Related Articles
A hlan chan in tulio chan tiang zongah a si ttheu lai dah, cozah rian ttuan khawhnak ding hnga heh tiah caa zuam a si tawn. Cozah rianttuan hi mitam deuh nih cun kan i timhbikmi a si bantuk in tthenkhat nih cun caminpuai (exam) an awn khawhnak a si phot ahcun dik lo tak zongin cawlcangh kha a poi ah an chia lem lo. Mi sii kho nih heh tiah phaisa lei in an cawlcaang i mi sii kho lo zong nih tlin ve an duh cio tikah lam dangdang zong a kawlmi tampi an um tihi a tu kan rak langhtermi nih hin a fianter ngaingai.
Naite ah khan India ram, Uttar Pradesh, ah Sub-Inspector (palek rian) exam tawlrelnak ah cun exam ve dingin aa tim mi candidate pakhat nih cun dik lo ngai in exam cu tuah a rak i tim ve. Hi candidate fimzir pakhat hi tubantukin i hlennak lei ah hin Nobel Prize hna a um ve ahcun peek a phu taktak tiah a video zohmi kip nih cun comment an peek len. A ruang cu a fim ning hi zumh a um lo tuk ruangah khan a si. Hi candidate nih hin sam ttuh ibunh in cu chung ahcun high-tech bluetooth wireless device cu a thli tein a rak thuh, midang le exam a pe ve dingmi hna zong nih cun sam ttuh aa bunh ti le timhtuahnak ttha taktak a rak ngeih tihi pakhat hmanh a ruah awk an thei cio lo.
Hmanhsehlaw minung fimnak nakin thil a tuah deuh khotu metal detector hmang in a taksa zohfel a si tikah a luu i device a rak i thupmi cu an tlaih ruangmang ko. Hi lawng si loin a hnakhaw chung ah a luu i device he aa pehtlaimi wireless headphone cu a rak chiah tthan. A hnakhaw chung i wireless headphone a chiahmi cu a hmeet tuk caah an laakchuah kho lo. Cuticun hi candidate nih hin cozah rian ttuan khawhnak ding caah ti’n a sikhawh tawkin aa zuam ve leen, metal detector hmang in tlai kho hna hlah sehlaw cu a tling zong maw a hei tlin ve.
Hmanhsehlaw cu ti tlaih a hun si tikah exam zong tuah kho loin dantatnak tu an pek. IPS Officer Rupin Sharma nih cun Tweeter ah hi thil cangmi cu a rak share i a zohtu mipi kip zong nih soisel lem loin a fimzirnak kongtu cu mipi nih a mak an ti deuh. A tang ah hin an tlaih lio VIDEO zong zoh khawh chih a si.
