Related Articles
Kawl Uico Ralhraang nih an ngeihmi Mytel Tower Tungpi cu Sagaing Region chung i um Local Rangers phu hna nih an mah thazaang bak in an hrawh/thluk dih.
Tutan Kawl rampi dothlennak ah hin a kenkip in cawlcangh a hau i cu he pehtlai cun ralhraang nih a ngeihmi company paohpaoh cu a si khawh chungin hrawh khawh zong kha kan i zuam awk a si ve. Hi Mytel company zong hi ralhraang nih an ngeihmi ah an i bochan ngaingaimi company pakhat a si. Tulawng hi a si lo Mytel Tower tungpi hi mipi hna nih an hrawh a tam ngai cang, a luancia caan ah cun bomb thazaang deuh in rak hrawh a si nain tutan ahcun mah le minung thazaang bak in an hrawh hi a si.
Kawl ramchung media a si mi Khit Thit Media nih cun ti hin a langhter ” Sagaing Region chung i um, ralhraang nih ngeihmi Mytel Tower tungpi cu mipi thazaang i bawmhchanh in an hrawh tiah theih a si. Hi a hrawktu hi kan theih ning ahcun Local Rangers Group-LRG ti an a si” ti’n an langhter. A tanglei ah hrawh lio VIDEO zong zohkhawh chih a si.
A Dang Relchih: Kayini Pyinay, Faruso khua ah ralhraang nih ralzaam ngakchia le nupawl telh in mipi lei minung 35 an khangh hna. Kayini Pyinay, Faruso khua ah nizaan December 24th ah ralhraang pawl nih ngakchia le nunau hna telh in minung 35 an nun buin mei in an khangh hna tiah KNDF nih fiang tein a chim mi le Kayini thawngzamhnak nih a thanhmi cu theih khawh a si.
KNDF nih December 24 chun ah Faruso myone, Moso khua pawng, ralhraang pawl nih minung 35 an thah hna i mawtaw pawl he mei in an khangh hna tiah nihin ah thawngtheih a si. Hi an thahmi hna pawl ah hin ngakchia pawl le nu ngakchia, nu puitling pawl an i tel. Mei in khanghmi mipi ruak cu mei nih a kangh tuk hna caah an ruh lawng a taang i mi zei dah an si ti theih khawh a si lo nak a ruang, an thahmi mipi pawl hi ralzaam in lam tanttim ah ralhraang pawl he an i tong i tuksapur in an thahnak hna kong cu KNDF nih cathanh a chuah.
Faruso khua ah nizaan tlaih a tongmi khuami nupawl le ngakchia pawl an dih lak in mawtaw chungah ralhraang nih an khangh hna. Chungkhar pawl an dih lak caah kan lung a ttha lo ngai, ralhraang pawl thil tuahto ning hi nikhat hnu nikhat a ttha lo chin lengmang. Kan mah i thawng kan laak ning ahcun ruak 30 an si tiah PKPF le Kayini lutlai pakhat nih a chim. Faruso myone, Moso khua pawngah December 24, zinglei suimilam 11:30 AM hrawngah Demoso myone lei in raldoh dingin a rami ralhraang pawl le Kayini ralkap hna karlak ah suimilam 4 leng kahdohnak a chuak i kaphnih in a thi mi an um rih lo tiah KNDF nih thawng a chuah.
Kahdohnak a chuah lio ah ralhraang pawl nih mawtaw fa mi, Tthawlazi le Cycle a dih lak fonh in 11 le inn a cheu cu mei in an khangh i ngakchia pakhat telh in mipi pahra sullam ngei loin an tlaih hna tiah thawng kan theih. An tlaihmi hna kong he pehtlai in khuami tlaih a tongmi hna thlah dingin a va nawlmi ralkap minung 4 cu an kut hri in an hren hna i an lu ah hmuahchih in an kah hna tiah KNDF nih thawng a thanh. Thlah dingin nawl ah a va kalmi ralkap pali cu ralhraang lei nih an rak thah hna. Tubantukin thah a tongmi ralkap hi phu thum phu li hrawngin an um, a cheu cu an angki hrukmi ah Badge aa benh lomi an si, a tu an thahmi hna minung 4 hi khoi ka phu in dah an si ti theih a si rih lo asinain KA, KNDF lei in cun an si lo ti cu a fiang tiah KA news nih Yangon Khit Thit ah a chim.
Faruso myone, Moso khua pawngah tuzing suimilam 11 AM hrawngah raldoh i a rami ralhraang pawl le Kayini ralkap pawl karlak ah kahdohnak suimial 4 chung hrawng a chuak. Kaphnih lei a thi mi an um rih lo tiah KNDF nih a chim. Ralhraang lei in hriamnamngan he dongcatloin an kah hna caah Moso khua mi minung pakhat cu hliamhma tuar i Faruso myone i a um mi mipi pawl cu ralzaam dirhmun ah an phaan tiah thawng theih a si. Khit Thit
