Related Articles
US Ralkap Jonah Mang: “CDF Cawlcanghnak ka Lunghmui, Nunnak Tampi a Liam nain Lungdongh ding a si Lo” US ralkap ah ramrian a ttuan cuahmahmi kan Laimi Jonah Mang nih atulio Chinram chung SAC ralhrang a do cuahmahtu CDF a hmuhning le thazaang peknak bia pawl a chim hna.
“Atulio CDF an cawlcangh ning ka theih tikah ka lung an hmui ngai. Lai pasal tha bak an si. Nunnak zong tampi a liam nain lung dongh ding a si lo. Kan unau nunnak a pemi hna hi kan lung ah chiah in thazaang (Motivation) tu ah hmang hna usih. A dongh tiang kan doh loh ahcun an nunnak an pekmi kha zeihmanh lo a si sual lai. Teinak hmuh duh ahcun Sacrifice a hau hmasa ti hi thei hna u sih,” tiah The Chin Journal biahalnak ah a chim.
Ralhriam lei in a thawng deuhmi SAC ralhrang hi tei khawh a si ko lai nin a caan cu a rau kho, tiah a langhter chap. “SAC ralkap hi hriamtlai pawl nih hin an tei khawh ko la tiah ka zumh. Asinain, ramdang lei bawmhnak a um lo ahcun a fawi lai lo. Aruang cu an hriamnam hmanmi hi ai dang tuk. Kanmah Lairam lei ah cun kan tei ko hna lai nain anmah umnak Kawlram (Headquarters) ah kan tei lo ahcun san a tlai lo tiah ka hmuh fawn,” tiah a chim. SAC ralhrang tei nakding ah a caan a rau lai nain lungrual tein a dongh tiang kan doh ahcun kan tei lai.
“SAC tei duh ahcun ahmasat bik ah lungrual a hau. Kan lung aa rual le kan i tinhmi a fian paoh ahcun SAC hi tei khawh hrimhrim a si ko. Caan sau ngai (years) a rau lai tiah ka ruah fawn. Cu ruang ah cun tei duh ahcun a dongh tiang lungrualte le lungsau tein pakhat le pakhat i bawmh hi a herh,” tiah a langhter chap. Jonah Mang hi 2019 ah US ralkap ah a lut i, Italy ram US ralkap (Airborne Unit) ah kum 2 rian a rak ttuan. Italy in South Korea ram ah an tthial tthan i atulio hi South Korea ram US ralkap (12C-Bridgecrew) ah rian a ttuan liomi a si. Credit: The Chin Journal
A Dang Relchih: Sagaing Division, Shwebo Township, Myin Sii khua i um mi mino pahnih hna cu ralhraang lei a ttangmi Pyu Saw Htee phu hna nih an kahthah hna. December 11, 2021 zaan suimilam 8:00 hrawngah Maung Moe Kaung le Maung Raza Min Tun cu bike in an i phirh i an rak tlung, lam lai ahcun an khua bawi U Htay Aung le Pyu Saw Htee phu hna nih an rak dir ter hna i an dir duh lo ruangah ti’n an kah thluahmah colh hna i a hmun lila ah an thih hi a si.
Khuami pakhat nih cun “Chan le ruang pakhat hmanh um loin an kahthah hna, mino pahnih hi bike iphirh in an tlun lio a si i an dir lo tiah an kahthah menmen mi hna an si” a ti. Maung Moe Kaung hi kum 17 hrawng minung a si i Maung Raza Min Tun hi kum 21 minung hrawng a si. U Htay Aung le Pyi Saw Htee phu hna nih khuachung ah zaan suimilam 7:00 in cun a hohmanh nan vaakchuak ti lai lo tiah nawl an rak chuah cang hi a si.
“Zaan suimilam 8:00 thokin vahchuah an siang ti lo, zaan suimilam 8:00 hrawngah bike mawng lio mino 2 cu an kahthah hna. Zaan an duty lio he a rak i ton caah an kahthah hna” ti’n thawngpang a theitu pakhat nih media sin ah a chim.
Mithi ruak pahnih cu a zaan lila suimilam 1:00 hrawngah siizung ah an phurh hna i Maung Moe Kaung cu a lu ah an kheen. Maung Raza Min Tun zong a hngawng ah an kahnak hliamhma hmuh a si. U Htay Aung le Pyu Saw Htee phu hna hi zaan fatin ti awk hi zuu an ding i khuachung mipi hna cu an hrocer tawn hna pin ah meithal zong an puah tawn lengmang.
