Related Articles
Kalay ramkulh chung i um mi, Kyan Thar khua i ralhraang pawl hmunhma an khuarnak cu CDF-KKG, CDF-Hakha, PDF-Kalay ti’n phu tampi nih a voihnihnak February 10 zing suimilam 6: 30 AM ah an kah hna i an pahnih karlak ah kahdohnak faak piin a chuak. Suimilam pathum chung tluk hrawng an i kaap i ralhraang lei le Dalaan minung 15 renglo an thi, ralhraang le dalaan tampi nih hliam an tuar tiah thawng theih a si.
Mipi ralkap lei in CDF-Hakha ralkap pakhat le CDF-KKG ralkap pakhat, minung pahnih bomb in hliamhma an tuar i an nunnak caah thinphaang a si lo cun CDF-Hakha in minung pakhat a nunnak a liam. Kangaw myone, Han Tharwaddy khua ah ralhraang pawl le Pyu Saw Htee (ralhraang lei ttangmi) pawl mawtaw pathumm in an rak ra i ralhraang bawmh dingin an rak rat ruangah mipi ralkap pawl cu hnung ah an kir i ralhraang le Pyu Saw Htee hna nih khuami inn le lo tampi an khangh tiah thawng kan theih. A tubantuk caan lio ah hin kahdohnak zeitik paoh ah a chuak khomi a si caah mipi nih ralrin dingmi cu February 12 tiang Kalay le Kangaw karlak lampi cu hman rih lo dingin thawng kan in thanh hna tiah mipi ralkaap nih cathanh zong an chuah chih. Chinland Defence Force-KKG. A Tanglei ah Video an thlahmi cu zohkhawh a si lai.
A Dang Relchih: Kawlram ralkaap pawl hna sin ah Vanlawng Datsi (fuel) bawmh lo dingin British cozah nih company kip ah ralrin a peek hna. Kawl ralhraang pawl hna sin ah vanlawng datsi bawmh bak lo dingin company pawl sin ah British cozah nih cathanh a chuah tiah theih a si. Ralhraang pawl sin ah vanlawng datsi a bawm tawntu company pawl cu British cozah nih ralrin a pek hna. Ralhraang lei vanlawng datsi kongah British company pawl cu i tel bak lo dingin British cozah nih cathanh a chuah. Hi cathanhnak a tuahmi hi Burma Campaign Uk nih a cohlaan, ralhraang he ipehtlai lo dingin British cozah nih lam thar a chuah.
Kawlram ralhraang nih vanlawng hi zeidang ah hmang loin an mah mipi hna kahnak caah an hman bikmi a si. Cu caah Myanmar ramchung vanlawng konghe pehtlai in mizei bantuk company hmanh nih thazaang pe lo dingin British cozah nih ralrinnak cathanh a chuah. “British cozah nih ralhraang pawl vanlawng datsi a bawmmi company ah British company pawl i tel bak lo dingin a timi hna hi a ttha tuk” tiah Burma Campaign Uk Director a simi Mark Farmaner a chim ve.
Atubantuk in ralhraang nih mipi cungah vanlawng hmang in an tuahmi thil hi minung nuhrin covo an buar bantuk a si. A si khawh chung in a dikmi biaceihnak cu hi ralhraang hna cungah chim rel lawng si ti loin a tak tuahsernak hi tlung cang seh. Burma Campaign UK le Myanmar ramchung i phu tampi cu ralhraang nih uknak an laak hnu ah, Ralhraang hna nih an hmanmi vanlawng kahdohnak cu a zual chin lengmang, vanlawng datsi bawmhnak pawl cu phihkhar dingin an nawl hna.
Credit: Chinland Defence Force-KKG
