Related Articles
India ram Siibawi thiamsang nih Kawlram nawlngeihnak a laatu ralbawi Min Aung Hlaing i tunu, lung lei zawtnak a ngeimi an damh piak. Ralhraang lubik Min Aung Hlaing i tunu, thla kua (9) lawng a si rihmi cu aa chuahpimi lung lei zawtnak a ngei i Min Aung Hlaing nih India siibawi thiamsang pahnih a cah hna hnuah cuticun damte le tluangte in surgery an tuahpiak khawh hi a si.
Ralhraang lubik Min Aung Hlaing nih cun a tunu lung lei zawtnak ngeimi surgery tuah dingin India Rainbow Children’s Heart Institute i siibawi thiamsang pahnih Dr. Nageswara Rao Koneti le Dr. Bahkru hna cu a sawm. Siibawi pahnih nih cun kum 2021 December thla chungah khan Min Aung Hlaing tuni lung lei zawtnak cu tlamtling tein an damh khawh tiah theih a si. Dr. Rao nih cun “thla kua (9) hrawnghrang te lawng a si rihmi ngakchia nih hin lung lei zawtnak aa chuahpi i tluangte le tlamtling tein kan zei (surgery) chuah khawh cang. Ngakchia zong a thaizing ah dam tein siizung in a chuak kho colh” tiah a chim.
India siibawi thiamsang pahnih nih cun Myanmar ram i an kal tan ah hin chuahpi lung lei zawtnak a ngeimi midang 15 zong an damh hna nak kong zong an chim chih. India president hlun Dr. A.P.J Abdul Kalam Care Foundation kalpinak in India le Myanmar ram ah ngakchia lung lei zawtnak a ngeimi hna zohkhenh ningcang hi an cawnpiak lengmang hna, siibawi minung 10 tluk hi cu tlamtling tein cawnnak an dih cang tiah an chim chap. Credit: Vapualauaw
