Related Articles
Vawlei Cungah Hmur Lian/Ngan Bik A Ngeimi Nu Pakhat Nih Cun Hi Nak In Lian Chinchin Dingin Sichunh(injection) Ka Duh Rih Tiah A Chim.
Andrea Ivanova, Bulgaria miphun a si mi nu cu vawlei cung hmur ngan/lian bik tiah theih a si i a tunak in lian deuh chinchin dingin tuah tthan zong aa tim i tutan Christmas ah khin a voi 27th nak hmur injection cu tuah dingin timhlamhnak a ngei. Kum 24 lawng a si rihmi Ivanova, Bulgaria, Sofia city i a tthang lianmi nih Jam Press ah cun tihin a chim hi ka hmur kaa tuahmi nih hin tampi milem ka lawhnak hnga ding caah a ka bawmh lai tiah ruahchannak ka ngei a ti.
“Hi ka hmur hi kaa uar taktak pin ah ka sia zong hlan nak in a rem deuh” tiah a chim chap. Tubantuk hmur lianhnak caah injection a rak tuah hlan ah hin keimah le keimah ah hnangamnak kan ti lai maw ka ngei kho lo tiah a ti. A tu ahcun self-confidence zong ka ngeih pin ah pa tampi nih chawnh biak ka tong peng tiah a chim. “Ram kip pa nih hin social media in siseh a dangdang zong in ca an ka kuat tawn, phaisa hna phalh dingin leng chuahpi le zaanriah hna duum tti dingin sawmnak nifatin te cuticun cakuat ka dong zungzal” tiah a langhter tthan.
Ivanova nih hin social media ah a lar ngaingaimi Instagram ah hin followers hi 9,000 leng a ngei cang, tthenkhat hna cu hi ti a hmur aa tuahnak nih tampi followers a ngah phahnak hi a si. A hmanthlak hna ah hin comment tibantuk zong an pek tawn tthenkhat nih cun a tthatnak in heh tiah comment an pek i khat lei ah soiseltu zong tampi a tong ve. Voi 26th hrawng sii aa chunh hi a si cang nain a chim ning ahcun hi ka hmur a lianh thluahmahmi nih hin thinphaannak pelte zong a ka pe lo tiah a ti.
Hi hmur tuahnak ah hin voikhat tuahnak ah US $265 a dih tawn i aa tuahmi dihlak ah $5,000 tluk cu a dih cang. Ivanova nih hin hmur lawng si loin a dang a tuahmi zong a um rih cucu a hmaitlak ah hin a si, a hmaithlak hi a duhning a si lo deuh caah a khebe/khebe ruh hrawnghrang pungsaan ttha deuh seh tiah cucu aa tuah tthanmi a si i $660 hrawng a dih. Kum 2019 hrawng ah khan hi thil aa tuahmi ah soiseltu tampi a rak tong bal cu ahcun voi 15 hrawng a rak i tuah cang.
A soiseltu an tam ngai nain tihin a chim “tthenkhat nih cun ka hmur a lianh deuh ah a ka uar deuhmi an um, tthenkhat cu ka hmur a hmeet deuh ah a ka uar mi an um ve, nain khakha a biapimi a si lem lo, zeicatiah keimah i ka duhmi kha a biapi deuhmi cu a si” tiah a chim. Ref: nypost
