Related Articles
KNLA nih Kya Thaung Seik khua, Belin Myone i um mi, ralhraang he aa pehtlaimi, BGF camp cu an doh i camp pi cu an khangh dih, ralhraang minung 7 nung in an tlaih hna. KNLA hi uar an um bak nihin ni tiang kahdohnak a ngol bak lo mi an si. Tanglei ah an luhhnawh hna lio video zohchih khawh si.
Karen miphun ralkap a si mi KNLA nih Belin myone i um mi Kya Thaung Sek khua, BGF camp pi cu zahan zaan December 17th ah KNU battalion pakhat nih ciam dih in an khangh. BGF ralhraang hna le kawl ralhraang hna zong tam lak an tlaih khawh. KNLA nih an luhhnawh hna i an kah hna tikah uico ralhraang le BGF ralhraang cu KNLA nih hriamnam he an tlaih hna. KNLA ralkap lei in minung 1 a nunnak a liam i minung 3 hliamhma an pu tiah theih a si.
Kya Thaung Seik khua ah a um mi camp hi BGF ralhraang nih an laakmi (hmunhma) a si i Mon State le Karen State ramri hrawngah um dawh a si. Hi camp an luhhnawh hna ah hin bomb le hriamnam ngangan KNLA lei nih an hman tiah theih a si. “Zinglei deika te ah kan tuk hna, KNLA le STF (Special Task Force) i bawm in kan kah hna hi a si i, meithal kan puahmi dihlak hi voi 200 tluk cu a si lai” tiah mipi ralkap lei in pakhat nih tualchung media ahcun a chim.
Kya Thaung Seik Camp cu zinglei suimilam 5 AM hrawng in kan doh hna i zaanlei suimilam 6 PM tiang cuticun din lo bakin kahdohnak cu a um. Cu hnu ah camp cu an khangh hi a si. Hi kahdoh lio ah hin cunglei in ralhraang vanlawng zong a zuang len tiah theih a si i, ralhraang mawtaw zong Lay Kay khua lei in a rak pok nain KNLA ralkap nih hnahnawhnak an peek ngai hna caah an kir tthan tiah Khit Thit Media nih a langhter. An Luhhnawh hna lio Video a tanglei ah zohchih.
