Related Articles
Loikaw Kahdohnak Ah SAC Ralhrang Ralkap (6) Nak Tam An Thi, KNDF Pakhat Nunnak Liam! Karenni ramkulh Loikaw khuapi chung ah January 30 zongah kahdohnak a fak ngaingai caah SAC ralhrang ralkap (6) nak tam an thi i, KNDF ralkap pakhat nunnak a liam tiah theih a si.
January 30 chun 12:30 tlukah Loikaw peng chung Loi Lin Lyi khuafonh Kung Suat khua pawngah kahdohnak a rak tuahtu SAC ralhrang ralkap cu Karenni ralkap KA, KNDF i fonhin zanlei sml 2:30 tiang an rak kahdoh hna caah kaphnih kahdohnak a fak ngaingai i, Loi Lin Lyi khua leikap in thazaang an i chap than ruangah KA, KNDF phu leikap cu hnulei ah an i zukphiak tiah theih a si. Kaphnih kahdohnak ahcun SAC ralhrang ralkap (6) nak tam an thih pinah hliam tuarmi an tam ngai tiah theih a si.
Cu bantukin kaphnih i kahdohnak ahcun KNDF ralkap pakhat nunnak a liam i, ram le miphun caah nunnak a liamtu cu pasaltha ah kan chiah i, upatnak kan pek tiah KNDF nih a chim chih. Cupinah chun sml 11:30 tlukah Loikaw peng chungah a ummi SAC ralhrang ralkap ခလရ ၂၅၁ battalion pawngah SAC ralhrang ralkap le KA, KNDF fonhmi phu karlak ah sml 1:00 chung kahdohnak a chuak i, SAC ralhrang leikap ah a thimi le hliammi an tam tiah theih a si.
SAC ralhrang ralkap Brigate 55 zong Loikaw khuapi Naa Nat Taw sang le Baa Du khua leikap ah kahdohnak an rak tuah i, khuami mipi hna cu timh ciam tein an kah hna caah mipi hna cu himnak hmunah an zaam. Credit: The Federal Times
