Related Articles
CNF Chairman Nih Remdaih Biaceihnak Ah Tel An I Timh Lonak A Ruang A Chim. Feb 12, 2022 ah tuah dingmi ramkomh ni (Union Day) ah tlangcung hriamtlaibu hna he remdaihnak tuah dingin timhtuahnak an ngeihmi ah Chin National Front (CNF) hruaitu hna cu Feb 8 zan (US lei caan) ah meeting an tuah i ralhrang tuahmi remdaih biaceihnak ah CNF cu kan kai lai lo tiah phungning tein biakhiahnak an tuah tiah theih a si.
CNF Chairman Pu Zing Cung nih cun remdaih biaceihnak ah tel an i timh lonak a ruang cu a tanglei bantukin The Chin Post ah a chim. NCA hi Ralkap he min kan thut mi a si lo. Cozah he min kan thut mi a si. Ralkap lawng he daihnak kong aa ceih thiam lo. February 1, 2021 ah hriamnam thazang hmang in ralkap nih mipi sin in nawlngeihnak an kan chuh caah hi ralkap hna hi kan uktu an si tiah kan pom hna lo. NCA ning in Remdaihnak ceih dingin kan kal ṭhan ahcun 2008 Constitution tangah bia i ruah ding in kan hnatlak bantuk a si lai. Cu lam Cu kan duh mi lam a si ti lo. 2008 Constitution cu kan pom ti lo mi a si. Ralkap nih remdaihnak caah biatung (agenda) thar an ngei lo. Ralkap nih ramuknak nawl lak peng ding kha an i timh mi a si caah agenda thar an ngeih hlan paoh zeibantuk biaruahnak hmanh a tlam a tling lai lo. Ralkap cu ralkap rian te an ṭuan ding a si. Uknak, upadi sernak le biaceihnak nawl ngeihnak ah an ni tel ti ding a si lo.
CNF chimnak nawlngeitu Salai Htet Ni zong nih ralhrang tuahmi remdaih biaceihnak ah kan i tel lai lo tiah a chim cang. Tutan ralhrang tuah dingmi remdaih biaceihnak ah NCA hnatlaknak min a thumi tlangcung hriamtlaibu 10 chungin KNU le CNF dah ti lo a dang cu kai an i tim. Cun NCA ah min a thu lomi tlangcung hriamtlaibu hna chungin KIO/KIA, MNDAA le AA zong kai an i tim lo tiah theih a si. Credit: The Chin Post
