Related Articles
Council Ralhraang nih Loikaw khua chung an kahnak ruang ah khuami paruk an thi, himnak hmun ah rianrang zaam ding in KNDF nih khuami sin forhfialnak an tuah.
Karenni (Kayah) Ramkulh, Loikaw khuapi, Mailung sang le Pankan sang chung ah tu zing in zaanlei tiang kahdohnak faakpi a chuak i, Ralhraang Council ralkap pawl nih khuami hna cu tinh ciammam in an kah hna ca ah khuami paruk an thi, hma a pu mi tampi an um tiah KNDF nih an thanh. Khuapi chung kahdohnak cu Loikaw khuapi tiang a rak phanh cang ca ah himnak hmun ah rianrang tein zaam ding ah KNDF nih khuami an forhfial hna.
Nihin kahdohnak ah KNDF ralkap pakhat a thi i pathum hma an pu, Council ralhraang lei in a tlawm bik pali an thi i tampi hma an pu tiah KNDF nih an thanh. Ralhraang pawl nih khua chung ah hriamnam ngan ningcang lo le zawndamh in an kah, tinh ciammam in khuami an kah hna i inn an khangh hna ca ah khuami hna cu himnak hmun panh in an zaam. Cu leng ah ralhraang pawl nih Dimawso peng chung ah inn 18 zong an khangh tiah theih a si. Credit: The Hakha Post
A Dang Relchih: Tayetchaung Ah Kum Tling Lo Ngakchia 3 An Kah Hna! Tanintayyi(တနင်္သာရီ), Thawai peng, Tayetchaung khua, Kinshih ah kum tling rih lo mi hngakchia 3 telh in minung 4 cu ralhrang nih an lu ah meithal in an kah thah hna, tiah khua mi sin in theih a si. Ralhrang nih PDF tiah an puh hna i Maung Khanh Zin Htwe(kum 14), Maung Aung Thet Phyo(kum 17), Maung Ye Zaw Htike (kum 18), le Maung Aung Ther Phyo(kum 19) hna cu an lu ah meithal in an kah hna tiah a chim.
Thawai peng, Tayetchaung khua, Kinshih ah an hawile bawm dingin a ra mi ralhrang nih kahdohnak hmun an kal pah ah lam i an hmuh mi pa pohpoh an kah pah thluahmah hna, tiah theih a si. “Khuami pawl cu kan tih tuk ah kan zaam dih. Mah caan lio ah Payan(ပန်းရံ)(Mason) rian a tuan lio mi Maung Khanh Zin Htwe, Maung Aung Thet Phyo, Maung Ye Zaw Htike, Maung Aung Thet Phyo hna cu PDF tiah an puh hna i an lu ah an kah hna. Zei hmanh a thei lo mi hngahchia an si. Nihin chunhnu suimilam 12:30 ah a cang mi a si,” tiah thihlohnak a tong mi chungkhar pakhat nih Khit Thit Media ah a chim.
A Dang Relchih: 2022 Chung ah NUG nih Cozah Rian A Tuan Cang Lai : Ko Min Ko Naing NUG nih tukum 2022 chung ah cozah rian hna cu a tuan cang lai, tiah 88 sianghngakchia hruaitu Ko Min Ko Naing nih a chim.
Kum 2022 cu mizapi nih teinak kan hmuhnak kum a si lai tiah NUG cozah i runvennak minister U Ye Mon, ramdang pehtlaihnak lei minister Daw Yin Mar Aung le PM U Man Win Khine Than hna nih an chim bantuk in Ko Min Ko Naing zong nih “A hnu bik sam fa tia ruahchan nak” tiah min bunh in PVTV tonbiaruahnak ah a chim ve. “A biapi bik mi cu NUG nih a luancia kum ah khan cun raldohnak lei ah tha a pek deuh, tu kum ah cun cozah riantuannak lei ah papek le biatak tein a tuan cang lai.
“I thithruainak biaceihnak lei le phungphai he pehtlai in NUG nih rian hma a laak cang lai i, teinak ding caah zei thil poh kan tuah khawh kum a si lai. Cucu fiang tein kan rak hmuh dih cia cang mi a si. Vawleipi zong nih teitu cu a hodah a si ti mi zong fiang tein an theih cang,” tiah Ko Min Ko Naing nih a chim chap. Tukum chung ah hin cun a fiang dih cang lai Kawlram mizapi hna zong an mah pumpak cio in timhtuahnak an ngei dih hna, zeibantuk thazaang a thawngmi phu zong nih a hlo thlau in a kham kho lai lo, tiah a chim chih.
A Dang Relchih: Sagaing ramthen Kalay peng Natchawng khua cu ralhrang phu nih January 6 chunhnu ah luhhnawh in, an hmuh mi hna poh an thah hna caah ralhrang thah a tong mi a tlawmbik minung 8 an si lai, tiah Natchawng khua mizapi vengtu ralkap phu nih an chim. ‘Khuacaan a tha deuh cang’ tiah khua chung ah um than ding in a kir mi mipi hna cu ralhrang nih an hmuhnak hmun poh ah an kah hna, an thah hna, tiah khuachung mi zong nih an chim. Natchawng khua mi hna cu 2021, December 22 thawk in ralzaam dirhmun in an um cang, khua chung lutthan ding in zohfelnak an tuah lio ah atu bantuk in ralhrang phu nih an kah hna hi a si.
Khua chung sualnak ngeilo mipi hna cu ralhrang nih an thah hna hnu ah cycle pakhat zong mei in an khangh, tiah theih a si. Ralhrang phu hna cu khua chung Yan-Kin phungki sianginn ah umhmun an khuar i thilthuam sawhsawh he an um tiah theih a si. Khua mi pakhat nih, “Ralhrang phu cu thilthuam sawh he an um, khuami hna nih ralhrang an um rua lo tiah kan ruah caah khuachung ah kan lut. Ralzaam dirhmun in ramlak ah harsatnak tampi he caan sau kan um cang caah khuachung ah chikhat kan luhthan lio ah ralhrang nih an hmuh mi poh cu an kah hna. Ralhrang kahnak ruangah nunnak a liam mi hi minung 10 nak tlawmlo cu an si ko lai,” tiah a chim. Credit: The Chin Post
