Related Articles
Hakha Peng ah CDF-Hakha Dah Lo Hriamtlaiphu Um Khawh A Si Lonak le Senthang CDF Kong Statement
CDF-Hakha cu ralhrang uknak in kan miphun le ram a luat khawh nakhnga caah Hakha peng dihlak caah tuahmi a si. Asinain Battalion 2 hruaitu hna nih 2021 September 23 ni thok in Senthang CDF kan dirh cang tiah Battalion 2 cu a min an thlen i anmah duh paoh in kal an i tim.
Battalion 2 ah um a duhmi le Senthang CDF in um a duhmi karlak ah CDF-Hakha nih nemnak tein tawlrel a si. Cucaah 2021 October 19-20 ah hruaitu tonnak kan tuah i General meeting i au sehlaw an biachahnak kan zulh lai, tiah ceihhmai le lungtlinnak kan ngei. Cuticun 2021 October 26 ah General meeting cu auh a si i meeting kai ding sawmmi chungin 84.4% an kai. An dihlak lungtling consensus in CDF-Hakha Battalion 2 (Senthang) tiin kan um lai i CDF-Hakha ah kan um ko lai, tiah biachahnak tuah a si.
Cu hnuah 2021 November 13-14 tonnak ah CDF-Hakha nih Hakha peng ah hriamtlaiphu dang ser, um le cawlcangh khawh a si lo, tiah dihlak lungtling consensus in policy a fehter than. Cucaah a tanglei bantukin mizapi sinah thawngthanhnak kan in tuah hna: 1. Hakha peng ah CNF/A le CDF-Hakha dah ti lo hriamtlaiphu ser, um le cawlcangh khawh a si lo, 2. Cun anmah General meeting lungtlinnak bantuk in Senthang CDF cu a um ti lo, Cu policy le General meeting biachahnak a zul lomi cu dothlennak, mizapi le CDF-Hakha i kan sizungyi le kan i thithruainak a hrawktu le mizapi ca zong ah tih a nungmi an si caah policy ning tein action lak ding a si.
Cu bantukin nawl a ngai lomi hna an um ahcun CDF-Hakha theihpinak tel loin ahohmanh nih pehtlaih, cohlan le riantuan tinak ti bantuk nan ngeih nakhgna lo thawng kan in thanh fawn hna. Source: Chinland Defense Force – Hakha
A Dang Relchih: 10 months of failed coup MAH nih hramhram in uknak lak ai timh le kan dohnak thla 10 khengte kan phan. Mipi nih kan duhlo mi le kan doh mi cu hmual a ngei taktak. Kan mah Mipi zong kan tuar taktak ve. Asi nain mipi nih kan lung kan tthul lo. Kan ttang chinchin, kan tthawng chinchin. SAC le MAH ralhrang ram chung zong ah do an tla lo, ram leng zong ah do an tla lo chin lengmang.
Thla 10 cu minu nau a pawi mi hei si she law nau te a chuak diam ding asi cang. Asi na in MAH nih a hrin duh mi nau hi thla 10 tiang ah ai sem rih lo ti khhawh asi. Zeica tiah political umtu ning ah Coup hi dot 3 in kal pi asi tawn.
1. Control; Rampi mi mipi le political party pawl kha control khawh. 2. Stabilize: Rampi le mipi kha daite in um ter khawh I ram uknak mechanism vialte an mah le an si ning te in rianttuan ter khawh. 3. Implementation of Agenda; mah hi cu uknak a la tu hna nih an duh mi le an itinh mi lohma chuak lak in kalpi kha asi tawn. Asi na in atu MAH le SAC ralhrang nih cun a dotkhat nak asimi Ram mipi control hmanh kha thla 10 hnu tiang ah a tuah kho rih lo. Ram pakhat I a nawl neih nak cu mipi sin ah a um mi asi timi cu tutan ah hin fiangte in kan langhter khawh.
Nizan ah UN General Secretary Special Envoy on Burma office in ttuanvo nei tu hna he ton biaruah nak suimilam 2 renglo biaruah nak kan nei. Cu I an kan chimh mi cu; Atu lio ah ramdang in Burma ram ah Ambassador an rak chiah mi hna ram 8 nih an Ambassador pawl kha an term a dih cang I an ram ah kir in ambassador thar rak thlah ding an si cang. Asi na in cu ram 8 nih cun Ambassador thar an thlah duh lo, zeica tiah ambassador thar rak thlah I MAH le SAC ralhrang sin in ram aiawh tu sinak Ambassador Credential pek kha an duh lo caah asi an ti ( UK nih cun Anbassador a rak thlah na in MAH le SAC ralhrang sin ah Credential a pe duh lo).
UN Special Envoy on Myanmar athar Singapore nu kha atu December thla in a rian a thok ding a si. Chin ralzam le IDP kong zong ah fak ngai in ttan kan la lai an kan ti caah kan hna a ngam. Zalon nak lam kan ithim mi asi. A fawi lai lo ti zong kan theih cia. A har lai ti zong kan theih cia. Kan tem lai, kan tuar lai ti zong kan theih cia asi. Asi na in minung caah a sunglawi bik mi cu zalonnak asi. A sung lawi bik mi asi caah a man a fak bik ve.
Hmanthlak; CNF i CC member Pu Thang Yen (Matupi) CNA/F ah kum 30 renglo dothlannak rian ah fekte in a ttuan mi asi caah CNF nih Revolutionary Medal an pek mi kha an nu nih a ttang ah a benh piak lio an i theilo kar ah hman ka thlak mi hna asi. Credit: Salai Bawi Lian Mang
