Related Articles
Cattialthiam Salai Lairamthang nih a ttialmi a si:Tulio Kan Sining [ Ruah Chuk Cho ]
1. Tulio cu Omicron virus nih US cu a kan den saling a si. Kanmah Laimi zong kan zawtning a zual hma ngai. Covid a thawk ka nakin a zawmi kan tam deuh lai tiah ka zumh. President Trump chan lio nak in Joe Biden chan ah Coronavirus a let in a karh i, a zawmi zong an tam deuh lai ka zumh. Mah tluk zawtnak a tam lio ah CNN le Main Stream Media pawl nih cun a sining taktak in an chim duh ti lo. President Trump lio cu siseh law a zozarang zong an hlih dih cang lai.
2. Sizung kip ah Virus in a zawmi an khat dih ti a si. Emergency sizung zong ah mizaw an khah dih caah mizaw a cohlang ti lomi sehkhan tampi a um cang. Virus testnak a dih caah virus test a duhmi minung tampi an i test kho ti lo. Mah ruangah zawtnak a karhning a rang chinchin.
3. Thilman vialte a kai dih. Eidin man le gas [ datsi] man ko hi a kai. Gas loin cun nun khawh a si lo caah Gas man nih kan phaisa bawm le kan pocket money cu a hnursuan ngai te.
4. Supply Chain vialte a cah dih caah duh tawk in thil cawk ding a um ti lo. Grocery dawr tampi ah an thil a dih. Sidawr tampi ah si-ai cawk ding a um ti lo. Cupi le tlangrai si phunphai cu a mui hmuh ding hmanh a har ngaingai cang.
5. Biden cozah nih phaisa fang lawngte hmang in rian a tuan, ramchung thil chuah khawhmi a tlawm chin caah kan phaisa man a ttum. Inflation a kai. Kan phaisa thazang a der caah purchasing power a zor. Mah ruangah income a tlawmmi, mi sifak caah kan har chinchin. Asinain mirum pawl tu cu a let in an rum chinchin. Amazon, Tesla, Microsoft le Facebook te pawl cu Covid chungah an sipuazi vantawng in an thangcho. President Biden cu media pawl biahal a ttih caah press conference zong zarh hnih ah voikhat hmanh a tuah lo. A tuah hmanh ah bia voi 3-4 pin cu hal a duh lo. Cucaah President Biden cu US mipi he kan i hlat ngaingai mi a hung lo. Biden a riantuan ning le tulio kan dirhmun zoh tik ah tukum November i midterm election ahcun democrats pawl cu house ah sung cikcek te dawh an si.
6. Tulio ah a lar bikmi biafang cu “Let’s Go Brandon” ti a si. Mah hi Collage le University siangngakchia pawl nih Biden an duh lonak a faak bik in an langhernak a si. A sullam tu cu nan theih ko caah ka fianter ti lai lo. A fiang lomi nan um ahcun fianternak ka tuah te lai. Credit: Salai Lairamthang
