Related Articles
Lih chim zongah midang zumh awktlak deuh in chim ding, mah nu nih hin cun a fanu kum 9 a tlaihhremtu cu holh hmanh a thiam lo mi a uico zuat lio mi bak a puh ko. Mah tluk lih a chim ti a theih ko mi cu lih chim lo bantuk tein yiah aa um ter tiah cun a pasal nih thil ttha lo a tuah mi huhphenh a timh ruangah a si. A hman ning te ahcun a fanu cu zei ui hmanh nih an sual pi lo a sual pi tu cu a pa ei a si.
Maxico ah mah thil mak tuk le ttih nung tukmi thil a cangmi ah hin sualpuh (case) zong hi a um tuk lo nain mah thil cangmi ah an ui zuat lio mi te cu sualpuh a si caah palik pawl zong nih dan le dun zul in uico te cu an tlaih colh ve. Asinain mah thil cangmi pin lei ah hin ngakchia nu te i a pa aa tel ve tihi palik pawl nih an theih tthan. Mah ngakchia nu te tlaihhrem a ton mi ah hin ngakchia nu te a nu tu nih an pa sualnak a thuh piakmi tu a rak si deuh.
Ngakchia nu tlaihhrem a si lio ah hin inn chung ah ho hmanh an um lo tiah nu bik a si mi nih cun a chim i uico te hi inn ngaktu ah an chiahmi a si caah mah thil a cangmi hi uico an zuatmi te puh dih a si. Asinain mah thil cang mi hi palik pawl nih an hlathlai tikah uico te nih hin ngakchia nu tlaihhrem kho tu ding a si loh tiah an zumh ruangah an hlathlai i a donghnak ah thil hman a si mi cu an theih khawh. Kum 9 a si mi ngakchia a tlaihhremtu cu an uico si lo in a pa ei tu a rak si ti hi an theih khawh tthan mi cu a si.
A Dang Relchih: Camp Victoria: Pasaltha Pu Tui Dim le Keimah, July thla 1997 kum ah a si. Kum 25 a si manh. Camp Victoria ah Pasaltha Tui Dim he kan rak i tong. Ralhrang kut in a nunnak a dih an ti. Ka hngilh kho lo. CNF General Conference Avoi 2-nak ka rak kai. U.S. ka phak hnu a si. Nihin ah ttuan rak ka ti hna sehlaw ka ttuan duh lai lo. Cubantuk rian cu ka rak ttuan. Phaisa kaa khawn. Vanlawng ticket ka cawk. Har le fe in Victoria Camp cu ka va phan.
Tleicia Pasaltha That Ci sinah an ka chiah. Conference a dih. Pu Tui Dim nih ram vai a ka sawm. Anih hi ngal rual a dawi ahcun ngal 2 hmanh a kah an ka ti. Cu tluk cun ram vaih a thiam, voi 1 a kal ah salu 2 a tlunpi an ka ti. Camp Victoria tlang chaklei pi cu a ka kai pi. Ramtang a luhnak kong a ruang a ka ruah pah. Ramdang in na rak kan zuanhnawh i kan tha a nuam a ka ti. Nanmah hmanh pei pumpek in cangvat lakah khua nan sa cu ka ti ve. Bia kan i ruah. Nunnak thap a herh kong a ka chimh.
Hika hrawng hi cu Sakhi a um ton a ka ti. Kan vun bih cu Sakhi a rak dir ko. Nang nih kap ko, a ka u, a ka ti. A si lo, nang nih kap ka ti ve. Upa deuh na si, a ka ti. Ka vun kah cu, thlanglei ah a zuang. Kan duai. Hram buar chungah a kan luh tak diam. Khua a mui pah. Cu ti cun tak lawngin kan kir. Camp kan phan. Khua a dei. Sakhi cu kan va zoh tthan tuah lai maw, ka u a ka ti. Um cang seh, tlangkai ka ba pah ka ti. Mi nunnem, mittha a si. Mah bantuk miphun le ram caah a nunnak a thapmi pasalttha ka rak hmuh mi nih thazaang tampi a ka pek.
Bia ral kah pi ah – Avoi 2-nak Conference nih bia a chahmi pakhat ka philh kho lo. Cucu hmailei Chin miphun kong hi Chin mipi nih biachahnak ngeih seh, ti a si. (1947 Burma Constitution; Chapter 10: The Right of Secession kha kan lak). Ka rak duh ngai. Policy ttha taktak a si, ka ti. Cu bia a chuah cu “I” le “F” tiin phu 2 in bia kan rak i el hna. “I” cu Independence a duhmi. “F” cu federal a duhmi. “F” lei attangmi upa pakhat nih “I” cu e, Zawng Ungti phorh bantuk a si e a ti. Kan ni dih. Zawng nih Ungti ei a duh. A Lu in a phorh ko. A khuai ko lo. A ei kho lo.
Independence kan khel lai ti cu Zung Ungti phorh he a tah chunh. Tahchunh zia a thiam tuk kan rak ti. Pu Tui Dim bantuk pasalttha ka rak tonmi nih khan U.S. ka kir hnuah Camp Victoria kal tthan duhnak thinlung a rak ka ngeihter. Pasalttha Tui Dim – Na biakam ning tein na nunnak cu kan miphun le kan ram caah na pek taktak. Nangmah bantuk pasaltha hi ka upat zungzal ko hna lai. Kan upat taktak, Pasalttha Tui Dim. Credit: Zo Tum Hmung
