Related Articles
Ralhraang minung 50 leng KNU/KNLA sin ah an ralkap siinak chuahtaak in an lut. Ralhraang lei hi February thla in December thla tiangah KNLA ralkap sin ah ralhraang minung 47 an lut cang tiah KNU/KNLA ralkap lei nih thawng an chuah.
Hriamnam chuahtaak in a rami ralhraang lei pawl hi KNLA nih lunglawm tein an cohlan hna, hriamnam chuahtaak in a rami pawl hi inn ah ttin duhmi si hna seh KNLA ah um a duhmi si hna seh a sikhawh tawkin an bawmh hna tiah KNLA ralkap bawi Saw Muhe nih KNU-Mukyaw thawngzamhnak ah a chim. Ralhraang lei pawl hi ralhraang nih uknak an laak hnu thok in ralhraang pawl cu thawngpang a dik lo ning in an thanh hna, hi hriamnam chiah in a chuahtaakmi pawl hi a lenglei in thil sining a dikmi a theimi an si hna cun a thli tein thawngpang a relmi le thawngpang a ngaimi an si tiah Mg Tun nih KNLA ah a chim.
“Raldoh ka kal hlan ah nu le pa he chawnhbiak ding in a thli tein phone pakhat kaa cawk, rampi chung i a si mi harsatnak pawl cu a thli tein ka rel, khua i a um mi ka hawi le pawl he kan i chawn i ralhraang chung in chuak ding in idea an ka pek. Zaankhat cu keimah duty ka hngah lio ah hriamnam pawl khat lak in ka rak i put i ka tli” tiah a chim. A tu lio thil sining he pehtlai in KNLA kuttang ah ralhraang a rak lut thar mi pawl cu lunglawm tein an cawmken hna tiah KNU nih thawng a chuah ti’n Khit Thit Media nih a ttial.
A Dang Relchih Hmanh: Kum 2022 caah US Dollar Billion 770 hman dingmi US Runvennak upadi (National Defense Authorization Act-NDAA) cu President Biden nih Dec 27 (US lei) ah fehternak minthut a tuah cang tiah theih a si. Hi upadi NDAA chungah hin NUG cozah phungning tein cohlannak kong le NUG tang vuancizung pahnih bawmhnak kong aa tel.
NDAA ah NUG cohlannak le NUG tang vuancizung pahnih bawmhnak kong aa tel lawng si loin ralhrang bu (SAC) cohlan lo ding zong aa telchih tiah Reuter nih a ṭial. NDAA upadi thar an fehter ni in ni 60 chungah Myanmar he pehtlai in US Cozah nih US Hlutdaw ah ripawt an pek lai. Cozah nih hlutdaw i ripawt an pek tikah Myanmar democracy kongah US Policy le runvennak kong, US cozah nih Myanmar a bawmhnak kong le Russia le China nih Myanmar he pehtlai in policy an ngeihmi kong zong telhchih a si fawn lai.
Ramkhel cabia ṭial thiam U Yee Myo Hein nih cun NDAA an fehter hlan Dec 18 ah khan “US cozah nih a ser tharmi upadi ah hin NUG hi zeitindah kan bawmh lai i phungning tein kan cohlan lai timi le nawlngeihnak latu ralhrang bu hi phungning cozah a si khawh lonak dingah zeitindah hma kan lak lai timi zong an i tel men lai” tiah a rak ṭial cang. Cu lawng si loin 2022 chungah Myanmar ram caah US Dollar million 136 le 127000 (Nuai 136, singkhat thongkul le thongsarih) hman ding, cu tangka cu NUG ukhruainak le CDM hna bawmhnak ah hman ding tiah fiangtein an langhter.
NUG ukhruainak timi ah hin nuhrin covo vuancizung le nu-mino-ngakchia vuancizung caah a si lai. NDAA upadi chungah hin Ukraine runvennak caah dollar million 300, Europe ram hna runvennak caah dollar billion 4 le Pacific hmunhma runvennak caah dollar billions 7.1 hman ding timi zong an i tel hna. Credit: The Chin Post
