Related Articles
Yangon Thiar Mingalar Market ah bomb a puak i minung pakhat a ke ah hliamhma a tuar. Yangon Tai, Hlaing Myone, Thiar Mingalar Market ah nihin zaanlei suimilam 6:46 PM ah bomb a puak i minung pakhat hliamhma faak tuk loin a tuar tiah Yangon Khit Thit Media ah a chim.
Hi bomb a puakmi hi Mawtaw a nganmi (Truck) tang in a puak i a puah thawng cu a thang tuk lo, a pawng um mi minung pakhat hliamhma a tuar. Hi bomb a puahnak hmun ah, a puah hlan deuh te ah Sipin ( Kawl Cozah ) rianttuantu tthenkhat le mi a cheu kan hmuh hna tiah a hmutu pakhat nih a chim. Bomb hi cu a faak phun a si lo i diin te lawngin a puak, hliamhma a tuarmi zong hi a nun veennak caah thinphaan ding a um lo, a ke ah hliamhma a tuar hi a si.
“A mak ngaimi pakhat cu hi bomb a puah hlan ah Sipin Wantthan le mi cheukhat an i chawh leen kan hmuhmi hna cu a mak ngai tiah pawngkam dawr ngeitu hna nih an chim. An mah pawl i an kutneh a si lai tiah an zumh” tiah dawrhngak pakhat nih a chim. Ref: KTM
A Dang Relchih: Kawl ralhraang nih nawlngeihnak an laak hnu in nihin ni tiang, cu nawlngeihnak ttha lo cu mah le sikhawh tawk cio, miphun kip nih sui, ngun, chawva in siseh nunnak tiang pekin cutin duhdim te le zalennak hmuhkhawhnak ding caah cawlcangh cio a si.
Cu Kawl ralkap nih nawlngeihnak an laak le tlawmpal ah miphun hoih in siseh pengtlang hoih in siseh ralkap dirh cio a hung si. Chin ramchung ah hin cun Chinland Defence Fore tiah min hrambunh in pengtlang kip ah dirh a si i cucu CNF/A hruainak tangah cawlcangmi an si hna tiah theih a si. Falam belte hi Chin National Defence Force tiah min an i bunh ve. Cuticun ralhraang hna cu nunnak thaap tiangin doh cio an hung si. Hi ti’n ralkap dirh cio a si tikah kan mah le mah karlak hna ah i hmuhthiam lo nak hna um sual hnga maw ti’n thin rak i domh cio a si i kan i tinh/timh mi kan kheng sual lai lo ti phan a um ngaingai.
Cu he petlai in kan unau Mara miphun nih nizaan tihni te ah khan “Mara Army” tiah minbunh in ralkap thar an hung dirh tthan. Mara-CDF hi a um cang ko lo hme maw tiah kan ruah cio, amahbelte hi thawngpang kan hung theih tthan tikah zei sullam le ruang in dah dirh a si hnga ti cu theih kan duh cio, asinain cucu an mah facebook page ah zeihmanh langhternak a um hraw rih lo. Hi an dirhnak hi December 21th ah khan an mah facebook page ah an rak tarlangh cang i “Mara Army” kan dirh timi thanhnak an rak tuah. Hi hi Chin miphun caah a herh ko na ti maw si loah a herh lo na ti dah?
Zeicatiah nai thawng kan theih ning hmanh ah Senthang-CDF zong Hakha-CDF hruainak tang um loin mah tein i tthithruai an duhnak kong te hna theih a si. Hi ti kan chim tikah pakhat le khat kar ah buainak chuak seh ti duh ah chim/ttialmi pakhat hmanh aa tel lo. Hmailei tuah hi ralkap kan dirh cio mi nih hin pakhat le khat tu tthencheunak a chuahter sual lai kaw kan ti caah a si. Tutan dothlennak ah kan herh bikmi cu lungrual hi a si tikah pakhat le khat kar ah hmuhthiamlonak a um ahcun kan raal pi cu kan tei kho hnga lo. Tutan Mara ralkap an hung dirh le bang hi cu aa phun dang ngai zeicatiah Army ti kha telh a si cang.
Chin ramchung ah hin cun CNF/A hi kan Ralkap (Army) cu an si bik ko lo hme maw, hi hlei Army dang dirh tthan cu a hau hme maw tiah biathli a leeng ngaingai. Cu caah cun kan ralkap (army) CNF/A kuttang tu ah hin Army si loin Force deuh hna in min ibunh kho sehlaw thinlung zaang a dam deuh hnga. Zeicatiah hibantuk thil hme tete nih hin miphun a khehkhuai tawn. Lungrual te tuin um hna sihlaw kan dohmi Ralhraang tu hi i fiang cikcek ko hna usih.
