Related Articles
Demoso Kahdohnak Ah Ralkap Tamlak An Thi, Hriamnam Zeimawzat An Laak Karenni ram, Demoso khua in meng 6 a hlatnak ah, nihin January 9 ah kahdohnak a chuak. Hi kahdohnak ah hin ralkap 10 nak tlawm lo an thi i, hliamhma a pu mi zong an tam, tiah theih a si.
Cu kahdohnak ah cun ralhrang hriamnam pawl le chawnhbiaknak ah an hman mi pawl thilri zong kan laak piak khawh hna, tiah KPDF nih an thanh. Ralhrang Battalion 66 i an thilthuam hna le thil phorhnak sei 15 zong an laak piak hna. Cu sei pawl cu Ralkap kahdoh ding an kal caan i riahcaw le hriamnam pawl phorhnak ah hman mi an si, tiah theih a si. Credit: The Chin Post
A Dang Relchih: The Hakha Times (THT) kan riantuan hawi Pu Tui Dim (Pu Tui/Pu Dim) cu Ralhrang nih 2022 January 7 zing ah an tlaih i January 9 zaanlei ah an thah cang, tiah thawng an kan thanh. 2022 January 5 le 6 ah khan THT kan Chief Editor he saupi phone in an i chawn i bianuam an phai/chim.
Putui “Atu hi MPT phone line a umlo caah hlanlio mirum lawng nih an hman khawh mi MEC phone, cucu ka hmang. Ka hawinu, (min langhterlo) kha phone bill vun ka thunpiak ta sehlaw! Vun ka chimhpiak law.” tiah kan Chief Editor cu chawnh/chimh. (Cu bantuk in a hawinu nih phone bill a thunpiak mi zong cu akuatu nih kan Chief Editor a kuat/hmuhter thiamthiam). A chim rih mi cu, “Aizawl ah ka kir kho laklawh lo. Laitlang ah le umnak ka vaivuan. Kalnak pei ka ngeihlo hi,” tiah Chief Editor sin ah capo in a chimtak—Hiti bia a chim hi January 6 zaanlei ah a si.
2022 January 7 zing ahcun, “Pu Tui tel in khuami cheukhat kan pehtlai kho ti hna lo. Kan awlokchong ko,” tiah Matupi lei tuanvo ngeitu nih kan Chief Editor an chimh than. (Hi lio ah, ramchung ramleng in hawikom le dawtu cheukhat thawnghalnak a cat hin lo) Nain, January 8 zaanlei ahcun, “Khuami tlaihkhih mi dang he mual an liam cang e,”tiah thawng an kan thanh than tik ah kan suttung a puur bantuk in kan ruah i THT chungkhar kan mitthli a luang. Pathian nih miphunfa nunnak le thisen hi kan philhpiak hram hlah seh! Ngaihchiatnak langhter bu le taantak mi chungkhar sin ngaihchiatnak hrawm bu in,
(Pu Tui Dim cu CNF/A ah caan saupi ralkap a tuan/tlak hnu ah Media lei ah aa pumpe mi a si. Myanmar ramchung Mainstream Media timi Media ngan tampi ah (e.g. Democratic Voice of Burma-DVB tel in media ngan) hna ah rian a tuan mi a si. Khonumthung Media dirhtu le Editor a si pin ah Chinmi kan nunphung (e.g.zuatkhalhnak…tbk…)pawl short video clip a tuahtu pakhat a si. Credit: The Hakha Times
