Related Articles
Ralhrang Kawl Ralkap nih Matupi Peng ah an thahmi minung 7; Hmanthlak Kawl Ralhrang nih Matupi peng Kihlung khua ah an tlaih hna i, an thahmi hna minung 7 chung ah kum 13 ngakchia a tel tiah Matupi Revolution News nih a thanh.
January 9 ah an tlaihmi hna minung 7 i, hmanthlak he an thih cangnak kong cu a thanh. An tlaih hna i, an thah tiah thawngpang a chuami hna cu a tanglei bantuk an si; 1. Pu Tui Dim 2. Pa Le Nang (kum 13) 3. Salai Steven 4. Mamar Pa (a min tak lo) 5. Pu Va Htoo 6. Puhpa Sali 7. Pa Tin San. Hi tlaihkhihmi le thahmi lak ahhin, kum 13 ngakchiate zong a tel. Kawl Ralkap nih an tlaih hna in, lamhmuhsaktu ah an hruai hna ahhin, a tel vemi ngakchia bik a si. Pu Tui Dim hi CNF/A ah caan saupi miphun caah riantuan mi le a pumpe mi a si.
Hika ah a kong tling deuh in rel khawh a si. Cun, Puhpa Sali le Pu Va Htoo hi Mara miphun an si tiah MRN nih a tial. “Pu Va Htoo hi fale 6 a ngeimi a si” theih a si. Cun, Salai Steven hi, unau chuakkhat 7 i, upa lei a si. Hringtu an pa nih a thih tak hnu hna ah a nu nih pacan a zohmi le a farle rual nih bochanmi a si tiah kan theih. Credit: TCP
A Dang Relchih: The Hakha Times (THT) kan riantuan hawi Pu Tui Dim (Pu Tui/Pu Dim) cu Ralhrang nih 2022 January 7 zing ah an tlaih i January 9 zaanlei ah an thah cang, tiah thawng an kan thanh. 2022 January 5 le 6 ah khan THT kan Chief Editor he saupi phone in an i chawn i bianuam an phai/chim.
Putui “Atu hi MPT phone line a umlo caah hlanlio mirum lawng nih an hman khawh mi MEC phone, cucu ka hmang. Ka hawinu, (min langhterlo) kha phone bill vun ka thunpiak ta sehlaw! Vun ka chimhpiak law.” tiah kan Chief Editor cu chawnh/chimh. (Cu bantuk in a hawinu nih phone bill a thunpiak mi zong cu akuatu nih kan Chief Editor a kuat/hmuhter thiamthiam). A chim rih mi cu, “Aizawl ah ka kir kho laklawh lo. Laitlang ah le umnak ka vaivuan. Kalnak pei ka ngeihlo hi,” tiah Chief Editor sin ah capo in a chimtak—Hiti bia a chim hi January 6 zaanlei ah a si.
2022 January 7 zing ahcun, “Pu Tui tel in khuami cheukhat kan pehtlai kho ti hna lo. Kan awlokchong ko,” tiah Matupi lei tuanvo ngeitu nih kan Chief Editor an chimh than. (Hi lio ah, ramchung ramleng in hawikom le dawtu cheukhat thawnghalnak a cat hin lo) Nain, January 8 zaanlei ahcun, “Khuami tlaihkhih mi dang he mual an liam cang e,”tiah thawng an kan thanh than tik ah kan suttung a puur bantuk in kan ruah i THT chungkhar kan mitthli a luang. Pathian nih miphunfa nunnak le thisen hi kan philhpiak hram hlah seh! Ngaihchiatnak langhter bu le taantak mi chungkhar sin ngaihchiatnak hrawm bu in,
(Pu Tui Dim cu CNF/A ah caan saupi ralkap a tuan/tlak hnu ah Media lei ah aa pumpe mi a si. Myanmar ramchung Mainstream Media timi Media ngan tampi ah (e.g. Democratic Voice of Burma-DVB tel in media ngan) hna ah rian a tuan mi a si. Khonumthung Media dirhtu le Editor a si pin ah Chinmi kan nunphung (e.g.zuatkhalhnak…tbk…)pawl short video clip a tuahtu pakhat a si. Credit: The Hakha Times
