Related Articles
Vawlei cung ngai hi thil mak tete a tam ngaingai. Minung nih kan ruahkhawh lo tiang in thil a cangmi tampi a rak um. Cu he pehtlai cun a tu kan rak langhtermi Indonesia pa hi a si. A min ah Khoirul Anam a si i rawl chuannak/chumhnak Rice Cooker cu nupi caah phunglam ngei tein a tthit hi a si.
A luancia kum tampi kal cangmi hna zoh tikah minung nih hin thingkung le saram (ramsa) tibantuk nupi/pasal caah tthit hi a rak tam ngaingai tawn. Hmanhsehlaw kan vawlei pi a hun tthancho ve lengmang i cubantuk thil mak hna cu hmuh awk le theih awk a um ti lo ti tluk a si. Tutan ah hi pa nih a rawlchumhnak (rice cooker) nupi caah phunglam ngei tein a tthitmi nih mipi khuaruah har in a tuah dih hna. Anam hi Indonesia ram, Magelang peng, Java khua i a chuakmi a si, cu nih cun an puai sunglawi taktak cu social media a rak tarlangh i hmanthlak te zong a chiah chih.
Cu nih cun khuami hna zong lau lak in a tuah hna. a nupi (Rice Cooker) zong cu monu nih aa hruk tawnmi bantuk cun puan raang tein a tuam ve i nihin thok in ka nupi na si cang tiphun in a hnamh ve. Anam nih cun a nupi thangtthatnak ca zong a tar chih ” a ttha, a dai (quiet), nawl a ngai, a holh tuk lo, chumhchuan a thiam fawn” ti’n a tarlangh ning cu a si. Vawlei cung ah hibantuk thilri a si mi nupi/pasal caah tthit timi hi a voikhat nak a si lem loh, hibantuk thil tete hi a um pah len ko.
Hmanhsehlaw ni 4 a rau lo Anam nih cun a nupi cu a tthen tthan. Social media in mikip nih biahalnak an tuah len, an khuaruah a har ter chinchin hna. Hi a nupi a tthennak cu zeidang si loin zohkhenh a har tuk caah a si tiah a langhter. “Biachah a har ngaingai, nain hi lam hi ka zulh a hau ko, a tlingmi nupi an um lo” tiah a tthennak he pehtlaih cun a chim ning a si.
Mipi tthenkhat nih cun Anam le a nupi kong cu capo nihchuak ah an laak piak i tthenkhat ve nih cun a hnu ahcun cakei (Tiger) he tthitumhnak tuah cang uh tiah comment pe tu hna zong an tam. Zeicatiah rice cooker tham cu facang le sushi chuannak lawng ah pei a tthathnam ko ti an ti.
