Kawlram a thin le lung vialte nan i laak dih, mah vialte hi za cikcek seh, kan dih dongh tiang in kan i phomh cang lai. kan in tei hna lo hlan kan ngol ti lai lo. Nan hram kan bongh hna lai i, mei phu chungah kan kangh dih cikcek lai ti khi a si.
Tlangcung mi hna zong nih Kum 70 renglo kan khel cangmi kan covo vialte hi tutan dothlennak ah kan laak chih lawlaw lai. Tlangcung mi caah democracy sawsawh kan caah sanlati a si lo, tlangcung mi hna nih kan ngeihmi kan covo vialte, panglung hnatlaknak nign tein kan duhmi federal kan laak than lai ti khi tutan dothlennak i a muru cu a si. Aung San Suu Kyi le U Win Myint thong chung in nan thlah hna hmanh ah kan duhmi democracy le federal kan ngah lo ahcun kan ngol hlei lai lo. 2008 phunghrampi hrimhrim kan cohlang kho ti lo.
A kangh bak in kan khangh chih lai. Aung San Suu Kyi nih a kan thlauh zongah kan ngol hlei lai lo, nanmah ralhrang hna kut tangah kum 2 cu chim lo, nikhat hmanh um kan duh lo, nanmah ralhrang hna nih hranhram in nan laakmi power le rampi chaw le va nan firmi nan ngeichiah zong kan laak chih lai. Mipi cungah nan tuahsernak vialte nanmah cungah a tlun lo hlan kan ngol lai lo ti khi tutan kan dothlennak a muru cu a si. Credit: Salai Lairamthang
