Related Articles
CDF-Matupi nih ralhraang minung 5 an thah hna i pahnih an tlaih. Chin ramkulh Matupi le Paletwa lam thluan i um Hte bwe khua i umhmun khuar ralhraang cu January 3, zinglei suimilam 7:30 AM ah Matupi-CDF nih kah hram an thok i, kahdohnak ah ralhraang minung 5 an thi, hliamhma minung 10 nih an tuar i minung 2 an tlaih hna tiah cathanh an chuah.
Matupi-CDF nih cun “Matupi le Paletwa lampi thluan Hte Bwe khua ah umhmun khuar ralhraang hna cu January 3, zinglei suimilam 7:30 AM ah kah hram kan thok. Kahdohnak ah ralhraang minung 5 an thi i hliamhma tuar minung 10 hrawng an um, kan nih Matupi-CDF lei cu kan him.
“Matupi le Hakha lampi thluan i um Phanai khua le Nga Hlaing khua karlak ah ralhraang pawl cu minung an rel lio ah, zanlei suimilam 5:30 PM hrawngin kan nih Matupi-CDF he kahdohnak a chuak. Kahdohnak ah kan nih Matupi-CDF nih ralhraang chungtel minung 2 kan tlaihkhawh hna. Thawngpang fiang deuh tein mipi sin ah thanh khawh kan rak i zuam tthan zau lai.” tiah cathanh an chuah.
A Dang Relchih: Ka dawtmi riantuan hawi, Khrihfabu hna le sang mi vialte hna,Kan ngai tuk hna, kan ruat peng hna. Zeidah nan lawh cio? A neh tukmi nan um sual hnga maw ti ka phang. Kanghuhnak mithli he 2022 karhlan kan thok cu a poi hringhran ko. Kanghuhnak a tongmi chungkhar vialte, zeitluk khin dek nan hei tuar le nan hei hraam cio ti ka ruah ah ka lungthin kehkuai dih ai zal ve.
Hnemhnak zong ka hngal lo, thazaang pek zia zong kan thiam hna lo. Hnem khawh le tha pek khawh ding zong kai zum fawn lo. Kan dihlak kan thawn khawh nakhnga khuk bil in kan Pathian cu ka rak nawl lengmang ve. Hi tluk i kan luat i kan him khawh nakhnga kan zapi te i Pathian kan nawl lengmang ko bu i hi thil kan ton cu ti ka ruat. Asinain, Pathian nihin, nan halmi nan hngal lo, ka vel hi nan caah a za ko. Ka thawnnak cu derthawmnak ah hin a lang a kan ti a si ko hnga lo maw ka ti.
Kan phurh a rih tuk caah hin kan zumhnak hi chia ta sual hna hlah usih. Kan hmai ah dinh hmun zong a chiah ko lai. Kan thil rih kan theih khawh cu kan nun rih caah a si. Nunnak a kan hlanh ko ahcun inn lo le thilri kan herh ti cu a hngalh zungzal ko. Kan ruahchannak a muih ahcun nun hi man a ngei tawn lo. Zumhnak he ruahchannak mei vaan tu i zuam hram hna usih ti ka duh.
Kan hlan ah, thazaang laknak caan nei lo in, tek tlak in a tlak mi hawidawt hna zong nih an tluk pi lo. Kannih cu caan saupi thazaang laknak caan a kan pek cia hnu ah kan ton mi a si caah nan phurh khawh dih ko lai tiah kan zumh ko hna. Kan zumh hna nak hi ka caah ka thazaang nan si ve. Dawtmi le dawtu vialte hna, khuachia ralhraang lak i kan um hna caah kan dihlak in, Pathian ralthuam tling i hruk hna usih. Minung ah i hngat lo in Bawipa tu ah i hngat hna usih. Cu nih cun kan ton cia harnak mei a hmih khawh lai i kan hei ton than zong ah phurh le in khawhnak thawnnak a kan pek te lai.
Hmunkhat i khua kan sak ti khawh lo le kan um ti khawh lo zong ah, kan tha der hna hlah usih. Thla i cam tiak hna usih. A mi hna tahnak aw a thei pengtu Immanuel Pathian kan sin ah a um ko. Kan mitthli hi a thawl chungah a rawn ko hna lai i kan kanghnak meikhu hi a sin a phan hrimhrim ko lai. Vutcam can ah Pangpar thi a kan awih caan a phan te ko hna lai. Thawng ngai le raltha ngai in zum ko rih hna usih. Bawipa nih in thawnter ko hna seh. Biak Uk Lianpa Camp. Sangau. Ttialtu: Neely Laiuk
