Related Articles
Kantbulu khua, nizaan ah ralhraang minung 10 an thi, Taw Nyi Naung le KBU Tiger timi phu ifonh in an kah hna, Kawlin timi khua ah bomb hmanhmi nih a puahhnawh hna i ralhraang bawi pahnih telh in minung 3 hma an tuar.
Sagaing Region, Kantbulu myone ah nizaan ralhraang minung 10 an thihmi kongah Taw Nyi Naung le KBU Tiger phu ifonh in an kahnak hna ruangah a si tiah Kanbulu-PDF nih cathanh an chuah. December 3 ah Kyunhla lei in a rak kaimi ralkap minung 5 cu cycle pathum in KBU Taw Nyi Naung le KBU Tiger ifonh in khua pahnih karlak ah bomb in an chehnak hna kong le an ikahdohnak ruangah ralkap pakhat cycle cung in a tla i hliamhma faak piin a tuar caah a nunnak tiang liam tiah theih a si.
Cu tlawmpal ah Chatpat Thin sakhaan lei in ralkap minung 40 tluk cu mawtaw pakhat in an rak kai i Chat Kyi khua le Pintha khua karlak ah bomb hmanhmi(mine) nih a rak puahhnawh hna i minung 9 an thi, 11 hliam an tuar, hliam a tuarmi hna lak ah minung 5 cu an hliamtuar a fah ngai caah Monywa Ralkap sizung ah an kuat hna.
Sagaing Region, Kawlin myo i a um mi Kawl phungki biakinn hnung lei i duty a ciahmi ralkap minung 5 cu nizaan December 4 zinglei ah The Secret Warriors-Kawlin timi phu nih bomb in an puahhnawh hna i ralkap bawi pahnih telh in minung 3 hliam an tuar tiah theih a si.
Kawlin khua mipi humhimtu nih an kah hna ruangah Deputy Chief of Police Min Tun, Kyaw Naing Soe le Sianginn hngaktu U Win Myint hna cu faak ngai in hliam an tuar tiah theih a si. Source: Khit Thit Media
A Dang Relchih: Ramkhel Buainak Kha Caanṭha Ah Lak In Chinram Chuahtak Lo Dingah CNF Nih Cathanh An Chuah Atu lio i kan ton cuahmah mi ramkhel buainak hi caanṭha ah lak riangmang in Chinram chuahtak dingin ramthum ah zaam, i dor (Refugee Status) le ramthumnak ah ramkhel dornak tuah dingin Chin mipi hna sinah lemsoinak, forhnak le thapeknak tuah lo dingin Dec 4, 2021 ah CNF nih cathanh an chuah.
An cathanh ah cun “CNF cu ralhrang bu uknak kha hrawh in Federal ramkomh ser dingah NUG, tualchung runvennak ralkap le tlangcung hriamtlai bu hna he i bawm in nunnak thap in mipi caah dohthlennak kan tuah cuahmah. Rambuai ruangah Chin miphun zatuak 20% hna cu ralzam dirhmun an phan. Atu hi Chin miphun dihlak kan lung aa rual bik lio caan a si. Cucaah Chinram cu zapei kauh hmanh kaltak loin Chin miphun hna himnak, Chinram runvennak le hmailei kan miphun caah tiin ralhrang bu doh in ramkhel buainak nganpi (National Emergency) kan ton lio a si” tiah an ṭial.
Hi ramkhel buainak hi caanṭha ah i lak in a Chin mipi hna kha Chinram chuahtak i ramthumnak ah kal dingin sawmnak, forhnak le thapeknak tuah hrimhrim lo dingin CNF nih cun theihternak cathanh an chuah hi a si. Ref: Chin National Front-Headquarter Page. Credit: The Chin Post
