Related Articles
Manchester United ah pumpululh aa celhmi le an zohthla taktakmi Mason Greenwood cu nu tlaihhrem le nu velhnak kong cu Social Media ah a hung lar le cangka Manchester Police nih an tlaih. Manchester United police nih an langhter ning ahcun “social media chungah hmanthlak le video cu nu pakhat nih a rak post i cu ahcun Mason Greenwood nih hin a tlaihhremnak kong le a kutthlaknak kong cu hmuh khawh asi” tiah an langhter.
A pehchapmi cu “a tu tlaihhremnak kong he pehtlai in kan tlaihmi pa hi kum 20 tluk hrawng a si i a tu hi nu tlaihhrem le velh siinak in kan tlaih” tiah an chim. Manchester United lei in lutlai hna zong nih Mason Greenwood cu thil fiangfai taktak an um hlan chung cu training ah siseh puai (match) zongah siseh aa tel lai lo tiah an langhter ve cang. An timi cu hi Manchester United club nih hin a zeibantuk sualnak hmanh hi kan pommi le kan hnatlak pimi a si loh i a tubantuk in social media ah cun a hung lar ngaingai caah biafiang tein zeihmanh theih hlan cu cathanh kan rak langhter lem lai lo ti’n an langhter chap. Amah Mason Greenwood zong nih hi konghe pehtlai in zeihmanh lehnak le biachimnak a ngei ve rih lo.
Mason Greenwood, kum 20 tluk a simi, hi March 2019 ah khan a voikhatnak club caah lentecelh hram aa thok. Amah hi Club academy in a tthanglianmi le zohthla taktakmi a si caah February 2021 ah khan kum 4 caah Manchester United he hnatlaknak (deal) zong an rak ngei.
